اللفلفات الحلزونية: سمفونية الأوم

بوست متخصص جدا

#مجرد_نظرة_في_الطب

في أعمق أعماق الكائن الحي، هتلاقي الكل بيشارك في حفلة موسيقية صامتة... كل "أوم" فيها آلة بتعزف لحنها الخاص، و كله بيخدم سيمفونية كاملة.

الـ genome هو النوتة الأصلية… دفتر النغمات اللي اتولدنا بيه.

 و ال epigenome بقى هو عازف الكمان اللي بيغير النغمة حسب مزاج البيئة.

أما pseudogenome فبيحاول يعزف، لكن أوتاره مقطوعة.

وmicrobiome؟ دا الجمهور الغريب اللي بيتفرج… بس ساعات بيغني معانا!

 و ال proteome هو الأوركسترا كله… البروتينات اللي بتنفذ اللحن.

 و ال transcriptome هو الكواليس، الورق اللي اتوزع على كل عازف.

و ال metabolome بيجمع صوت الضربات الأخيرة، إيقاع الاستهلاك والإنتاج.

وlipidome؟ كأنك ماشي على أوتار دهنية… صامتة بس بتحدد كل حركة.

و ال regulome هو المايسترو، بيرفع عصايته فوق في لحظة حساسة.

و ال allelome بيحكي قصة الفروق الدقيقة بينّا.

و degradome هو اللي بينضف المسرح بعد كل عرض.

وenzymome؟ الدينامو… الكائن اللي بيجري ورا الكواليس يولّع النور.

و inflammasome هو أجراس الإنذار، أول ما يحصل خلل.

و interactome خيوط العلّاقات بين العازفين… لو واحد غلط، كله ينهار.

و operome بيحدد المقطوعات اللي هتتعزف إمتى وفين.

لكن لما نخرج من جوه ونبص من بعيد، نكتشف:

إن في behaviorome بيشكل الرقصات الخارجية اللي بنشوفها.

وbibliome بيجمع كل القصص دي على الرفوف.

وساعتها لازم نفرّق:

هل اللي قدامنا ridiculome؟ بهرجة وزينة مالهاش صوت؟

ولا relevantome؟ نغمة حقيقية، بتلمس حاجة جوانا؟

كل "أوم" نغمة، وكل نغمة مش هينفع تتعزف لوحده.