طوفان أفكار

في مجموعه من العلماء بيكون شغلهم في محاولة إيجاد الجينات المناسبه لعملية النمو . و بيعملوا تجارب على الجينات ده و بيحاولوا يرسموا خريطه لعملها و لتكاملها مع بعض . وكمان بيعرفوا نوع التشوهات اللي هتظهر نتيجة التغير فيها . ومعظم التجارب ده بتتعمل على الحشرات و الديدان و الأسماك

بيقوم العلماء ببطء بتجميع الخطوات التي تتبعها البويضه المخصبة حتى تصل إلى كائن مكتمل النمو و بمعرفة الجينات و تتابع خطواتها قدروا يشغلوها أو يوقفوها أو يغيروها في أوقات مختلفه من التكوين الجنيني و يشوفوا إللي هيحصل

طبعا العلم دا بيطلع طوفان من المعلومات ، بحر كبير جدا من الداتا و إحتمالاتها . و بدأوا يرتبوا الجينات و يرسمولها خريطه و لقوا إن معظم الجينات بيكون تكوينها متشابه في معظم الكائنات الحية . و بالتالي أطلقوا عليها أسماء متشابهه

و طبعا التشوهات غللي بتحصل نتيجة تغير الجين نفسه بتكون تقريبا متشابهه في الكائنات الحية . ودا فتح باب كبير جدا للدارسين و الباحثين في مجال السرطان . و خاصة سرطان الأجنه و الأطفال

و يبقى الأمل

عائلتي هي سندي و عزوتي

الحياة العائليه هي حياة الأب و الأم مع الأولاد و البنات . كلنا في بيت واحد و تحت سقف واحد . عايشين حياتنا مع بعض ، بناكل و نشرب مع بعض . بنهتم ببعض و بسند بعض و بنخاف على بعض . إللي موجود في البيت لكل البيت و إللي معاه بيدي إللي مش معاه

عمق الحياة العائلية بيكون نتيجة إن كلنا عارفين حواديت بعض و عارفين إجابيات و سلبيات شخصياتنا و كمان عارفين بنحب إيه و بنكره إيه و إيه إللي بيفرحنا و إللي بيزعلنا . عارفين تاريخنا و ماضينا و بنتكلم في يومنا و حاضرنا و بنفكر في مستقبلنا مع بعض . بنواجه التحديات و نمسك في إيد بعض و نعدي

وعلى قد العمق دا ، العلاقات بتكون حساسه جدا . ممكن علشان مكشوفين جدا لبعض و عارفين إيه إللي ممكن يزود عندنا القلق و التوتر و الغضب و الحزن و علشان كدا بنشوف المشاكسات إلي بيننا كإنها جبال و براكين و هي لا تتعدى شوية رياح

الحياة العائلية هي حياة الإهتمام و السند ، مش مهم إني مكشوف و معروف عني كل حاجه المهم إن كل إللي محتاجه بلاقيه في بيتي و وسط عائلتي

عائلتي هي سندي و عزوتي

وجهان لعملة واحده ، وجهان لشخص واحد

في وجهين للتربيه ، الوجه الحازم ، و الوجه الحاني . دور الحزم بيكون في التطبيق و دور الحنيه في التقبل و الإستمرار . في المدرسه يغلب الوجه الحازم دائما على الوجه الحاني . و العكس في البيت ، يغلب الوجه الحاني على الوجه الحازم

التوازن مطلوب دائما بين الوجهين . لأن المدرس الحازم على الأطفال في المدرسه هو أب حنين على أولاده في البيت . و بالتالي الوجهين ماشين على خط واحد و ممزوجين ببعض

الفكره الأساسيه في التربيه ، هي خلق الرغبه عند الأطفال في إحترام مع تصديق القاعده الأخلاقيه و إتباعها . و دا يعتمد كل الإعتماد على المدرس الأب و المدرسه الأم

مجرد سؤال في القناعه

لو ربنا قدرلك أن يكون عندك مرض علاجه صعب و إحتمال إنك تخف منه ضعيف . وعارف أنك ممكن تموت في خلال فتره قصيره وفي ناس تانيه عندها نفس المرض بيموتوا كل يوم . وفي علاج موجود بس مش عارفين تأثيره ولا عارفين أعراضه الجانبيه

هل هتوافق تدخل في تجربه طبيه إحتمال تعاني أو تموت بسببها علشان غيرك من الناس يبقى عنده أمل في الحياه

السؤال ده صعب جدا الإجابة عليه و لكنه سيظل مجرد سؤال في القناعه

شجرة تشتكي و تطلب نقلها

سؤال ، من الأولى حماية مكان ملوث هواءه بزراعة أشجار لتنقيته أم حماية الأشجار المهمة من مكان أصبح هواءه ملوث بنقلها

المعروف أن الأشجار و الزرع عموما بيقوم بتنقية الهواء من الملوثات و إستبداله بالأكسجين الطبيعي . و الغير المعروف و الغير المألوف أن الأشجار تمرض كبقية الكائنات الحية ، تمرض تنفسيا من ملوثات الهواء الناتجة من عوادم السيارات و دخان المصانع كأكسيد الكبريت و أكسيد النيتروجين

فإذا زرعت شجرة في مكان هواءه ملوث قد تمرض و تموت . فالملوثات تتراكم داخل أوراقها و أنسجتها و خشبها و تمنعها من التنفس و تقف عائقا أمام إنتاج طاقتها و إنتقال غذائها

و عندما تمرض الشجره فإنه يظهر عليها أعراض تسبق موتها كذبول أوراقها و تغير لون جذعها و جفاف أغصانها . و بهذه الأعراض تشتكي الشجره و تحاول أن تلمح بإنقاذها أو نقلها

و عندما يستحكم مرضها منها و أنها حتما ميتة فإنها تفقد قدرتها على المقاومة و تستسلم للنهاية فلا تنتج طاقة و لا تمتص الماء و تسقط أوراقها و يقل سمك خشبها و تذبل في صمت

بنسلين السرطان، فرضية بحث و إنحرفت

مثل كثير من الإكتشافات العلمية فقد تحقق إكتشاف علمي مذهل عن طريق المصادفه . إنحرفت فكرة بحث في معمل و إستطاعت الإجابة على أسئلة مكنش حد عارف أصلا يسألها

روزنبرغ باحث في الكهرباء بيعمل تجاربه علشان يستكشف الطريقه إللي بتتصرف بها الخلايا الحية في وجود الكهرباء . و كان بيحاول يربط بين شكل الإنقسام الخلوي الميتوزي و شكل خطوط الحقل المغناطيسي إللي بتظهر عند وضع مغناطيس على ورقه مرشوش عليها برادة حديد . و كان بيحاول يجاوب على سؤال بحثي مهم و هو هل عملية الإنقسام الخلوي يتحكم فيها تأثير كهرومغناطيسي

و عند بدء التجربة جاب قطبين كهرباء و حطهم في طبق مزروع فيه بكتريا ال E.Coli و بدأ يمرر تيار كهربي في الطبق . و بعد وقت قصير توقفت البكتريا عن الإنقسام . ولما وقف التيار الكهربائي رجعت الخلايا لحجمها الطبيعي من تاني و بدأت تنقسم بطريقة طبيعية

وطبعا بدأ يفكر في السرطان و قال إن إحنا نقدر نسيطر على على نمو الخلايا السرطانية بواسطة تمرير حقل كهربائي بتردد معين و نموتها . بس المفاجأة الكبيرة و إللي غيرت مجريات بحثه تماما مش فكرة الترددات الكهربائيه ، لأنه لما جربها من تاني بطرق مختلفه محصلش النتيجة إللي كان منتظرها و هو موت الخلايا

و لما أعاد تجربته الأولى بحذافيرها نجحت و ماتت الخلايا ، بس فشلت من تاني لما إستخدم أقطاب كهربائيه من نوع مختلف . فقال لنفسه يبقى الأقطاب هي إللي فيها المشكله و برضه فيها الحل . و هنا حصل التحول في البحث لإنه كان بيستخدم أقطاب مصنوعه من مادة البلاتين و هو عنصر خامل كيميائياً بس من خلال مرور الكهرباء فيه نتجت في المحلول أيونات من مادة البلاتين

و من التجربة ده و الملاحظة ده و الإنحراف ده إتعرف تأثير البلاتين على الخلايا الحية . و بعد تغير بسيط في التركيب الكيميائي للأيونات جربه على فئران عندها سرطان ، فتوقف نموه و الفئران فخفت منه . و بعد تجارب سريرية كثيرة على الإنسان عرف العلماء مقدار الجرعة المعالجة و أطلقوا عليه وقتها بنسلين السرطان . و حتى اليوم يعتبر ( السيسبلاتين ) دواء رئيسي في البروتوكولات العلاجيه لمعظم أنواع السرطان

روزنبرج كان بيكتشف تأثير الكهرباء على الخلايا و مكنش يحلم أنه يكون السبب في ظهور دواء يغير مجرى التاريخ و يكون سبب في شفاء عدد كبير جدا من مرضى السرطان

و يبقى الأمل