أثناء بناء أي عماره بيلزم الأمر الأول حفر في الأرض علشان نعمل أساسات . و طبعا الأساسات بتتعمل على حسب المخططات المستقبلية يعني هتعلي العمارة كام دور
و أثناء عملية الحفر هتلاقي حاجات غير متوقعه ، زي صخره لازم تتكسر ، ماء جوفيه لازم تتشفط و تنشف ، شوية مشاكل يعني بس لها حلول
طبعا هيصاحب الحفر تعب و مجهود و مصاريف بس لما بتخلص المرحله ده تقدر تبني براحتك و تعلي الأدوار وانت مطمن على الأخر
فتح بيت زوجيه بقى عامل كأنك هتبني عماره، لازم الأول تختار الأرض إللي هتبني فيها لأنها دائمه و صعب جدا تغيرها. و بعد كدا لازم تكون واثق أن إللي بتحفر معاك هتكون قد الحفر و كمان عاوزه و فاهمه مشاق الحفر و تكاليفه من وقت و مجهود
و بعد ما ترموا الأساسات إللي إتفقتوا عليها تطلعوا بالدور الأول. و يتفتح البيت و يتجهز للبناء و التعليه. ومع كل طفل هنعلي دور و نجهزه لإستقباله. وكل ما الغلاوة و العشره زادت ، كل ما تشطيب البيت بقى أحسن و البيت بقى أدفئ
