الخطوبة بالنسبة لكثير من الناس هي المرحلة الأولى لبناء حياة جديدة مع شريك العمر. لكنها كمان ممكن تكون أكتر مرحلة مليانة تمثيل وتجمل، لأن كل طرف بيحاول يظهر بأحسن صورة قدام التاني. وهنا بتيجي المشكلة: هل الصورة دي هي الحقيقة؟ ولا مجرد قناع متزوق ممكن يقع في أي لحظة؟
فترة الخطوبة في الحقيقة زي مرحلة تزويق كده، كل واحد فيهم بيحاول يظهر بأحسن صورة قدام التاني. تلاقيه بيزوق لبسه، طريقته في الكلام، طريقته في التفكير وحتى نظراته بتبقى متزوقة، وكل ده عشان يسيب انطباع حلو.
في الوقت ده، كل طرف بيجتهد يكون الشخص اللي التاني نفسه يشوفه، مش الشخص الحقيقي اللي هو عليه. يعني باختصار، فترة الخطوبة ممكن تبقى شوية تمثيل وتلميع وتزييف للواقع.
لكن اللي بيحصل غالبًا إن لو الفترة طالت شوية، الأقنعة بتبدأ تقع. لأن مش منطقي تفضل متمسك بالقناع ده طول الوقت. بيجي وقت والتعاملات اليومية والمواقف المختلفة بتبدأ تكشف الحقيقة. الصفات الحقيقية للشخصية بتظهر، وكمان المشاكل اللي كان الواحد بيحاول يخبيها بتبدأ تبان.
علامات الشخصية المضطربة أو المشاكل اللي كانت مستخبية بتبدأ تطلع على السطح. الخلافات بتزيد، والمواقف بتوضح إذا كان الشخص ده على حقيقته فعلاً شخص مناسب وجيد ولا مجرد صورة متزوقة مفيش فيها أي أصالة.
المواقف الحقيقية هي اللي بتحدد جودة الشخصية. إما يبقى في توافق حقيقي وصادق أو تظهر الحقيقة اللي ساعات بتبقى صادمة جدًا.
خلي فترة الخطوبة فرصة للتعارف الحقيقي، مش للتمثيل. حاول تكون صادق مع نفسك ومع الطرف التاني. لأن الحب الحقيقي أساسه الصدق، ولو البداية كانت على حقيقتك، النهاية دايمًا هتكون أسعد وأثبت.
الشخص اللي حبك على حقيقتك هو اللي هيقدر يكمل معاك الطريق، أما اللي حب الصورة اللي انت زوقتها، هيمشي أول ما الصورة تتغير.
ليست هناك تعليقات:
إرسال تعليق