لما الواحد بيقرأ كتاب ورقي بيكون عارف هو واقف فين و عارف فاضل كام صفحة و يخلص الكتاب. و بالتالي في كل مرة هيكون عارف أو حتى متوقع معاد النهاية . بيكون عامل حسابه عليها و مجهز نفسه لها .
لكن في الكتب الإلكترونية بيكون الموضوع مختلف شوية . الواحد بيقعد يقرأ و ينغمس داخل بحر الكلام . بيقرأ و يفهم و يترجم و يتخيل ، صفحة تخلص ورا صفحة تانية . مفيش أي إحساس بالوقت .
و فجأة تحدث النهاية . فجأة تلاقي الكتاب خلص . حقيقي في شعور غريب جدا من الحزن تلاقي نفسك دخلت فيه . الكتاب خلص ، طب أنا لسه مأخذتش منه إللى أنا عاوزه أو منتظره منه . خلص خلاص ، شعور يشبه الإبتعاد ، التعلق الشديد ، و الغربه . تقعد تكلم نفسك طب هعمل إيه دلوقتي ، أجيب كتاب تاني حلو زيه إزاي . لسه هبدأ كتاب تاني من بدايته و أبني معاه جسور تواصل و أفهم كلامه و أفسر أسلوبه . الموضوع بيأخذ وقت و جهد . هو الواحد ممكن يتعلق بكتاب كدا .
حقيقي القراءة الإلكترونية مختلفه تماما عن الورقية .
ليست هناك تعليقات:
إرسال تعليق