الصاحب ساحب

#طريقتي_في_تربية_أولادي

بصي يا حبيبتي، أنا عايزك تفهمي إن الصحوبية مش هزار، ومش كل حد يضحكلك يبقى صاحبك. الصحاب ليهم تأثير كبير علينا، من غير ما نحس. ومين اللي نسمح له يدخل حياتنا، ده اختيار مهم جدًا.

هتقابلي ناس كتير، هتحبي فيهم الضحك والخروج والونس، بس مش كلهم هيفضلوا. اللي هيكمل معاكي هما اللي هتفتحي لهم قلبك وتديهم مكان جواكي. وعلشان كده، لازم تكوني واخدة بالك، مش أي حد يستاهل القرب.

ومفيش حد كامل، كل واحد فينا عنده حاجة حلوة وحاجة لأ. حتى إنتي، عندك عيوب، زيي وزي كل الناس. فلو كل مرة شفتي في صاحبتك حاجة مش عاجباكي وقررتي تسيبيها، عمرك ما هتحتفظي بصاحبة حقيقية.

خلي بالك إن العيب اللي بيضايقك في صاحبتك، الناس ممكن تشوفه فيكي إنتي كمان، لأن اللي بيننا وبين بعض، بيبان علينا، واللي حوالينا بيشوفوا وبيحكموا.

الصحوبية مش إننا نرفض العيب، لكن إننا نتعامل معاه، ونعدّيه، وننصح بهدوء، من غير ما نجرّح، ولا نبني حواجز.

لو كل واحدة فضلت تبص لعيوب التانية، عمرهم ما هيبقوا أصحاب، والدور هييجي عليك، وهيتبصلك بنفس العين.

خليكي دائما اختياراتك نضيفة، اللي قلبها صافي، وكلامها يطمن، واللي وقت الزنقة تلاقيها، مش تختفي.

بس أوعي تغلطي وتدي فرصة لناس طبعهم مؤذي. في ناس العيب في أصلهم، ومهما حاولتي، مش هيتغيروا. والناس دي وجودهم حواليكي خطر، لأنهم بيشدوا لتحت، وإنتي تستاهلي اللي يرفعك لفوق.

اختاري اللي يشجعك، ويحترمك، ولو غلطتي يعدّلك، مش يفضحك. وخدي بالك، اللي يدخل حياتك قرارك، بس اللي تسيبيه يكمل فيها، دي مسؤوليتك.

أنا مش بقولك تخافي من الناس، ولا تبعدي عنهم، بس عايزك تشوفيهم على حقيقتهم، وتفهميهم، وتختاري بحكمة. علشان دائما… الصاحب ساحب.