سلسلة مقالات: لما كنت موظف، ولما بقيت مدير، و لما بقيت صاحب شغل
#لما_كنت_موظف #التحفيز_والإلهام #التحفيز_من_الآخرين
فاكر الفترة دي كويس… كنت بمر بوقت صعب، ضغط شغل فوق العادة، وتعب نفسي مش قادر أتكلم عنه. كل يوم كنت باجي الشغل وأنا مكسور من جوا، بس لابس وش القوة علشان الناس ما تاخدش بالها. كنت بشتغل، بس قلبي مش في المكان… دماغي مش صاحية، وكل حاجة حاسسها تقيلة.
و في يوم، مديري طلب يقعد معايا. مكنتش متوقع إيه اللي هيقوله، بس هو قال جملة واحدة فرقت معايا جدًا: "أنا واخد بالي منك… وإنت واحد من الناس اللي بنعتمد عليهم، فلو تعبان أو محتاج حاجة، إحنا معاك."
الكلام ده جه في وقته… جه زي نقطة نور وسط عتمة كانت محاوطاني. مكنش دعم مادي، ولا تساهل في الشغل، لأ… كان دعم معنوي حقيقي، من بني آدم حاسس بموظف مش شايف نفسه وقتها.
الكلام ده رجعني. خلاني أقف على رجلي من تاني، وأفتكر إن حتى لو الدنيا ماشية بسرعة، في ناس بتشوفك… بتقدرك… وبتسندك من غير ما تطلب.
الدعم المعنوي من مديرك مش رفاهية، ده فرق ما بين موظف بيتكسر، وموظف بيرجع أقوى من الأول. ومن اليوم ده، بقيت مش بس بشوف مديري كقائد، لكن كإنسان… وبيّن لي إن القيادة مش بس قرارات، القيادة كمان قلب بيشوف، وضمير بيحتوي.
المقالات هتنزل على صفحتي في لينكدان
https://www.linkedin.com/in/amr-elnashar/
و على صفحتي في الفيسبوك
https://www.facebook.com/amr.adel.elnashar
و كمان هتكون موجوده في البلوج الشخصي
ليست هناك تعليقات:
إرسال تعليق