الموضوع عند الشجر مش حياة وموت

#إدارة_نباتية 

الشجر ماشي في الدنيا بمبدأ بسيط: أنا مش ضد الحياة، أنا جزء منها. عُمره ما فكر يثبت نفسه، ولا فكر يكسب حاجة، ولا حتى خاف يخسر. 

الشجر بيكبر في سكوته، ما بيسألش هو أحسن من مين، ولا بيفكر الناس شايفاه إزاي. ورقه بيقع؟ عادي. حد قطع فرع منه؟ بيكمل. الدنيا برد؟ بينام. الدنيا حر؟ بيتنفس أكتر. 

الشجرة مش بتقاوم… بس مش ضعيفة، هي مرنة، عارفة إمتى تتنازل، وإمتى تقف، وإمتى تسيب الحاجة تمشي لوحدها. لما المطر يطول، ما تقولش كفاية، ولما الشمس تغيب، ما تشتكيش، كل حاجة عندها بتحصل في وقتها، ومن غير ما تحاول تسرّع ولا تبطّأ. 

مش زيّنا… إحنا اللي دائمًا في سباق: ننجح، نبان، نكسب، نغيّر، نثبت، ننتقم. 

لكن الشجر؟ عارف إن اللي يعيش يوم بالراحه… أحسن من اللي يعيش سنين لالحرب. 

الشجر بيقول بصوت هادئ: متاخدش كل حاجة على أعصابك، اللي رايح هيرجع، واللي ضاع مش لازم كان ليك، وكل حاجة، مهما كانت وحشة، هتعدي. 

الموضوع عنده مش حياة وموت… الموضوع حياة، بس من غير مقاومة، ومن غير استهلاك، ومن غير ما يبقى عايش عشان يثبت إنه عايش.