حاذقة أم حازئة

#الزواج_السليم_الزواج_السعيد 

في الجواز ،الموضوع مش بس طيبة ولا عصبية، ده أعمق من كده بكتير، في بيوت كتير ممكن تلاقي الحب موجود بس الراحة مش موجودة.

اللي بيصنع الفرق مش المشاعر بس، لكن كمان الطريقة اللي بنتعامل بيها مع بعض، في الجواز طريقة الست في التعبير عن نفسها والتعامل مع جوزها بتفرق كتير، وهنا بييجي الفرق بين الزوجة الحاذقة والزوجة الحازئة، فرق بسيط في الكلمة، بس كبير جدًا في المعنى وفي اللي ممكن يحصل في البيت بسببها.

الزوجة الحاذقة عندها دماغ وهدوء، بتعرف تقول إمتى وتسكت إمتى، مش بتطنش و مش بتفور من أول حاجة، بتختار كلامها وبتحاول تحافظ على جو البيت هادئ ومحترم، لو في مشكلة بتمشيها بحكمة من غير ما تكبرها. 

الست الحاذقة بتفهم جوزها وبتحس بيه وبتكون جنبه في الحلو قبل الوحش، بتشاركه الحمل من غير ما تحمّله زيادة، بتحافظ على كرامتها وكرامته وبتعرف إن فيه لحظات لازم تسند مش تعاتب.

أما الزوجة الحازئة فهي دائمًا في حالة ضغط، بتطلع اللي جواها من غير تفكير، ممكن تكون عندها حق بس طريقتها مؤذية، بترمي كلام يوجع وتفضل تلوم وتعاتب وتنتقد، مش بتختار وقت الكلام ولا طريقته، وده بيخلي جوزها يحس إنه متهم أو مش كفاية، وده مش معناه إنها تسكت وتكتم جواها، لأ طبعا، لازم تتكلم وتعبر عن نفسها، بس فيه فرق بين التعبير والانفجار.

الزوجة الحاذقة بتتكلم بالعقل والهدوء، بتقول اللي مزعلها من غير ما تجرح، وبتفكر في حل مش في انتقام.

كل حاجة في الدنيا محتاجة توازن، الست مش لازم تبقى ملاك ساكت ولا بركان بينفجر، محتاجة تبقى واعية، تعرف تتكلم إمتى وإزاي، وتفهم نفسها قبل ما تطلب من اللي حواليها يفهموها.