#الزواج_السليم_الزواج_السعيد
السؤال اللي هبدأ به هنا: هل الست تحب تعيش مع راجل عالم و لا راجل عابد؟
الناس فاكرة إن العلم بيحمي البيوت. وإن اللي فاهم ودارس وعنده شهادات، أكيد بيعرف يعيش ويحب ويصون اللي حواليه. بس الحقيقة؟ بيت العالم ساعات بيقع أسرع من بيت العابد.
ليه؟ علشان العالم بيقع في أمراض صعبة: زي التنافسية، الغرور، حب إثبات النفس، حب السيطرة، الإحساس إنه دائمًا "أفهم من اللي حواليه"، وإن رأيه هو الصح ومفيش حد زيه. وده بيدمر البيت من غير ما يحس.
العالم ممكن يقعد يفصّل مشاعر اللي حواليه تحت الميكروسكوب، يحلل الكلمة، ويشوف الغلط، بس ينسى يطبطب. ينسى يقول "أنا آسف"، "أنا مشغول بس سامعك"، "أنا تعبان بس بحبك".
العالم ممكن يكون شايف الكون، بس مش شايف مراته، مش شايف عياله، مش شايف بيته.
أما العابد، حتى لو مش دارس كتير، قلبه لين، خاشع، متواضع. عارف يعني إيه يسمع، يعني إيه يشارك، يعني إيه يسامح. بيت العابد بيقف على أساس الرحمة، مش على أساس المعرفة. وده اللي بيخليه يعيش.
البيوت ما بتقفش بالعقول، بتقف بالقلوب. والعقل من غير قلب، يبني عمارة مافيهاش روح. العلم نعمة، بس لو دخل البيت من غير تواضع، بيقلب نقمة.
علشان كده، العالم اللي مش بيعالج نفسه من الغرور، بيته بيقع قبل أي حد تاني... حتى قبل العابد البسيط اللي بيحب من غير ما يتفلسف.
ليست هناك تعليقات:
إرسال تعليق