أبني إبني

تخيل إن أجسامنا عبارة عن قطع تركيب، زي البازل، وكل يوم بيعدي بنفكك نفسنا ونقدم جزء من القطع لأولادنا عشان يبنوا حياتهم. كأننا بنقدم نفسنا قطعة قطعة، بحب وبإرادة، وبنشوف قدام عنينا كيف بيتشكلوا ويكبروا باستخدام اللي احنا بنسيبه ليهم.

كل يوم، بتدي لطفلك قطعة جديدة منك، يمكن تكون عينك، اللي شايف بيها العالم بوضوح، بتفكها من عندك وتديها ليه عشان يشوف بيها بعيونه، وكل ما يكبر، عيونه تقوى على حساب عينك اللي بدأت تضعف. قلبك برضه، كأنك بتطلع منه قطعة وبتحطها فيه، عشان دقاته تقوى، ويكون قلبه صلب وقادر يواجه الحياة، بينما قلبك إنت بيشيل أثقال الأيام.

وكل ما تمر الأيام، بتبدأ تلاحظ إن جسمك بيبقى فاضي شوية شوية، وكل قطعة نقصت منك، بتظهر فيهم، بتكبر جواهم. وبتيجي لحظة تلاقيهم كبروا، بقى عندهم الكتير من اللي كان فيك، وساعات يمشوا في طريق مختلف. بس ساعتها، هتفتكر إنهم شايلين كل اللي انت ضحيت بيه، لأن حياتك بقت مبنية جوه أجسامهم.

ورغم التعب، ورغم إنك بقيت تحس نفسك بتتفتت، بتبقى عارف إن كل قطعة راحت لهم كانت جزء من حبك. انت مش بس بنيت حياتك، لكن رسمت مستقبلهم بقطع من جسدك، وفضلت عايش جواهم حتى لو هم بعدوا.