أسئلة أبوية جدا

مع كل صفة بعلمها لأولادي ببدأ أنا كمان أطبقها على نفسي و في حياتي و شغلي . طبعا الموضوع صعب و محتاح وقت لأن الطبع بيغلب التطبع . بس طبعا كتر المحاولة بتعلمنا نخطي و نتحرك

في أسئلة كثيره جدا مش بلاقيلها إجابات و مش عارف تأثيرها هيكون إيه مع الأولاد . زي مثلا إلى أي حد ستستقر شخصيتهم مع الوقت و مع المواقف و هل هيتصرفوا زي ما إتعلموا ولا البيئة هتفرض عليهم سلوك معين ؟ و إزاي نعمل حسابنا على الإستقرار أو التغير إللي هيحصل معاهم ؟ و إيه هي البيئة المناسبة إللي هيعيشوا فيها حياتهم الأسرية للحفاظ على شخصيتهم و كمان يسهل عليهم توريثها لأولادهم ؟

و هل طبعهم إللي إتربوا عليه هيقاوموه و يغيروه نتيجة إنفعالاتهم و الضغوطات اليومية عليهم ؟ و هل هيجي يوم و تكون أخلاقهم محط إختيار ؟ و لو حصل كدا هيختاروا إيه ؟

تيتة و الملوخية بالفراخ المحمرة

في وقت سابق، خرجت مع أولادي للتسوق و التسكع وسط المحلات فرأينا عددا كبيرا من الناس تتجمهر في مدخل المول، ذهبت زوجتي مسرعة يتبعها أولادي لترى لعلها تخرج بهدية أو كارت تخفيضات. النساء دائما يشغلون بالهم بالهدايا و العينات المجانية

الموضوع ظهر بأن الأسره عليها أن تتصور و هم بداخل حلة كبيرة من الأكل مكتوب عليها إسم المحل، محل تيتة، يقدم أشهى الطعام و يكون فيه الأب يمسك بملعقة كبيرة و يقلب أولاده النائمين داخل الحلة كأنهم طعام و تمسك الأم سكينا كبيرا و جذرة و بصلة و تقطعها على أولادها

المنظر شكله من الداخل كأن الأب و الأم يطبخون أولادهم داخل الحلة و لكن من الخارج ترى بقية المشهد، فتجد ماكتا خلف الحلة مكتوب عليه ستتذكر عندنا ما فاتك من الطعام و ستكون تجربتك لا تنسى

و للحصول على التجربة مجانا و تكسب عزومة للأسرة، على الأم أن ترفع الصورة على صفحة هذا المحل، ليقوم المحل بعمل قرعة فتكسب الأسرة التي جمعت أكثر اللايكات و الكومنتات

و بعد عدة أيام وقع الإختيار علينا، و يا للهنا سنأكل في مطعم، و سيكون الأكل على حساب المطعم. فجهزنا أنفسنا و خرجت زوجتي قبل الميعاد المنتظر بحوالي ساعتين و قالت أنها ستحضر لنا مفاجأة. لم تجهز زوجتي الإفطار في هذا اليوم حتى نشعر بالجوع الشديد فنستطيع أن نأكل ما لذ و ما طاب من المحل و خاصة أنه سيكون تحت التصوير لإذاعته لايف على الصفحة، فنكون فرجة و نحن نأكل كدليل على مصداقية المحل و على جمال الأكل المجاني

جلسنا على طاولة كبيرة، ذهبية و فاخرة و مبطنة بقماش أحمر فاقع اللون و عليها رخاما أسود مطعم بالذهبي. كأنك تاكل على طاولة لملك و ليس لعائلة تمنت أن تكسب وجبة مجانية

أنزلوا قائمة الطعام و مالت سيدة جميلة على أذن زوجتي و قالت شيئا لم أسمعه ثم أخذوا إختياراتنا و كتبوا كل ما قالته لهم زوجتي و أولادي و نظروا لي و قالوا ماذا ستطلب فإخترت ما حلا في عيني و شممته بأنفي و تخيلته في عقلي

و بعد ساعة تقريبا جاء طابور من الرجال يحملون الأكل في صواني من الذهب و الفضة، و مغطاة كأن بها جِمالا مُبَهّرة و جاهزة للإلتهام. ثم وُضِعت على الطاولة و صورتنا الكاميرات و نحن ننظر للصواني في إنبهار و نحن نتلذذ بما سنراه و لا نستطيع تجميع الكلام من شدة اللهفة

ثم أزيح كل الأكل، فنظرنا لبعضنا و قالت لي زوجتي، لا تقلق هذا الأكل للشو و كل ما حدث أنا أعرفه مسبقا، و لكن لا تخف سنأكل و نشبع. فلم أفهم ما تعنيه بكلامها و لكن الطابور الأخر جاء مسرعا بالأكل و لكنه في أطباق من الفخار و بدأوا بتوزيعه علينا حسب الطلب

فوضعوا أمام أولادي طبقا كبيرا من الأرز الأبيض بالشعرية و طبقين من الملوخية و قطعتين من الفراخ المحمره و وضع أمامي و أمام زوجتي نفس الطلب و لكن بزيادة طبقا من المخلل المشكل ثم وضعوا في وسط الطاولة طبقا مسطحا من الكفتة به أربع قطع و طبقا واحدا من الشوربة

تعجبت لما هو موجود على الطاولة و نظرت لزوجتي و أعطتني غمزة بعينها و قالت، كل يا حبيبي، فهذا الأكل من صنع يدي. نظرت لها بذهول، و قلت هل طبختي في البيت، فردت بأن المحل عزمها لتطبخ في مطبخه الخاص و تصورت لايف و هي بالداخل لتجهز لنا ما سنأكله و عندما سألوها عما نحب أن نأكله فقالت إنهم يعشقوا الملوخية و الفراخ المحمرة

نظرة فنظرية فمنظور

* النظرة

إن الطريقة التي نقضي بها حياتنا تعتمد دائما على ما نظنه أننا نمتلكه

فأيام الشباب و نحن نمتلك الوقت و الصحه، نفترض أننا سنعيش للأبد و لا نشعر بالقلق بشأن فقدان قدراتنا التي نبنيها في سنين. نحن نستغل الفرص و نصل بطموحاتنا للسماء و نحارب من أجل ثمرات المجهود. فنسعى للإنضمام لمعارف جديدة و نكتسب خبرات كثيرة و نوسع دائرة معارفنا و أصدقائنا. و نسعى لتوسيع دائرة تحقيق ذاتنا

و عندما يأتي وقت الإنكماش و يصبح الوقت محدودا و المستقبل غامضا ننتقل من الإهتمام بتحقيق الذات إلى الإهتمام بالتمتع بحب الموجود

* النظرية

قامت إحدى الدارسات بعمل تجربة إجتماعيه لمعرفة صحة و خطأ أن القرارات الشخصية تعتمد على منظور الفرد لما يمتلكه

الدراسه قامت على ثلاث مراحل لإثبات ثلاث وجهات نظر

المرحلة الأولى

قامت على أشخاص بالغين تتراوح أعمارهم بين ٢٠ و ٧٠، بعضهم بصحة جيدة و البعض الأخر عندهم أمراض علاجها صعب و مكلف و مؤلم

و قامت التجربة على سؤال واحد فقط و هو إذا كنت تمتلك ساعة واحده متبقية في حياتك فمع من ستقضيها؟

أظهرت النتيجة أنه كلما كان الفرد أصغر عمرا و أكثر صحة كلما قلت رغبته في قضاء الوقت مع أشخاص أقرب إليه عاطفيا و تزداد رغبته في قضاء الوقت مع من يعتقد أنهم مصدرا لمعلومة أو صداقه جديدة. و لكن عند دخول المرض أو الإقتراب للشيخوخه تختفي الفروق العمرية فالمريض أو المسن يفضل أن يقضي وقته مع من يحب

المرحلة الثانية

قامت على أفراد من عمر ١٠ إلى ٦٠ عاما، و كلهم يتمتعون بصحة جيدة. و كان السؤال هو إذا إنتقلت لمكان بعيد و غريب فمن تحب أن تقضي معه ساعه من يومك؟

هنا إختفت الفوارق العمرية في الإجابة فصغار السن فضلوا قضاء وقتهم مع من يحبون كما إختار كبار السن نفس الإختيار

المرحلة الثالثة

كان السؤال إذا تم إكتشاف طريقة لإضافة عشرين سنة زيادة تتمتع فيها بصحه جيده فمع من ستقضي ساعة من وقتك؟

و كانت الإجابة بأن كبار السن إختاروا قضاء وقتهم مع من يعلمهم و يزيدهم خبرة أكثر ممن أحبوهم كما إختار صغار السن نفس الإجابة

* المنظور

حينما تبرز هشاشة الحياة على السطح فإن أهداف الناس و دوافعهم تتحول بشكل جذري، فأكثر ما يخافه المريض أو كبير السن هو العزلة. فتجده لا يطلب مالا و لا قوة، و يطلب فقط ان يُسمح له بالإحتفاظ بحياته و بإختياراته كما يريد. و بالتالي فمنظور الناس لحياتهم هو العامل الحاسم الذي يتخطى أعمارهم و خبراتهم

أوراق عجوزه

في عالم الزرع، كل ما كبرت الزرعه في العمر كل ما كانت الأوراق القديمة أو العجوزه مهمة في التعامل. بمعنى أن المزارع يراقب تفاعل الأوراق القديمة و العجوزه أولا لمعرفة التفاصيل الخفية داخل الزرعه

فعندما يقل اللون الأخضر للأوراق العجوزه و تتحول إلى اللون الأصفر فدا دليل على نقص مادة النيتروجين داخل الزرعه. و لو نظر للأوراق الجديدة فهتكون لونها أخضر فاتح. و دا دليل على وجوب التسميد بالنيتروجين. و لكن التسميد يكون بحذر، لأن النيتروجين السريع سيؤدي إلى ذبول أكثر و سقوط للأوراق الجديدة

ففي حالة إصفرار الأوراق القديمة و العجوزة، يتحول تفكير الزرعة من نمو خضري إلى نمو جذري لتعويض نقص النيتروجين و أيضا يتم تحويل خلايا الأوراق الجديدة و الساق إلى خلايا خشب

و بالتالي عند الزيادة السريعه لكمية النيتروجين فإن الزرعه لن تهتم بالأوراق لأنها قد قررت مسبقا بتحويلهم إلى خشب، و سيكون الإهتمام منصبا على تخزين النيتروجين في صورة بروتينات تستخدمها في دورة البناء الجديدة

مؤسسة سرطانية متوازنه و جباره

زمان جه واحد إسمه فاربورغ warburg و قدم فكرة إن السرطان كائن يعتمد في تنفسه على الأكسجين - يعني زي أي كائن حي محتاج الأكسجين علشان يعرف ينتج طاقه يعيش بها - بس برضه قال في نفس الوقت إن السرطان ممكن يستغنى عن الأكسجين لو ملقاهوش و يستخدم السكر بدالة علشان ينتج طاقته.

الفكره هنا و إللي أخذ عليها جائزة نوبل إن السرطان عنده قدرة هائله على التكيف حسب الظروف المحيطه به و قدرته على تخطيها. فجواه برمجه جينيه فيها كل حاجه تتخيلها - بس برضه في مواد ممنوع عنه إنتاجها و بيحتاج للمساعدة من الخلايا المجاوره له. السرطان كائن جبار و ذكي و أدرجي على أعلى مستوى .

جوا المؤسسة السرطانيه ده تلاقي النوعين من الخلايا ، نوع بيستخدم الأكسجين و نوع بيستخدم السكر ، شغالين مع بعض ، هما الإتنين بينتجوا طاقه و بيحصل بينهم توازن بدون تنافس . علشان لو حصل حاجه يعرف يتأقلم عليها بسرعه . و طبعا عِد كل الإحتمالات الممكنة و لكل إحتمال هتلاقي شريحه سرطانية شغاله عليه .

طنط س ر ... الست المخلصه

طنط س ر، تقريبا خمسين سنة، ست شيك أوي، عايشه في طبقة تعتبر متوسطه عالية شوية، ربنا رزقها الولد و المال. جوزها رجل وقور و طيب و متعايش معها. بيتها ذهبي اللون، نظيف، بيلمع، مرتب، و ذوقه عالي. لما تدخله تحس إنك مبسوط و مستريح. كلامها معسول و ممزوج بروح جميلة، لما تتكلم معاها تحس إنها فهماك و حاسة بكل حاجه. معندهاش مشكله تأكل الفسيخ سندوتشات

طنط س ر ربنا إداها كل حاجه و وفرلها الراحه و الطمأنينة بس هي إختارت حاجه واحده تعملها في حياتها، و هي أكثر حاجه بتعملها و بتعشقها، و هي أنها تعرف أسرار البيوت. و مبدأها أنا عاوزه كل الناس مبسوطه و مستريحه، عاوزه الراجل و الست يعيشوا صح و بسعاده زي ما هي عايشاها. بتتكلم كثير و بتسأل كثير و بتعمل قصص كثيره و طبعا بتكذب كثير. بتقول للست كلام و تقول للراجل كلام تاني خالص، أصلها مُخلِصه أو مُخَلِّصه

هي طبعا إنسانه وحيده، إبنها طول عمره بيتضايق من طريقتها، معندهاش جيران يثقوا فيها و لا أصحاب يزوروها، إبنها لما كبر سافر برا و راح بعيد عنها بحكم دراسته. بيكلمها، بس يادوب سلام عليكم و عامله إيه. محدش يعرف عنها كثير بس كل حاجه معروفه بدون كلام

دعيت بطريق القرابة و الصداقه لحفل زواج بين ولد و بنت. حفل زواج أسري جميل مبني على الحب و الإحترام بين العائلتين. و طنط س ر رقصت فيه و باست و حضنت كل الأخوة و الأخوات. و الكل عارفينها إلا الميؤوس على شبابهم العرسان

و في أول ليلة دخلت بيتهم و دخلت جوا عقولهم. من أول يوم نزلت جوا ودان البنت في مطبخ البيت و من غير ما حد يشوف، و دلقت السم و قالتلها: خلي بالك، أوعي يعمل معاكي كذا و كذا، أوعي تساعديه على كذا و كذا، أوعي يأخذ منك فلوسك و يأخذ وقتك و كل إهتمامك، و خليه دائما محتاجلك و مشتاقلك و مش عارف يتمكن منك. إدبحيله القطه قبل ما يدبحهالك او يدبحك انت شخصيا. خليه لكي لوحدك و ابعديه عن أهله. و كله بالحب و الذوق و الحنية. و الأهم من كل دا لازم توديه عند دكتور نفساني. و البنت سمعت الكلام بحذافيره و شربت كل السم

و راحت في ودان الولد في البلكونه لوحدهم، و قالتله خلي بالك منها، البنت حتة سكره، خفيفه و طرية، و معندهاش حد تتسند عليه. انت أبوها و أخوها دلوقت ، و طبعا جوزها. انت راجل و سيد كل الرجاله، حاول متعودهاش ان كل حاجه سهله، و الفلوس مش سهله برضه. مصروف البيت، الخروجات و الفسح، الإهتمام و الإحتواء، الهزار و الجد، أمها و أمك، أختها و أصحابها، جيرانها و شغلها و إدتله عسل مليان مكسرات مسمومه

و هي ماشيه من عندهم بعد ما باركتلهم، سابت ظرف فيه فلوس كثيره، و قالتلهم بيتكم هيكون بيت سعيد زي بيتي بالظبط، أصلكم لسه مشفتهوش و متعرفهوش. أنتم حبايبي و أولادي

و بعد كام شهر حصلت أول خناقه. خناقه بسيطه، هايفه، و علطول طنط س ر بقت في الصورة بس من في الظل، هي شغاله في التلفون بس. بتكلم البنت لوحدها و بتكلم الولد لوحده و بتسجل للبنت و للولد و جوزها بيسمع و بيفتكر الماضي. طبعا الدنيا ولعت، البنت بقت نار و الولد بقى نار و في لحظة، الشرر مسك في البيت و إتحرق

كلام كثير جدا، مسموح و غير مسموح، حكاوي و قصص ملهمش أول من آخر. كلام حقيقي ممزوج بالكذب و محدش عارف الصدق فين. إتهامات و تبريرات و تأليفات بين الولد و البنت، تراشق بالكلام و بالأخطاء. ياه كل دا حصل في كام شهر بس

طب إيه إللي حصل و إيه أصل الحكاية، أصلها عاوزاه يروح لدكتور نفساني. ليه ، أصلها وعتها يوم فرحها لو عاوزاه تحت رجلكي، لازم يكون بيتعالج، طريقة خبيثة علشان تكسر غروره و تحكماته

البنت النار كلتها و سابت بيتها و راحت لأبوها، و الولد النار كلته و هو كمان ساب بيته و راح لأمه. و البيت بقى محروق و أصبح كالمقبره. و بعد عدة أشهر من المشكله، برته من كل حاجه و إتطلقت. و الغريب إنها قالت بعد كدا لطنط س ر: عاوزه تعرفي إللي قدامك ده راجل ولا ايه، حطيه في موضع إختيار و شوفي هيختار ايه

و بعد شهر لقى محضر من المحكمه بقضية من نوع جديد، أصل البنت رفعت قضية على الولد بتهمتين، واحده قضية طلاق للضرر و الثانية رد إعتبار و عاوزه تعويض. و السؤال هنا جبتي فلوس القضية منين .... طبعا من طنط س ر

طنط س ر شغاله بكل طاقتها و المواضيع مش هتخلص و الدنيا مش هتهدأ و الولد و البنت خسروا حياتهم و بيتهم

القصة لسه منتهتش، و هنكملها مره تانية