سلسلة مقالات: لما كنت موظف، ولما بقيت مدير، و لما بقيت صاحب شغل
#لما_كنت_موظف #الإدارة_والقيادة #الإدارة_والتنظيم
لما كنت موظف، اشتغلت مع مدرين كتير، وكل واحد كان له طريقة في الشغل. بس أكتر حاجة كنت بحس بفرقها فعلًا هي "الوضوح". المدير اللي بيوضح المطلوب من الأول، بيخلي الدنيا أبسط وأهدئ، وبيوفر وقت ومجهود على الفريق كله.
فاكر مرة اشتغلنا على مشروع مع مدير جديد، كان بيشرح المطلوب بطريقة بسيطة ومباشرة، وبيأكد علينا نسأله لو في أي نقطة مش واضحة. صدقني، الشغل وقتها كان ماشي زي الساعة، وكل واحد عارف دوره بيعمل إيه، من غير لخبطة أو تخمين.
على العكس، لما كنت أشتغل مع مدير بيقول الكلام نصه ويفترض إننا هنفهم الباقي، كنا بندخل في متاهات. كل واحد يفهم حاجة، ونعيد في الشغل تاني وتالت، ونتخانق ونضيع وقت على الفاضي.
الوضوح مش ضعف، بالعكس ده قوة بتخلي الفريق يحترم القائد ويشتغل بأمان وراحة. بتقلل التوتر، وبتمنع إن الناس ترمي اللوم على بعض. وبيخلي الفريق يتعلم من بعض، لأن كله فاهم وبيتحرك في نفس الاتجاه.
اللي اتعلمته من التجربة دي، إنك لما تبقى واضح في كلامك وتوجيهاتك، بتبني ثقة، وبتخلي الشغل يتحول من واجب مرهق لفكرة مشتركة الناس كلها حابة تنجحها، و دا إللي خلاني بعد كدا أكون واضح مع أي طلب بطلبه.
المقالات هتنزل على صفحتي في لينكدان
https://www.linkedin.com/in/amr-elnashar/
و على صفحتي في الفيسبوك
https://www.facebook.com/amr.adel.elnashar
و كمان هتكون موجوده في البلوج الشخصي
https://amradelelnashar.blogspot.com/
ليست هناك تعليقات:
إرسال تعليق