الكل بيظهر مع اللي بيكمله… وبيتجوز اللي يريحه ... الكلام بين الألفا و البيتا

 

#الزواج_السليم_الزواج_السعيد 

الراجل الألفا، هو اللي بيحب الظهور، القوة، والهيبة، غالبا بيختار يبان قدام الناس مع بنت زيه… بنت ألفا، علشان الاتنين لما يمشوا جنب بعض، الأضواء بتشد، قوتهم بتبان، حضورهم بيفرض نفسه، ويبقوا زي اتنين بيعزفوا سولو على نفس المسرح… كل واحد نجم، بس مع بعض بيعملوا فرقعة.

بس لما الألفا الراجل ييجي يقول جواز، بيبعد عن البنت الألفا، علشان بيخاف من فكرة إنها ممكن تنشغل عنه، تسبقه، تحقق نجاحات تخليه يحس إنه بقى رقم اتنين في حياتها، فـبيتجوز البنت البيتا، اللي هادية، بتدور عليه، وبتشوفه دائما محور وجودها، علشان يضمن إنه مش هيتهمش، وإنه هيبقى دائما الأول في ترتيبها.

الراجل البيتا، اللي بطبعه حساس، ساكت، مش بتاع شد وجذب، هو كمان ما بيخترش بنت ألفا لا في الظهور ولا في الجواز، يحب يبان مع بنت بيتا زيه، علشان ما يبنش إنه ضعيف، وعلشان يحس إن فيه فرق بينه وبينها يخليه الراجل اللي بيحمي وبيقرر، بيتجوزها كمان علشان يعرف يحبها بهدوء، وهي تطبطب عليه، تراعيه من غير ما تحكم، وتسيبه يكون على راحته.

البنت البيتا، دي بتتبسط لما تمشي جنب راجل ألفا، تحس إنها في حضن الأضواء، وإنها محمية، بس قلبها بيخاف، بتخاف من علاقاته، من انشغاله، من إن دائما فيه ستات حواليه، فـلما تفكر في الجواز، تختار راجل بيتا، علشان تقدر تبقى مطمنة، وعارفة إن هو ليها هي وبس، من غير منافسة، ولا قلق، ولا ظن.

أما البنت الألفا، اللي ناجحة، وقوية، وحاضرة في أي مكان، بتحب تمشي جنب راجل ألفا، تحس إنهم فريق، إن مافيش حد بيشد التاني لتحت، وإنهم بيكبروا سوا في عين الناس، لكن لما تدخل البيت، بتدور على السلام، مش عايزة دوشة، ولا صراع، ولا شد كل يوم، عاوزة تبقى قوية برا، بس في حضن هادي جوا، علشان كده، بتتجوز راجل بيتا، يسيب لها المساحة تتنفس، ويديها الأمان اللي يخليها تنزل سلاحها.

الكل بيحب يبان مع حد يكمله، لكن لما ييجي يختار يعيش، يختار حد يريّحه، الظهور حاجة… والجواز حاجة تانية خالص.