الشجر بيقاوم الرياح

#إدارة_نباتية 

عارف الشجرة اللي واقفة في وش الريح؟ طول عمرها واقفة، ساكتة، بس مش ضعيفة. كل ريح بتهزها، بس ما بتقعش. بتميل أوقات، بتخسر شوية ورق، بس جذورها ثابتة في الأرض، متمسكة بأساسها.

الشجرة مش بتقاوم الرياح، هي بتتعامل معاها، تميل شوية، وبعدين ترجع تقف. يمكن الرياح تهدئ، يمكن تغيّر إتجاهها، لكن الشجرة... بتفضل واقفة.

اللي بيقوي الشجرة مش طولها، ولا فروعها، ولا عدد أوراقها... اللي بيقويها الخشب اللي جواها، اللي ماسكها و مخليها أكثر قوة و كمان في الجذر اللي تحت الأرض، اللي مش باين، بس هو اللي شايلها.

وإحنا؟ إحنا زي الشجر. في وش المشاكل، الضغوط، الكلام الكتير، اللي بيشدنا يمين وشمال. لو فضلنا نحارب في كل حاجة، هننكسر. لكن لو اتعلمنا نميل، نهدئ، نفكر، ونعرف إننا لينا جذوع و جذور... هنرجع نقف تاني.

الحقيقة إن القوة ساعات تبان في الهدوء، في التماسك، في الصبر. زي الشجرة اللي بتعدّي العاصفة، وتفضل تثمر بعد كده، كأنها بتقول: أنا لسه هنا... ولسه قادرة أعيش.

كل مرة الرياح تعصف بيك، افتكر الشجرة. افتكر إنك تقدر تميل... بس ما تتكسرش أبدا.