سلسلة مقالات: لما كنت موظف، ولما بقيت مدير، و لما بقيت صاحب شغل
#لما_كنت_موظف #النمو_المهني #التطور_الشخصي
فاكر اليوم ده كويس جدًا. كان في شغل كتير ومفيش وقت نضيعه، والمدير فجأة طلب مني أشرح حاجة لفريق تاني. الموضوع مكنش بسيط، والشرح لعبتي، بس كنت بحب أشتغل في الخلفية ومرتاح بعيد عن الكلام الكتير.
لكن اليوم ده… قررت أواجه. مسكت ورقة وقلم، رتبت أفكاري، ورحت وقفت قدام الفريق وشرحت. كنت متوتر، بس مركز. وكل ما بلاقي حد منهم بيفهم وبيهز راسه، كنت بحس بثقة بتكبر جوايا.
خلصت، وسمعت واحد قال: شرحك كان واضح جدًا، ساعتها حسّيت إني مش بس عدّيت التحدي، لأ… دي كانت لحظة اكتسبت فيها مهارة حقيقية: إني أعرف أوصل المعلومة ببساطة.
ومن اليوم ده، بقيت باخد فرص زي دي، وأطلبها كمان. بقيت بثق في صوتي، وطريقتي، وبقيت بعرف أشرح للناس وأأثر فيهم.
المهارات مش دائما بتتعلمها من كورسات، ساعات بتتولد في لحظة… لحظة جُرأة، لحظة تحدي، لحظة تقول فيها لنفسك أنا هاجرب. واللي يجرب، بيتعلم.
المقالات هتنزل على صفحتي في لينكدان
https://www.linkedin.com/in/amr-elnashar/
و على صفحتي في الفيسبوك
https://www.facebook.com/amr.adel.elnashar
و كمان هتكون موجوده في البلوج الشخصي
ليست هناك تعليقات:
إرسال تعليق