سلسلة مقالات: لما كنت موظف، ولما بقيت مدير، و لما بقيت صاحب شغل
#لما_كنت_موظف #النمو_المهني #التطور_الشخصي
طول عمري، شايف إن الخبرة حاجة بتتجمع بشقّ الأنفس… بتاخدها من تعبك، من غلاسة المواقف، ومن أخطاءك قبل نجاحاتك. وكنت مقتنع إن اللي يوصل لحاجة، لازم يمدّ إيده للي لسه بيبدأ.
في وقت من الأوقات، لقيت زميل جديد محتار، مش عارف يبتدي منين، وكل ما يسأل حد يدوّروه أو يجاوبوه بنص كلمة. ساعتها قررت… قلتله: تعالى، أنا هشرح لك اللي أعرفه، خطوة خطوة.
وبدأت أشارك خبرتي، من غير خوف إن حد ياخد مكاني، ومن غير تعالي. كنت بدي من قلبي، وبافتكر وقت ما أنا كنت محتاج حد يشرح لي، ومكنتش بلاقي.
ومع الوقت، الموضوع ما بقاش زميل واحد… بقى أكتر من حد بييجي ياخد من خبرتي، وأنا بقيت بستمتع بده. بقيت بحس إنّي مش بس بنجح في شغلي، أنا كمان بساعد غيري ينجح، وده نوع أعمق من النجاح.
المعرفة لو فضلت جواك متكتفة، ما تسواش حاجة. لكن لما تطلع وتساعد حد تاني يثبت نفسه، ساعتها بتحس إنك بنيت حاجة حقيقية حوالين نفسك.
اللي تعلمته؟ إن العطاء مش بينقصك… بالعكس، بيزودك. وإن اللي بيكبر لوحده، بيبقى أضعف من اللي بيكبر ومعاه رصيد قوي.
المقالات هتنزل على صفحتي في لينكدان
https://www.linkedin.com/in/amr-elnashar/
و على صفحتي في الفيسبوك
https://www.facebook.com/amr.adel.elnashar
و كمان هتكون موجوده في البلوج الشخصي
ليست هناك تعليقات:
إرسال تعليق