#الزواج_السليم_الزواج_السعيد
في يوم مشمس و صافي و جميل و الهواء بيخبطك بنسماته العليله. قاعد بمزمز ليمون بالنعناع، مراتي سألتني سؤال لولبي، قالت: عمرو إنت بتغير عليا؟
رديت عليها: بصِي، الغيرة عندِي مش ضعف ولا نقص فيّ، ولا معناها إني بخاف على حاجة في إيدي تطير. لكن غيرتي مختلفة شوية. أنا بحافظ على اللي بحبُه، بخاف عليه، لكن عمري ما بخنق ولا بحبس ولا بخلي العلاقة تتسجن في الخوف.
يمكن المشكلة في الغيرة هي الخوف، الخوف على اللي عندك، على علاقاتك ومكانك في قلب اللي بتحبّهم. لكن الخوف ده لازم يتمّ التعامل معاه بعقل، عشان مينفعش يسيطر علينا ويخنق علاقاتنا.
الشعراء والفنانين والفلاسفة و الدكاترة حاولوا يجيبوا لها تفسير، لكن في الآخر وصلوا لإن الغيرة عبارة عن خوف على الشخص الأقرب لقلبك.
والغيرة بتحصل لما يجي شخص تاني يهدد الوجود ده، وكأن في حرامي داخل يسرق جزء من شعورك ومكانك عند الشخص التاني.
لكن يا ترى إيه المميز في الحرامي الجديد؟ عنده حب أكتر أو كراهية أقل؟ الحقيقة فيّ و فيكِ خليط بين الحب والكره، لكن المشكلة في مين يقدر يسيطر على غضبه ويخلي علاقاته تمشي في طريق آمن.
أنا مش بليد ولا عندي برود في مشاعري، ولا بحب التملك ولا المنافسات على مين أفضل ومين أجمد. لكن بحافظ على علاقتي، بزعل لما بخيب ظن شخص فيّ، عندي طموح لكن عمري ما كان عندي هوس أبقى الأول ولا آخذ الكاس ولا أكون أفضل من الكل. أنا مش عاجز ولا صغير.
القوة الحقيقة عندي في الطمأنينة. أنا هادئ ومطمئن لإني كريم في مشاعري، في وقتي، و في جهدي. عشان كده معايا بتحسي بجمال الحياة، حتى لو اخترت غيرِي في الآخر، هتفضلي فاكراني في قلبك، وهتلاقي عندك تفسي الأمان والإحتواء.
فالقضية عندي مش غيرة الخوف و النقص. لكن غيرة حب وعزَّة. و عاوز أقولك، حتى يا حلاوة لو اخترتي غيري، فدائما ما هتلاقي ذكرايا في قلبك مزيجا من الحب والكراهية.
