المديرين وأنواعهم على طريقة السنفورية
#الأخلاق_القناعات_الإهتمامات_المهارات_القدوات
تخيل لو شخصيات السنافر، بكل صفاتهم اللي بنحبها أو بنضحك عليها، مسكوا مكاتب الإدارة! قرية السنافر هتتحول لشركة، وكل واحد فيهم هيقود فريق بطريقته. منهم اللي هيخاف يتحرك خطوة، ومنهم اللي هيقضيها تبريرات وهروب، ومنهم اللي هيضغط على فريقه أو يبان كأنه شبح ملوش وجود.
هنتخيل كل شخصية من السنافر في دور مدير، وهنشوف أنواع المديرين من زاوية كوميدية لكن واقعية جدًا. يا ترى مديرك الحالي شبه أنهي سنفور؟
سنفور خواف
ده زي "خواف" في السنافر، دايمًا قلقان وخايف من كل حاجة. المدير ده بيقفل على كل حاجة، التحرك عنده لازم يكون بورق وبحساب، وكل خطوة محسوبة عشان ما يغلطش. خوفه بيمنع أي تغيير أو تطوير، ودايمًا بيحس إن المخاطرة تهديد.
سنفور غضبان
اللي شايف كل اللي حواليه غلطانين. ده المدير اللي بيتعامل مع فريقه كأنهم متهمين، وأوامره كلها تحذيرات وعقوبات. أي غلط بيتحول لعبرة وبهدلة، وكل الناس تشتغل في توتر.
سنفور دحيح
زي "سنفور شاطر"، اللي عايش وسط الكتب والأرقام. المدير ده فاكر إن كل حاجة ليها معادلة ثابتة: 1+1=2. مفيش مساحة للتفكير أو الإبداع، وكل كلامه "ما الحاجة مكتوبة، بلاش تفكر".
سنفور مظلوم
دا اللي عايش في دور المظلوم. المدير ده بيحس إنه مش مقدر، ومستني تطبيل وتقدير من اللي حواليه. توقعاته خيالية، ودايمًا شايف إن الناس بتخذله.
سنفور مرقوع
اللي دايمًا بيهرب من المسئولية. المدير ده شاطر في التبريرات، وكل حاجة واقفة بسبب الورق أو الناس. عمره ما يتحمل الفشل، ودايمًا يرمي السبب على حد تاني.
سنفور مفكر
دا اللي كلامه مليان نظريات ومصطلحات كبيرة. المدير ده عنده شهادات كتير، لكن وقت التنفيذ مفيش أي إنجاز حقيقي. بيتكلم عن الأداء وهو نفسه مفيش عنده أداء.
سنفور مزاجنجي
يوم يضحك ويهزر ويوم يقلب عليك. المدير ده كل حاجة عنده ماشية بمزاجه، وقراراته بتتغير حسب حالته النفسية.
سنفور خبيث
بيبان في الأول كأنه صاحبك، بيحاول يقرب منك و يكلمك. مش علشان بيحبك لكن بيجمع عنك معلومات يستخدمها ضدك. المدير ده دايمًا مستني الفرصة للضغط عليك و استغلالك.
سنفور محطم
اللي دايمًا عايز السيطرة الكاملة. المدير ده شايف نفسه أقوى واحد، البطل الوحيد، ولو حد اشتغل من دماغه و حاول يفكر، يحس إنه تهديد لشخصيته و يجب تحطيمه و تكسير عظامه.
سنفور شبح
اللي مش موجود أبدًا. المدير ده محدش يعرف هو فين ولا بيعمل إيه، ولو حضر بيقول كلمتين ملهمش لازمة ويمشي.
لو مديرك كان لونه أزرق، تتوقع يكون أنهي واحد؟
ليست هناك تعليقات:
إرسال تعليق