سلسلة مقالات: لما كنت موظف، ولما بقيت مدير، و لما بقيت صاحب شغل
#لما_كنت_موظف #الحياة_المهنية #البدايات_الوظيفية
أول ما دخلت الشغل، كان الخوف من المستقبل أكتر حاجة شاغلة بالي. كنت حاسس إن الدنيا كلها واقفة قدامي بأسئلة كتيره مالهاش إجابة واضحة. كنت كل يوم أصحى وأفكر: "يا ترى هعرف أثبت نفسي في المكان؟ هقدر أتعلم بسرعة؟ ولو غلطت، هيكون مصيري إيه؟"
الإحساس ده خلاني طول الوقت على أعصابي، خصوصًا أول ما المدير يقول لي أعمل حاجة. كنت دايمًا متوتر وأسأل نفسي: "لو ما عملتش المطلوب بالطريقة الصح، هيشوفوني إزاي؟" وده خلاني في الأول أعمل كل حاجة بمنتهى الحرص والتدقيق، وأحيانا كنت بحس إن الضغط ده أكبر مني.
و كمان كان عتدي خوف من المسؤولية: المسؤولية كانت جديدة عليا، فكرة إني خلاص كبرت، وبقيت أعتمد على نفسي، كانت شوية تقيلة. أسئلة زي: "هقدر أوفّر من المرتب؟ طب هعرف أصرف على نفسي وأفتح بيت؟ المستقبل هيكون شكله إيه؟" كلها كانت بتلاحقني. كنت حاسس إن بداية الشغل دي مش بس مجرد وظيفة، دي حياة جديدة كاملة، وأنا لازم أكون قدّها.
بس مع الوقت؟ اكتشفت إن الخوف ده طبيعي جدًا. في الأول، كان حِمل كبير، لكن مع الوقت بقى هو الدافع اللي يخليني أركز وأطور نفسي. بدأت أفهم إن كل خطوة صغيرة بتاخدها في شغلك، حتى لو حسيت إنها مش مثالية، هي جزء من رحلة طويلة.
دلوقتي لما أفكر في اللحظات دي، بشوفها بشكل مختلف. الخوف ده كان زي صديق سري بيحفزني طول الوقت. اتعلمت إن الأهم مش إنك ما تخافش، لكن إنك تخلي خوفك دافع لإنك تكون أحسن.
هتلاقي كل مقالات السلسلة في صفحتي في لينكدان
https://www.linkedin.com/in/amr-elnashar/
و في صفحتي في الفيسبوك بقيت التجارب و المقالات
https://www.facebook.com/amr.adel.elnashar
و جميع المقالات في البلوج الشخصي
https://amradelelnashar.blogspot.com/
ليست هناك تعليقات:
إرسال تعليق