الجذور اللي بتثبتنا

#إدارة_نباتية 

كلنا بنتشد للضوء. بندور على اللي فوق، على الحلم، على الحاجة اللي تبان. بس الحقيقة؟ مفيش فرع يقدر يطول من غير جذر ثابت.

الجذور مش منظر. محدش بيشوفها، ومحدش بيصوّرها. لكن هي اللي شايلة، وهي اللي مكمّلة، وهي اللي بتغذّي وبتحمي.

في حياة الإنسان، الجذور دي ممكن تبقى حاجات كتير زي أهلك، تربيتك، ذكريات الطفولة، أول حضن، أول خوف، أول فرحة.

ممكن تبقى القيم اللي كبرت عليها، أو الجدعنة اللي إتعلمتها من أمك، أو السكوت الحكيم اللي اتعلمته من أبوك.

اللي ملوش جذور، أقل ريح تشيله. و أكتر حاجة بتوجع، إنك تفتكر نفسك ثابت، وفجأة تكتشف إنك أصلك مش ثابت.

الجذر مش ضعف، ده أمان. م ش عبء، ده أصل. و كل ما كنت أصدق مع نفسك، كل ما عرفت جذورك فين، هتعرف تروح لفين من غير ما تضيع.

لكن خلى بالك، الجذور مش لازم تفضل هيّ هيّ. فيه جذور بتوجع، جذور مسمّمة، و ساعات الحكمة إنك تعرفها مش علشان تعيش بيها، و لكن علشان تختار تكسر السلسلة، وتزرع لنفسك جذر جديد.

الفرق بين شجرة بتطرح خير، وشجرة ناشفة، هو نوع الجذر. و الفرق بين إنسان بيعدّي في الدنيا، و إنسان بيسيب أثر. هو كمان الجذر.

بين الإنسان والشجرة

#إدارة_نباتية  

إحنا كبشر دايمًا بنجري. نجري ورا رزق، ورا حب، ورا حلم… وساعات حتى ورا وهم. لكن الشجرة؟ الشجرة ما بتجريش، بتستنى، بتصبر.

وبين الجري والصبر، في فرق كبير… فرق بيعرّفنا إحنا مين. الإنسان لما بيقع، بيحاول يقوم بسرعة، كأن السقوط عيب.

لكن الشجرة لما تقع منها ورقة، ما بتزعلش. بتعرف إن ده جزء من الرحلة، وإن الورقة اللي وقعت كانت لازم تسيب مكانها للي بعدها.

الإنسان بيبني أبراج وسرعة وسوشيال ميديا وذكاء اصطناعي، و الشجرة بتبني في صمت، حلقة جوّه حلقة في قلب الجذع، لا بتتصور، ولا بتتباهى، ولا حتى بتحس إنها ناقصة.

يمكن الفرق الحقيقي إن الإنسان بيحاول يسيطر على الزمن. و الشجرة بتعيش مع الزمن.

جذر الشجرة نازل في بطن الأرض، و فرعها طالع للسما، رافع راسه. و كأنها بتوصل بين التراب اللي تحت والخلود اللي فوق.

وده يمكن أصل الحكاية كلها.

الإنسان محتاج يبص حواليه، مش بس بعنيه، بعقله و بقلبه، و يفهم إن وجوده مش أعظم من شجرة، و لا أضعف. لكن لو اتعلم منها، هيعيش أهدئ، وأصدق، وأقرب لنفسه.

الشجرة اللي سابت ثمرتها تقع

#إدارة_نباتية 

الشجرة ما بتمنعش الشمس، وما بتخبيش الضل، تمد جذورها في الأرض، وترفع فروعها للسماء، وتفضل ساكتة. 

تعدّي عليها المواسم، وتفهم الوقت من غير ساعات، وكل سنة تطلع ثمار جديدة. تديها من عصارتها، من صبرها، من حياتها، تشيلها على فروعها، تحميها من الريح، وتفضل معاها لحد ما تكبر وتنضج، وتبقى الثمرة جاهزة... تسقط.

الشجرة ما بتحاولش تمنعها، ما بتشدهاش ليها، ولا تندب لحظة الفُراق، تسيبها تقع بكل هدوء، كأنها كانت مستنياها تخلص الرحلة دي لوحدها. 

الثمرة بتقع مش لأنها فسدت، لكن لأنها استوت، بقت جاهزة تبدأ حياتها بعيد عن حضن الفرع، يمكن تزرع نفسها، يمكن تاكُلها الأرض، يمكن تبقى شجرة كمان. 

و الشجرة؟ ما بتزعلش، وما بتبكيش، بتفضل واقفة، تمد فروعها من تاني، وتحضن ثمار جديدة جاية في السكة.

الشجرة ما بتسألش عن اللي مشي، وما بتندهش من اللي جه، هي بس بتعرف توقيت النضج، وتعرف إمتى تخلي ثمرها يقع أو يقف على رجله.

الشجر باقٍ ببقاء الزمان

#إدارة_نباتية 

في عالم بيتغيّر كل ثانية، في وجوه بتمشي، وأصوات بتسكت، ومباني بتتهدّ، وحكايات بتتنسى… فيه كائن وحيد واقف، ساكت، بس بيحكي... الشجر.

عارف يعني إيه شجرة؟

يعني كائن ما بيجريش، ما بيهربش، ما بيغيرش مكانه… بس جوّاه عمق، حكمة، صبر، وسكون بيغيظ الزمن.

الشجرة مش بس ورق وخُضرة، الشجرة تاريخ.

بتبدأ من بذرة ضايعة وسط التراب، لا صوت ولا شكل، بس عندها يقين غريب إنها في يوم هتخرج للنور. مش مستعجلة، مش قلقانة.

بتستنى الميّه، وتستقبل الشمس، وتسمع للرياح، وتتعلم من كل فصل يعدّي عليها.

الناس بتفتكر إن الشجر ساكت. لكن اللي يسمع بصدق، هيلاقي إن الشجرة بتتكلم. بتحكي عن اللي عدى واللي جاي، عن اللي كان واللي لسه بيحصل. كل عقدة في جزعها، كل غصن مكسور، كل ورقة وقعت… شهادة.

في عزّ الضلمة، الشجرة بتفضل واقفة. وفي عزّ النور، ما بتتغرّش. زي العارف اللي شاف كل حاجة، وقرر يسكت، مش عجز، لكن احترامًا للصمت.

عشان كده الشجر باقٍ ببقاء الزمان. مش لأنه الأقوى، لكن لأنه الأعمق.

الشجر لا يشعر بالتقصير

#إدارة_نباتية 

عُمرك شوفت شجرة بتقول "أنا آسفة، مقصّرة"؟ عُمرك سمعت نخلة بتعتذر عشان ما طرحتش بلح كفاية السنة دي؟ عُمرك شميت وردة بتقولك "أنا ريحتي مش قد كده، سامحني"؟

الشجر ما بيعتذرش، الشجر ما بيجلدش نفسه، الشجر ما بيقارنش نفسه بشجر تاني. الشجر بيقف، ويمد فروعه، ويدي على قد ما يقدر، وساعات في مواسم ضعفه بيهدئ شوية. ممكن يفقد شوية ورق، يبطل يطرح، بس عمره ما حس إنه أقل. ولا عمره قال "أنا فاشل".

الشجر فاهم، فاهم إن الحياة مواسم، فاهم إن فيه شتاء، ورياح، وجفاف، وفاهم إن اللي عليه بيعمله، واللي مش بإيده، يسلمه لربه.

وإحنا؟ إحنا بنجلد نفسنا لو تعبنا، بنحس بالذنب لو ما قدرناش نعطي، بنقارن نفسنا باللي حواليّنا طول الوقت، بننسى إننا بشر، مش آلات، بننسى إننا بنمر بمواسم، زي الشجر بالظبط، بس بننسى نرحم نفسنا.

يا ريت نتعلّم من الشجر نقف ثابتين، ونمد إيدينا للحياة، نعطي على قد ما نقدر، من غير ضغط و إجهاد. لما نعجز عن العطاء نفتكر إن دي فترة وهتعدي. زي ما الشتاء بيعدي، ويرجع الربيع والشجر يرجع يطرح من تاني من غير ما يلوم نفسه و من غير ما يحس بالتقصير.

الشجر.. الكائن الأكتر إيمانًا

#إدارة_نباتية 

عارفين؟ ساعات كتير ببُصّ على الشجر وأحس إنه أهدئ من كل البشر، وأقرب لربنا من ناس كتير. الشجر ما بيعترضش، ما بيشتكيش، ما بيهربش من مكانه، حتى لو كان في وسط صحراء، أو على جبل عالي، أو في مكان ملوث. بيفضل واقف، ثابت، ورافع راسه للسماء.

الشجر بيُوحّد ربنا بطريقته. كل يوم بيوجع ورقه للنور، ويفرد فروعه للرياح، ويشرب الميّه اللي ربنا قسمها له، حتى لو نقطة. ما بيقولش "ليه المطر قليل؟" أو "ليه الغذاء قليل؟"... بيسلّم أمره ويكمّل نموّه، على قده.

ولو حصل و حد حاول يقطع منه فرع؟ ما يصرخش، وما يحقدش، بالعكس... يكمّل و يعيش بالفروع اللي فاضله، ويمكن يطلع فرع جديد من مكان القطع. سبحان الله، كأن عنده يقين إن الرزق مش في الفروع، الرزق من فوق، من ربنا.

واللي أكتر من كده؟ الشجر بيدي خيره لكل اللي حواليه، للإنسان، وللطير، وللحيوان، حتى لو حد آذاه، بيظل كريم. ما بيمنعش الظل عن اللي قعد تحته، وما بيبخلش بالهوا، ولا بالثمر، وده قمة الرضا.

إيمان الشجر مش بالكلام، إيمانه بالفعل. الشجر ما بيسألش،ليه؟ ولا إمتى؟... بيسيبها على ربنا، ويعيش اليوم بيومه. وده اللي ناقص في ناس كتير: الرضا، والتسليم، والثقة في حكمة ربنا.

يمكن لو اتعلمنا من الشجر شوية، نرتاح. نبطل نقلق على بكرة، ونبطّل نتمرد على اللي مشينا فيه. يمكن وقتها قلوبنا تروق، ونقرب من ربنا بإيمان صامت... زي الشجر.

الشجر لا يسمح بتخابث فروعه على بعضها

#إدارة_نباتية 

الشجر عارف نفسه، وفاهم إن قوّته في تناغمه. الفروع عمرها ما بتتخانق مع بعض، ولا فرع بيكسر التاني علشان يوصل للنور. كل فرع له اتجاهه، له مساحته، وبيكبر على مهله من غير ما يزاحم أو يزق حد تاني.

لو فرع حاول يتخابث ويمد نفسه على حساب غيره، الجذع نفسه يوقف و ينشفه. لأن الشجر مش بيقبل الخبث جواه. بيحافظ على التوازن، وبيفهم إن أي خلل في التعاون بين الفروع ممكن يوقعه كله.

الشجر مش بيجامل، لكنه عادل. ومش بيسكت على الفساد، لكنه بيعلّم الأدب بهدوء الطبيعة وحكمتها.

الشجر بيعلّمنا إن الحياة مش مزاحمة، وإن كل فرع ليه مكان، بشرط الاحترام والمشاركة. الشجر لا يسمح بتخابث الفروع، و أي شجرة تسمح بكده، مصيرها تتكسر و تنتهي.

التكيف مع الفصول

#إدارة_نباتية 

الشجر كائن صبور وذكي، بيعرف يتعامل مع كل فصل بطريقته الخاصة، كأنه فاهم الدنيا وبيتكيف معاها بحكمة وسكون.

في الصيف، الشجر بيكون في عز نشاطه. الورق أخضر و بيلمع، بيظلل علينا حرارة الشمس، وبيشرب المية من الجذور بسرعة علشان يعوض اللي بيفقده من التبخر. تحس كأنه واقف بيحمينا، ومبسوط بحركة الهواء وضوء النهار.

أما في الخريف، الشجر بيهدى شوية. الورق يبتدي يتغير لونه، بين الأصفر أوالبرتقاني والأحمر، وكأنها لوحة فنية ربانية. الشجر بيقرر يخفف الحمل، يوقع الورق علشان يستعد للبرد.

وفي الشتاء، تلاقيه واقف ساكت، من غير ورق، لكن مش ميت. لأ، ده في حالة انتظار. جذوره شغالة تحت الأرض، بتحوش الغذاء وبتستعد للربيع. كأنه بيقول: أنا كويس، بس مستني الوقت المناسب علشان أرجع أتفتح من تاني.

يجي بقى الربيع، وتبدأ الحكاية من جديد. الورق يطلع، الزهور تتفتح، و الرائحة الحلوة تملأ الجو من تاني. و كأن كل حاجة فيه تبقى نابضة بالحياة.

الشجر بيعلمنا إن كل وقت له طبيعته، وله تصرفاته المناسبة. ماينفعش نفضل في عز النشاط طول الوقت، ولا نموت نفسنا في الشتا. الحياة دائرة، والشاطر هو اللي يعرف يتكيف مع فصولها، زي الشجر بالظبط.

مش كل الشجر قابل للزرع

#إدارة_نباتية 

فيه شجر بيتزرع للزينة، وشجر للثمر، وشجر للظل. وكل واحد ليه دوره. بس الغلطة الكبيرة بتحصل لما تفتكر إن كل شجرة حوالينا لازم تدينا أكل… أو لما نحكم على الشجر من حجمه أو ورقه من غير ما ندوق ثمره.

أوقات كتير، اللي يلفت نظرنا هو الشجرة اللي واخدة حيز كبير، متفرعة، باينة من بعيد. نقول "دي أكيد مفيدة".

بس لما نقرب، نكتشف إن كل اللي عندها ورق، من غير طعم، ومن غير فايدة حقيقية. ويمكن كمان تستهلك من الأرض أكتر ما تدي، تظلل على غيرها، تمنع النور و المياه عن البذور التانية اللي كان ممكن تطلع.

وفي المقابل، فيه شجرة في الركن، بسيطة، سكتها هادئة، ما بتعملش دوشة، بس بتمد الأرض بخير، وبتمد اللي حواليها باللي يعيشهم ويقويهم. ودي ساعات ما بنشوفهاش غير لما نحتاج لها.

اللي فاهم في الأرض، عارف إن مش كل شجرة المفروض نسيبها تكبر، ومش كل فرع المفروض نسيبه على حاله. أوقات لازم يتقلم، وأوقات لازم تشيل الشجرة كلها من مكانها، وأوقات لازم تسيب الأرض ترتاح… لأن الاستمرار في الزرع مش دايمًا نجاح، أوقات بيبقى استنزاف.

وكل ده ما يتشافش بعين مستعجلة. عايز نظرة فيها صبر، وفهم للتوقيت، ووعي إن مش كل حاجة تنفع في كل أرض، ولا كل شجرة هتطرح في كل موسم.

اللي بيبني غابة صحية، مش اللي يزرع أسرع، ولا اللي يجيب أكبر شجرة. هو اللي يعرف إمتى يزرع، فين، وليه… واللي عنده استعداد يقول "لأ" لشجرة شكلها حلو، بس مش نافعه.

الأشجار ماعندهاش عيون تكحّلها

#إدارة_نباتية 

عارف لما تبص لشجرة كبيرة، واقفة بصلابة من سنين، جذعها مشقق وأوراقها بتتهز مع الهوا؟ ممكن تقول دي شجرة كبيرة، مالهاش مشاعر، مالهاش عينين تبصلك أو حتى تحس بك، بس الحقيقة؟ الشجرة دي فيها كل الروح.

الشجرة ماعندهاش عينين تكحلها، بس عندها فروع تمد لك ظل، وتطبطب على تعبك من غير ما تنطق. ماعندهاش ودان، بس بتسمع همسك وانت قاعد تحتها زعلان. ماعندهاش قلب، بس بتحس وتديك أكتر ما بتاخد. الشجرة عمرها ما طلبت حاجة، بالعكس، بتدي: هوا، ظل سكر، وزينة في منظرها.

واحنا؟ إحنا ساعات بندوّر على الجمال في تفاصيل سطحية. بندوّر على الكُحل في العيون، وعلى الشكل الحلو الممشوق، وننسى إن فيه حاجات جمالها في عطائها، في سكونها، في وجودها اللي بيطمنك.

الشجرة مش محتاجة كحل علشان تبقى حلوة، هي حلوة بطبعها، بصبرها، بثباتها. الناس اللي زي الأشجار قليلين، بس موجودين. الناس اللي ساكتة بس سند وقت ما تحتاج، اللي واقفين دائمًا حتى لو مافيش مقابل، اللي وجودهم نعمة مش واخدة ضوء كفاية. لو عندك في حياتك حد بالشكل ده، حافظ عليه، زي ما بنزرع شجرة ونرعاها.

الجمال ده مش محتاج كحل علشان يبان و لا علشان يتحب. الجمال مش دايمًا في العين، الجمال الحقيقي بيطلع من الجذور، من الأصل، و من العطاء اللي مابيخلصش.

الشجر لا يتدخل في خلاف الشمس والقمر

#إدارة_نباتية 

الشجر واقف مكانه، ثابت، لا بيتحرك ولا بيتدخل في اللي حواليه. الشمس بتطلع الصبح، تنور وتدفّي، وبعدها يجي الليل والقمر ينور السما بطريقته الهادية. ساعات الشمس بتكون حامية، وساعات القمر بيكون خافت، لكن الشجر واقف، لا بيتحيز لده ولا لده، ولا بيحاول يصلح بينهم.

في حياتنا، ساعات بنلاقي نفسنا في مواقف زي الشجر، وسط خلافات ناس حوالينا ممكن أهل، أصحاب، أو حتى زملاء شغل. واحد شايف نفسه الشمس، والتاني شايف نفسه القمر، وكل واحد مقتنع إنه الأهم. لو دخلت في نص الخلاف، هتلاقي نفسك بتتحرق بحرارة الشمس أو بتتوه في عتمة القمر.

الشجر بيعرف إن الدنيا ماشية بدورانها، وإن كل واحد له دوره وزمانه. الشمس هتفضل تطلع، والقمر هيفضل ينور، وإن اختلفوا، هيفضلوا بيكملوا بعض. يمكن دي حكمة الشجر... إنه فاهم إن التوازن أهم من الانحياز، وإن الحياة مش محتاجة طرف يكسب والتاني يخسر، لكنها محتاجة اللي يفضل ثابت زي الشجرة، شايف الدنيا بتلف، وعارف إن لكل شيء وقت.

الشجر يقبل السماء ليلا

#إدارة_نباتية 

عارف لما تبص لشجرة طويلة، وتحس إنها ممدودة كده للسماء، كأنها بتحاول تلمسها؟ المنظر ده دايمًا يخليني أفكر: هو الشجر بيحلم يوصل للسماء؟ وهل فعلًا بيبعت قبلاته كل ليلة؟

الشجر عنده حاجة مش عندنا.. الصبر والمثابرة! يفضل سنين يطول ويكبر، وما يستعجلش، ولا يستسلم لرياح ولا شمس ولا حتى إهمال البشر. 

يمكن ده اللي بيخليه في الآخر يقدر يلمس السما بطرف فروعه، كأنه بيهمس لها سر كل يوم. يمكن بيحكي لها عن اللي شافه في الدنيا، عن العصافير اللي زارته، عن الناس اللي عده جنبه، عن الجدعان اللي زرعوه واللي نسيوا إنه موجود.

إحنا ساعات كتير بنكون زي الشجر، نحلم نلمس السما، نرفع نفسنا فوق المشاكل والهموم، نمد روحنا لفوق عشان نوصل لحاجة أعظم. بس الفرق إن الشجر عمره ما بيحبط، عمره ما بيقرر إنه يقصر نفسه، ولا يستسلم لو الدنيا ضاقت عليه. بيقاوم في صمت، بيكبر في هدوء، ويفضل فاكر هدفه.

يمكن لو اتعلمنا من الشجر، هنفهم إن الطريق مش في السرعة، ولا في القفزات الكبيرة.. الطريق في الثبات، في إننا نمد جذورنا جوا الأرض كويس، ونسيب فروعنا تطول، واحدة واحدة، لحد ما في يوم، نلاقي نفسنا بنلمس السما. وأهو يمكن وقتها، نبوسها زي ما الشجر بيعمل كل ليلة!

الشجر لا يمكن أن يكون ذكر

#إدارة_نباتية

الشجرة لا يمكن أبدًا تكون ذكر لأنها ببساطة مجبولة على العطاء المستمر بلا انتظار مقابل، ودي صفة أنثوية بامتياز. الذكر بطبيعته رمز للقوة والحماية، لكن الشجرة بتحتوي وتغذي وتحنو، وده دور دايمًا بيرتبط بالأمومة والأنوثة. الشجرة مخلوقة عشان تدي، عشان تحتضن، وعشان تكون ملاذ لكل محتاج، ودي أدوار بنشوفها في الست أكتر من الراجل.

كمان الشجرة فيها صفة الصبر اللي تخليك تحس إنها شبه الست اللي بتتحمل كتير عشان اللي حواليها. تلاقيها واقفة ثابتة مهما واجهتها عواصف أو رياح شديدة، لكن في نفس الوقت فيها نعومة. فروعها بتتحرك بهدوء مع الهوا، وأوراقها بتتساقط زي دموع ست صابرة، لكن عمرها ما تنهار.

الشجرة بتطرح الثمار، زي الأم اللي بتزرع الحياة في أولادها، الشجرة بتزرع الأمل والخير في الأرض. الثمار هي رمز الخصب والعطاء.

فالشجرة، في كل حاجة، بتشبه الأم اللي بتدي بلا حدود، والأنثى اللي بتحتوي الكل بحب وحنية. عشان كده لا يمكن تكون ذكر، لأن دورها في الحياة أقرب بكتير لدور الأنثى اللي بتعيش عشان تعطي وتحب.

الأشجار لا تتذكر أحلامها

#إدارة_نباتية 

عارف الشجرة اللي قدام بيتك؟ اللي واقفة هناك بقالها سنين، شايلة همّ الفصول اللي بتعدي عليها، بيقع ورقها في الشتا وترجع خضرتها في الربيع من غير ما تشتكي ولا تسأل "ليه؟". الشجرة دي عمرها ما بصّت لنفسها في المراية وسألت: "هو أنا كنت بحلم بإيه؟".

الأشجار بتكبر في صمت، تمّد جزورها في الأرض وتسيب فروعها تعلو في السما، من غير ما تفتكر هي كانت عاوزة تبقى إيه وهي صغيرة. يمكن كانت بتحلم تبقى نخلة، ولا وردة في جنينة، ولا حتى مجرد فرع صغير في مكان هادي. بس في الآخر، هي كبرت زي ما الظروف حكمت، وسكتت، وعاشت الدور اللي الطبيعة رسمته لها.

إحنا بقى؟ إحنا عكس الأشجار تمامًا! بنفتكر كل حاجة، بنتعلق بأحلامنا القديمة، اللي كنا بنرسمها واحنا عيال صغيرين، وبنقعد نقارنها باللي بقينا عليه. بنسأل نفسنا طول الوقت: "هو أنا كنت عاوز أبقى كده؟"، "طب أنا غلطت فين؟"، "ليه الحلم بقى حاجة تانية؟".

بس يمكن الشجر عنده حكمة إحنا مفتقدينها. يمكن الفكرة مش إننا نفضل فاكرين كل حاجة، ولا نحاسب نفسنا على كل خطوة، يمكن السر في إننا نعيش زي الشجر... نعدي الفصول، نتحمل العواصف، ننفض عننا ورق الأحزان، ونسيب الحياة تاخدنا لأماكن ما كناش مخططين ليها.

الأشجار مبتنساش و ما بتقفش عند الذكرى، ما بتتحسرش على اللي فات، وما بتسألش "لو كنت اتزرعت في مكان تاني، كنت هبقى أحسن؟". الشجرة ببساطة بتعيش.

فكر كده… مش يمكن نكون محتاجين شوية من الحكمة دي؟

ماذا لو تجسست الأشجار على بعضها؟

#إدارة_نباتية 

تخيل معايا لو الأشجار بقت جواسيس على بعضها! لو كل شجرة في الغابة عندها أذن بتسمع وعين بتراقب ولسان بينقل الأخبار، إيه اللي ممكن يحصل؟

أكيد هيكون في شجرة لسانها طويل، كل حاجة تعرفها لازم تقولها، وتفضل تحكي عن اللي بيحصل حوالين الجذوع والفروع، حتى لو الموضوع بسيط زي إن شجرة نامت بدري أو إن نخلة بتتكلم مع النسمة كل ليلة. وفي المقابل، هيكون في شجرة كاتمة الأسرار، واقفة في مكانها تشوف كل حاجة وتسكت، لا تقول كلمة ولا تلمح بحاجة، ولو حد سألها عن اللي سمعته ترد بكلمة واحدة: "ماعرفش!"

أكيد هيكون في شجرة بتشتغل لصالح أشجار تانية، تنقل الأخبار هنا وهناك، وتبلغ عن أي شجرة بتحاول تمد فروعها ناحية الشمس أكتر، أو أي واحدة بتسرق المطر من غيرها. ممكن تبقى شجرة، شكلها بريء وهادي، لكنها في الحقيقة قاعدة تجمع المعلومات وتنقلها لجذور الأشجار الكبيرة، اللي بتقرر مين ياخد الميّة ومين يفضل عطشان.

في وسط كل ده، لازم تكون في شجرة عجوزة، شايفة وعارفة كل حاجة، بس بدل ما تتكلم، تفضل ساكتة وتبتسم، لأنها فاهمة إن كل شجرة ليها نصيبها من الشمس والمطر، وإن اللي بيتجسس النهاردة، بكرة هيلاقي حد بيتجسس عليه.

بس الأشجار مش غبية، و مفيش شجر بتتجسس ...

الشجرة مش مجرد آلة زمن

#إدارة_نباتية 

لما نبص على الشجرة، ممكن نقول إنها آلة زمن حية. جدرها غارسة في الماضي، جذعها عايش في الحاضر، وفروعها بتتمد للمستقبل. كل حلقة في ساقها بتحكي سنة عدّت، وكل ورقة بتشهد لحظة من حياتها. لكن الحقيقة، الشجرة مش مجرد آلة زمن... الشجرة أكتر من كده بكتير.

الشجرة رمز للاستمرار، للأمان، للعطاء اللي مبيخلصش. وهي واقفة في مكانها، بتشوف أجيال بتكبر وتتغير، ناس بتيجي وناس بتمشي، لكن هي بتفضل ثابتة، بتدي ظل وسكن للكل. الأطفال بيتسلقوها ويلعبوا حواليها، العصافير تبني أعشاشها جواها، حتى العجائز بيستريحوا تحتها ويفكروا في أيامهم اللي فاتت.

كمان، الشجرة مش بس بتعيش الزمن، دي بتصنعه. الشجرة اللي بتتزرع النهاردة، ممكن تفضل واقفة مئات السنين، تبقى شاهد على حكايات ناس وأماكن، تكون ملجأ للحب، أو حتى ذكرى حزينة. أوراقها بتقع في الخريف علشان تطلع غيرها في الربيع، وده بيدينا درس مهم: كل نهاية وراها بداية جديدة.

ولو فكرنا فيها، هنلاقي إننا في حياتنا شبه الشجرة. بنزرع مواقف، بنرمي بذور قراراتنا، بنكبر مع الأيام، وكل مرحلة في حياتنا بتسيب أثر زي حلقات الجذع اللي بتفضل محفورة مع الزمن.

الشجرة مش مجرد آلة زمن، الشجرة درس كبير في الحياة... والاستمرار.

ماذا لو كان للشجر مخاضًا؟

#إدارة_نباتية 

تخيل لو إن الشجر، بدل ما يطرح ورقه بهدوء أو يرمي بذوره عادي، كان بيعدي بمخاض زي البني آدمين! تخيل الشجرة وهي بتتلوى وأغصانها بتتهز من الألم، والجذع بيترعش وهي بتولد ثمرة جديدة أو فرع جديد!

كان زماننا بنسمع صراخ الشجر في الغابات، وكان الربيع يبقى موسم ولادة مؤلم بدل ما يكون موسم الجمال والتجدد. تخيل إن الفلاحين بدل ما يستنوا مواسم الحصاد براحة، كانوا بيتحملوا أصوات الشجر وهو بيولد، ويمكن كنا هنلاقي شجرة تانية بتطبطب على اللي جنبها وتواسيها!

ولو كان للشجر مخاض، كان ممكن يبقى عنده أمومة؟ الشجرة اللي ولدت تفاحة، هل كانت هتفضل حزينة لما تقع من عليها؟ ولو فرعها تكسر، هل كانت هتحس بيه كأنه ابنها اللي راح؟ يمكن كنا هنلاقي أشجار بتخاف تطرح من كتر الألم، وأشجار تانية بتستحمل عشان تعرف معنى الحياة اللي جوّاها.

بس يمكن كمان، لو الشجر كان عنده مخاض، كان البشر هيحسوا بيه أكتر. يمكن كنا هنقطع الخشب بحرص، ونقطف الثمار بإحساس، ونبص للأشجار مش بس كمصدر للأكل والظل، لكن ككائنات حية عندها مشاعر وأوجاع، حتى لو كانت مختلفة عننا.

الشجر بيعيش ويموت في صمت، بيطرح ويفقد أجزاء منه من غير صراخ أو دموع. يمكن ده تعبيره الخاص عن القوة والصبر، ودرس لينا إن الحياة بتكبر وتزدهر، حتى لو كان ده بيحصل بهدوء ومن غير ما نحس.

سياسات شجرية

#إدارة_نباتية 

الشجر، زي أي كائن حي، ليه سياسة خارجية بيتعامل بيها مع العالم اللي حواليه. صحيح مش بيقعدوا في مؤتمرات قمة ولا بيصدروا بيانات رسمية، بس عندهم طرقهم الخاصة في التفاعل، التحالف، والمنافسة مع جيرانهم، سواء كانوا شجر تاني، بشر، أو حتى عوامل طبيعية زي الريح والمطر.

كل شجرة عندها حدودها الإقليمية، اللي هي جذورها وفروعها. الجذور بتمتد تحت الأرض علشان تمتص المياه والمعادن، وفي نفس الوقت بتتحارب مع جذور الأشجار التانية لو دخلت في نطاقها. الأشجار الكبيرة بتفرض سيادتها بظلها، تمنع الشمس عن النباتات الأصغر، وكأنها بتقول: "ده مجالي الجوي، ممنوع الاقتراب أو التصوير!"

مش كل حاجة صراع، بعض الأشجار بتكوّن تحالفات ذكية. مثلاً، في الغابات، الشجر بيتواصل تحت الأرض عن طريق الفطريات اللي بتربط جذورهم ببعض في شبكة أشبه بالإنترنت الطبيعي، بيتبادلوا فيها المغذيات والمعلومات، وكأنهم عندهم وزارة خارجية شغالة طول الوقت!

الأشجار مش سايبين نفسهم لأي خطر يهددهم. في شجر بيطلع مواد كيميائية لما يحس بالخطر علشان يحذر جيرانه، زي الأكاسيا اللي لما تحس إنها بتتاكل، بتبعت إشارات كيميائية تخلي الأشجار اللي حواليها تفرز مواد مرة علشان تحمي نفسها. ده غير إن بعض الأشجار بيكون عندها أشواك أو لحاء سميك يحميها من الهجمات.

زي ما في دول بتحب توسّع نفوذها، بعض الأشجار عندها نفس الفكرة! في أنواع بتنتشر بسرعة وبتسيطر على المساحات اللي حواليها، زي شجر الصفصاف اللي جذوره بتتمدد بسرعة، أو شجر الكافور اللي بيسيطر على الموارد المائية بقوة. ممكن تقول إنهم عندهم استراتيجية "السيطرة على الموارد" زي بعض الدول العظمى.

الشجر عنده نظام اقتصادي بردو، بيقدم خدمات مقابل حاجات تانية. زي مثلاً إنه بيدي ظل وسكن للطيور، وفي المقابل الطيور بتساعد في نشر بذوره. أو النحل اللي بياخد الرحيق وبيساعد في التلقيح، في علاقة أشبه بالتجارة الحرة بين الدول!

السياسة الخارجية للشجر معقدة أكتر مما كنا نتخيل، فيها دبلوماسية، تحالفات، صراعات، وحروب باردة.

الفوسفور ... جوهر الحياة و عادمها

#إدارة_نباتية 

الفوسفور، سواء كان عضوي أو غير عضوي، عنصر أساسي في حياة النبات، لأنه المسؤول عن العمليات الحيوية اللي بتساعده على النمو وإنتاج البذور والثمار. لكن الشجرة مش بتمتص الفوسفور وخلاص، هي عندها نظام إدارة دقيق بيحدد استخدامه وتوزيعه حسب احتياجاتها في كل مرحلة من مراحل حياتها.

في بداية حياتها، بتركّز الشجرة على توجيه الفوسفور للجذور، لأنها الأساس اللي هيمدها بالمياه والعناصر الغذائية من التربة. بعد ما الجذور تبقى قوية، الشجرة بتبدأ تحوّل الفوسفور للأوراق، لأنها المصدر الرئيسي للطاقة من خلال عملية التمثيل الضوئي. ومع دخولها مرحلة الإزهار والإثمار، الأولويات بتتغير، وبتبدأ توجّه الفوسفور للأزهار والثمار عشان تضمن إنتاج محصول صحي بجودة عالية.

لكن المشكلة بتحصل لما يكون فيه خلل في كمية الفوسفور اللي بتوصل للشجرة. لو الفوسفور قليل، الثمار بتكون صغيرة وحامضة، ولو زاد عن الحد، الشجرة بتفقد توازنها، فتركّز على تمديد الجذور والسيقان بشكل مفرط على حساب الأزهار والثمار، فتبان قوية وكبيرة، لكن إنتاجها ضعيف.

رغم إن الفوسفور ضروري للحياة، إلا إن زيادته عن الحد المسموح ممكن تضر الشجرة بدل ما تفيدها. لما يكون موجود بكمية كبيرة في التربة، بيقلّل امتصاص الشجرة لعناصر غذائية تانية زي الزنك والحديد، فحتى لو كانت التربة غنية، النبات بيعاني من أعراض نقص. ولو تراكم الفوسفور بشكل مفرط، ممكن يسبب تسمم للتربة نفسها، ويحوّلها لبيئة غير صالحة للنمو، وده مع الوقت ممكن يضعف الشجرة أو حتى يؤدي لموتها.

الشجرة بتعلمنا دروس مهمة في التخطيط، التوازن، واستغلال الموارد بحكمة. النجاح مش في الحصول على الموارد الكتيرة، لكن في إدارتها بشكل صحيح حسب الاحتياج. زي ما الشجرة بتغير توزيع الفوسفور حسب المرحلة اللي بتمر بيها، إحنا كمان لازم نكون عندنا مرونة في تحديد أولوياتنا في كل مرحلة من حياتنا. وأهم درس هو إن التوازن هو المفتاح، لأن أي إفراط أو تفريط ممكن يخلّ بالنظام كله، سواء كان في الطبيعة أو في حياتنا اليومية.

الفروع لا ترث الشجره

#إدارة_نباتية 

لو بصينا للشجرة من بعيد، بنظرة مختلفة شوية، هنلاقي أن الشجرة مش بتسمح لأي فرع ضعيف يفضل متعلق بيها لو كبر و أصبح ثقيلا. 

الفرع الضعيف يفضل ماسك في الساق القوية، يستند عليها، ويتغذى منها، لكنه يفضل فرع، مجرد امتداد ضعيف مش قادر يستقل. الشجرة تسنده طالما مازال ضعيف، توفر له الغذاء والماء، لكن لو بدأ يقوى أو يتقل لدرجة إنه يهدد توازنها، هنا بتاخد قرارها.

لو الفرع بقى قوي، بس مش جزء حقيقي منها، مش نابِع منها، الشجرة بتكسره وتبعده. مش بدافع القسوة، لكن بدافع الحماية.. حماية نفسها منه، وحمايته من وهم الارتباط اللي مش هيعيش للأبد. 

أما لو الفرع ده بقى ساق جديدة، امتداد حقيقي للشجرة، هنا المعادلة بتختلف.. الشجرة بتدعمه، تقاسمه المغذيات والماء، تحضنه لحد ما ياخد مكانه الطبيعي، يمكن حتى يحل محل الساق القديمة لما تيجي اللحظة المناسبة.

دي سنة الحياة، سواء في الطبيعة أو في العلاقات. مفيش حاجة بتفضل متعلقة بحاجة تانية للأبد. يا إما تبقى امتداد حقيقي، يا إما تستقل بنفسك وتبني جذورك بعيدًا، لأن التعلق وحده مش كفاية عشان تفضل موجود.

الطبيعة لا تعترف بالوراثة، فقط بالقوة والانتماء الحقيقي. الفرع إما أن يصبح ساقًا، أو يسقط، لأن الشجرة لا تترك إرثًا لفروعها.