#شغل_سرطان
عارف السرطان؟ دا مش مجرد مرض، دي خلية من جسمك قررت تتمرّد. قالت: ليه أموت؟ ليه أمشي؟ ما أنا لسه أقدر أعيش!
نسيت إن في نظام، وإن في وقت، وإن في حكمة اسمها التجدد و الموت الصحي للخلايا.
الخلية دي بطلت تسمع أوامر الجسم، فضلت تنقسم وتنقسم، وتاخد أكتر من حقها، تخنق الخلايا اللي حواليها، تستهلك طاقة مش من حقها، تبوظ كل حاجة… علشان بس تعيش شوية كمان.
بس تعيش لمين؟ هي ما بتساعدش، ما بتشتغلش، هي بس موجودة… ومؤذية.
السرطان بيدور على الخلود، بس مش الخلود الجميل اللي فيه أثر، ده بيدور على بقاء غشيم، بقاء أناني، بقاء جبان بيهرب من الموت بأي تمن.
بس تعالى نسأل السؤال اللي بيوجع: تفتكر الخلايا اللي رفضت تموت، هتفضل عايشة لما الجسم كله يموت؟
طبعا لأ. هتموت برضه.
كل اللي كانت بتحاول تهرب منه، هيوصلها. بس بعد ما تدمر وتنهك وتخلص كل حاجة حواليها.
السرطان ما بينتصرش. هو بيموت وهو بيقتل. وبيفتكر إنه كده خالد… بس هو كده هيفضل غرقان في وهم الخلود.
و يبقى الأمل ...
ليست هناك تعليقات:
إرسال تعليق