#إدارة_نباتية
اللي بيقولك الشغل مش بيقف على حد غالبًا بيكون يا بياع شعارات، يا حد عايز يطمن نفسه إنه يقدر يكمل من غيرك، وده كلام ممكن يبقى حلو في الكتب، بس في الواقع؟ لأ، مش دائما صح.
الشغل بيقف، وبيتهز، وبيتبهدل كمان لما الناس الصح تمشي.
الناس اللي بتشتغل بضمير، اللي قلبها على الشغل كأنه بتاعها، اللي بتفكر وتخطط وتصلح من غير ما حد يقولهم. الناس دي بقت عملة نادرة، ومش أي حد بيعرف يعوضهم.
الناس الأمينة اللي مش بتشتغل لمجرد القبض، لكن بتشتغل علشان بتحب تسيب أثر حلو، الناس اللي اتربت على الأصول، بقت تقلّ، ولما بتسيب مكان، سابوا وراهم فراغ صعب يتسد.
يعني الشجرة فعلاً مش بتكبر لوحدها. الشجرة محتاجة اللي يرويها، اللي يسندها وقت العواصف، اللي يوافق على التغير و يشيل فرعها اليابس، اللي يشوف فيها أمل ويفضل يسمدها و يراعيها لحد ما تطرح.
فـلما الناس دي تمشي، الشجرة ممكن تفضل واقفة شوية، بس مش هتطرح تاني بنفس الطعم ولا بنفس الغزارة.
واللي ييجي بعدهم، لو مفهمش قيمتها، ممكن يرويها زيادة فتعفن، أو يسيبها تنشف من غير ما يحس.
فبلاش نضحك على نفسنا، ونقول الشغل مش بيقف على حد. الشغل الحقيقي مش ماكينه، دا حياة، وشراكة، وقيم، والناس اللي بتعرف تحافظ عليه وتكبره. دول مش أي حد.
ولو لقيت حد شاطر، محترم، أمين، و متربي، حافظ عليه علشان هو اللي هيحافظ على الشجر عندك و يخليه يكبر.
