سلسلة مقالات: لما كنت موظف، ولما بقيت مدير، و لما بقيت صاحب شغل
#لما_كنت_موظف #التخطيط_والتنظيم #إدارة_الوقت
زمان كنت فاكر إن السر في إنك تشتغل كتير. بس مع الوقت اكتشفت إن الشغل الكتير من غير تنظيم بيبوّظ أكتر ما بيبني. كنت بصحى الصبح عندي مليون حاجة، وكل حاجة شكلها مستعجله، وكل ما أبدأ في واحدة ألاقي نفسي سرحت في التانية، وفي آخر اليوم أرجع البيت متبهدل من التعب، ومش راضي عن النتيجة.
ساعتها قررت أغيّر الطريقة. جربت كذا حاجة، لكن فيه استراتيجية واحدة فرقت معايا بجد، وبقيت جزء من روتيني اليومي: قاعدة الـ 3 أولويات.
كنت أول ما أوصل الشغل، أفتح النوتة بتاعتي، وأكتب ٣ حاجات بس:
أهم تلات حاجات لازم أخلصهم النهاردة. مش أكتر، ومش أقل. مهما كانت الحاجات اللي حواليا، دول أولويتي… لو خلّصتهم، يبقى يومي ناجح.
بعدهم، بقيت أرتب الحاجات التانية على حسب الاستعجال والأهمية. واللي يقدر يستنى، يستنى. ولو في حاجة ينفع أديها لحد يساعدني فيها، كنت بطلب من زمايلي، وبردّها لما يحتاجوا مني نفس الحاجة.
كمان استخدمت تايمر، كنت بشتغل ٤٥ دقيقة مركز، وبعدين آخد بريك أهوّن بيه على نفسي، وأرجع أكمل.
النتيجة؟ بقيت منظم أكتر، مرتاح أكتر، وحتى تركيزي زاد. لإني بقيت أعرف إمتى أشتغل، وإمتى أرتاح، وإمتى أقول لأ.
الاستراتيجية دي علمتني إني مش لازم أعمل كل حاجة… لكن لازم أعمل الحاجات الصح، في الوقت الصح، بالطريقة الصح.
المقالات هتنزل على صفحتي في لينكدان
https://www.linkedin.com/in/amr-elnashar/
و على صفحتي في الفيسبوك
https://www.facebook.com/amr.adel.elnashar
و كمان هتكون موجوده في البلوج الشخصي
ليست هناك تعليقات:
إرسال تعليق