عمرو عادل النشار

و على صفحتي في الفيسبوك

و كمان هتكون موجوده في البلوج الشخصي

الأحد، 18 مايو 2025

أنا عارف إنك عارف إني عارف، بس عامل نفسي مش عارف...

#طريقتي_في_تربية_أولادي

تربية الأولاد عمرها ما كانت وصفة جاهزة، ولا مشوار مرسوم بخط مستقيم. هي رحلة طويلة، فيها أيام بنحس إننا بننجح، وأيام تانية بنشك في كل حاجة عملناها. وكل ما الولد يكبر، بنكتشف إننا مش بس بنعلمه، لأ، إحنا كمان بنتعلم. بنتعلم إزاي نصبر، ونتفاهم، ونسيب له مساحة يغلط ويتعلم، من غير ما نسيبه لوحده.

أنا مش بربي ابني عشان بس يبقى مؤدب أو ينجح في المدرسة، لأ، أنا بربيه عشان يعرف يبص في عين الناس من غير خوف، وعشان يعرف يحس بنفسه من غير ما يتكبر، وعشان يعرف يحب من غير ما يخسر، و الأهم يعتذر من غير ما يتكسر.

أنا مش بقول له "ما تغلطش"، بالعكس أنا بسيبه يغلط وأنا شايفه، أو بمعنى تاني بعمل نفسي مش شايف، عشان يتعلم من غلطه وهو مطمئن إني في ضهره، مش واقف له على الواحدة. بسيبه يدوّر، يسأل، ويجرب. يمكن يقع، بس لما يقوم يبقى أقوى.

أنا عارف إنه ساعات بيخبّي، وساعات بيكدب، وساعات بيتهور. بس كمان أنا عارف إنه بيجرب يعرف هو مين، وعايز يحجز مكانه في الدنيا. وأنا دوري مش إني أحكم عليه، دوري أكون قدوته، يشوف فيا نفسه وهو بيكبر، ويطمن إنه حتى في لحظة ضعفه، لسه محبوب.

أنا كمان بسيبه يشوفني وأنا بغلط، وأنا بعتذر، وأنا بتعب، عشان يعرف إن الرجولة مش صوت عالي ولا قرارات حاسمة. الرجولة مواقف و تجارب، وكرامة بتترد في الوقت الصح.

أنا بربي إبني وهو كمان بيربيني. بيعلمني الصبر، والشجاعة، وبيخليني أرجع أشوف الدنيا من أول وجديد.

و في يوم لما يقولي "بابا، أنا عارف إنك كنت عارف"، هبتسم، وهقوله: "أنا عارف إنك عارف إني كنت عارف، بس عملت نفسي مش عارف." و هطبطب عليه و أقول له "أنا بحبك، أنا فخور بك".

موقف مضحك حصل مع زملائي

سلسلة مقالات: لما كنت موظف، ولما بقيت مدير، و لما بقيت صاحب شغل

#لما_كنت_موظف #الخبرات_والمواقف_اليومية #القصص_والذكريات

في يوم من الأيام، كنا بنجهز لاجتماع مع الإدارة العليا، وكل واحد فينا كان مشدود على الآخر. اللبس كان رسمي، الورق مترتب، والبروجكتور متوصل ومستني العرض. وأنا كنت اللي هبدأ أول عرض تقديمي.

وقبل الاجتماع بـ10 دقايق، زميلي اللي دايمًا بيحب يهزر دخل المكتب وهو لابس بالطو المعمل بالمقلوب، وماسك كوباية قهوة ومش واخد باله خالص.

لما كلنا شفناه، حاولنا نكتم الضحك، بس مفيش فايدة. المكتب كله انفجر ضحك، وهو واقف بيقول: "إيه؟ هو في إيه؟" لحد ما بص في المراية وشاف الكارثة اللي هو فيها!

المضحك أكتر إن المدير دخل علينا في اللحظة دي، وشافنا بنضحك بالشكل ده، وبدل ما يضايق، ضحك معانا وقال: "واضح إن الجو عندكم ممتع، يلا بينا نبدأ الاجتماع بنفس الروح دي."

الموقف ده، رغم بساطته، فضل عايش في الذاكرة. حسّسنا إننا مش بس زمايل شغل، إحنا كمان بشر، بنضحك ونغلط ونتعلم ونكمل. الضحكة دي كسرت التوتر وخليت الاجتماع يمشي بسلاسة وروح إيجابية.

أوقات الشغل مش دايمًا لازم تبقى جد وضغط، المواقف دي هي اللي بتفضل محفورة في القلب، وهي اللي بتخلق فرق حقيقي بين شغل بنستحمله، وشغل بنحبه.

المقالات هتنزل على صفحتي في لينكدان

و على صفحتي في الفيسبوك

و كمان هتكون موجوده في البلوج الشخصي

السبت، 17 مايو 2025

عمى ألوان أم عمى معرفة

#شغل_صيدلي_جدا

كان يوم عادي في الصيدلية، والناس داخلة خارجة، لحد ما دخل دكتور شيك، بس باين عليه متوتر شوية. قرب منّي وسألني عن دواء معين، فلما جبتهوله، مسك العلبة وبص فيها باستغراب وقاللي:

"هو ده؟ لون العلبة إتغيّر!"

أنا استغربت وسألته: "إنت متأكد؟ هو نفس الاسم ونفس التركيز و نفس الشركة." رد عليّا وهو بيحاول يركّز في شكل العلبة: "أنا عندي عمى ألوان، فبفتكر العلبة من شكلها مش من لونها، بس دلوقتي حاسس إن فيه حاجة مختلفة!"

اللي لفت نظري بجد إنه رغم إنه عنده عمى ألوان، ومش قادر يفرّق بين الأحمر والأخضر و الأزرق و بيشوفهم كلهم رمادي، لكنه بيعتمد على تفاصيل تانية زي شكل الخط أو ترتيب الكلام أو حتى المربعات اللي على العلبة. وده خلاني أفكر قد إيه الناس دي بتتعامل مع تفاصيل إحنا ممكن ما ناخدش بالنا منها خالص.

لكن الصدمة الكبرى مش هنا...

الصدمة كانت لما خلّص وطلع من الصيدلية، لقيته راكن عربيته صف تاني، وعامل زحمة، والناس مش عارفة تعدي!

ساعتها بس وقفت وسألت نفسي:

"إزاي واحد عنده عمى ألوان بيسوق عربية؟!" يعني الإشارة بالنسباله شبه بعض، الأحمر أوالأخضر أو الأصفر كلهم درجات هو مش شايفها، طيب بيتصرف إزاي؟ وإزاي بيحكم على اللي قدامه وهو سايق لو أخذ فرملة؟ وإزاي ياخد قرار في لحظة على الطريق؟

الموقف ده فضل في دماغي طول اليوم، مش عشان خطره على الناس بس، لأ، عشان فكرة إن فيه ناس مش بتعترف إن عندها مشكلة، أو بتطنّش لأنها متعودة تتأقلم، لكن التأقلم مش معناه نعرّض نفسنا واللي حوالينا للخطر.

الوعي مش بس في إنك تعرف حالتك، الوعي الحقيقي إنك تفهم حدودك وتتصرّف على أساسها.

ومش لازم كل حاجة نعدّيها بـ"أنا كويس كده". فيه فرق كبير بين إنك تبقى شاطر في التكيّف، وإنك تكون خطر من غير ما تحس.

كيف كنت بتخطى إحساس الإرهاق اليومي؟

سلسلة مقالات: لما كنت موظف، ولما بقيت مدير، و لما بقيت صاحب شغل

#لما_كنت_موظف #الخبرات_والمواقف_اليومية #التحديات_اليومية

الإرهاق اليومي كان زي ضيف تقيل بييجي كل يوم من غير عزومة. ضغط الشغل، والمشاوير، والتفاصيل الصغيرة اللي ما بتخلصش، كلها كانت كفيلة تخليني أوصل آخر اليوم وأنا مش قادر أتنفس. بس الحقيقة، ما استسلمتش للإرهاق، لأن كنت مؤمن إن العطاء المستمر لازم يكون وراه عقل واعي وجسم سليم.

كنت ببدأ يومي بحاجة بسيطة بس فرقت معايا كتير: لحظة هدوء قبل الدوشة. كوباية قهوة على البلكونة أو وأنا سايق في طريقي، أراجع أولوياتي، وأفكر: "إيه أهم ٣ حاجات لازم أخلصهم النهاردة؟" الترتيب ده كان بيخليني أبدأ اليوم وأنا ماسك زمامه مش هو اللي سايقني.

ولما الإرهاق كان يوصل للذروة، كنت بقف. حرفيًا. أقوم من مكاني، أتمشى شوية، أغير جو، أسمع مزيكا، أكلم زميل بحبه، أو أفتح فيديو ظريف. الحاجات الصغيرة دي كانت بتعمل Reset للعقل وتفصلني ولو دقايق، بس كانت كافية تخليني أرجع أكمل بطاقة.

وبصراحة، كنت دايمًا بحط حدود واضحة بين الشغل وحياتي الشخصية. كنت باخد بريك آخر اليوم، أخرج، أتمشى، أروح السيما. كنت شايف إن راحتي مش رفاهية، دي وسيلة استمراري.

اللي كنت مؤمن بيه دايمًا إن الإرهاق مش علامة ضعف، لكن علامة إنك محتاج تبص على نفسك وتديها حقها. واللي يقدر يهتم بنفسه، يقدر يدّي أكتر في شغله من غير ما يتحرق.

المقالات هتنزل على صفحتي في لينكدان

و على صفحتي في الفيسبوك

و كمان هتكون موجوده في البلوج الشخصي

الجمعة، 16 مايو 2025

دور التحضير الجيد في تخطي صعوبات اليوم

سلسلة مقالات: لما كنت موظف، ولما بقيت مدير، و لما بقيت صاحب شغل

#لما_كنت_موظف #الخبرات_والمواقف_اليومية #التحديات_اليومية

من أكتر الحاجات اللي اتعلمتها وفضلت ماشية معايا طول مشواري، إنك تبدأ يومك بتحضير. مش التحضير اللي هو مجرد تعمل شاي وتقعد، لأ… أقصد تحضير بمعناه الحقيقي: أعرف عندك إيه، متوقع تقابل إيه، وإيه خطتك للتعامل مع اللي مش متوقع.

لما كنت موظف، الصبح عندي كان مقدس. أول حاجة بعملها، إني أراجع المهام اللي عندي، أرتب أولوياتي، وأحط لنفسي سيناريوهات ، لو حصل كذا، هتصرف إزاي؟. التحضير ده مش بيمنع المشاكل، لكن بيخليك جاهز ليها. بيدي للعقل مساحة للتفكير بدل ما تتفاجئ وتتوتر وتضيع وقت في رد الفعل.

فاكر يوم كان عندي عرض مهم أقدمه، وفجأة الكهرباء قطعت والباوربوينت راح. بس لأني كنت محضر نفسي إن ممكن ده يحصل، كنت طابع نسخة ورقية ومجهز نقاط رئيسية في دماغي، وكملت العرض من غير ما أتهز. الناس اللي حضروا قالوا لي بعد كده: تحس إنك كنت متوقع ده!، وفعلاً… كنت متوقع، بس مش قلقان، لأني محضر نفسي.

التحضير مش ضعف، ولا مضيعة وقت، دي قوة. دي خطة دفاع وهجوم في نفس الوقت. بتخليك ما تستناش الظروف تتحكم فيك، انت اللي بتقود يومك بإيدك، مهما كانت التحديات.

في الآخر، الشغل عمره ما هيبقى خالي من الضغط والمفاجآت، بس التحضير الجيد هو اللي بيفرق بين موظف بيتعب ويتوتر، وموظف بيعدي من فوق العقبات وكأنها مش موجودة.

المقالات هتنزل على صفحتي في لينكدان

و على صفحتي في الفيسبوك

و كمان هتكون موجوده في البلوج الشخصي