داخل نفق طويل مليان حكايات ونصايح، واحدة بتحكي للتانية بحماس وكأنها ماسكة مفتاح أسرار الحياة. بتقولها: "بصي يا حبيبتي، قبل ما تفكري تدخلي أي علاقة جدية، لازم تذاكري الأبراج كويس جدًا. الأبراج في الأول بتوفر عليكي وقت كبير ومجهود، لأنها بتخليكي تعرفي كتير عن الشخص اللي قدامك من غير ما تسأليه ولا تحطيه في مواقف."
بتكمل كلامها وكأنها عالمة في الموضوع: "الأبراج مش مجرد كلام فاضي، دي تجارب متكررة بتثبت أن الشخصيات بتتشابه على حسب البرج. تعرفي تصرفاته، طريقة تفكيره، وحتى ردود أفعاله في المواقف المختلفة. بس طبعًا، لكل قاعدة شواذ."
وتبدأ تقدم نصايح عملية: "إتمرني على معرفة الأبراج من طريقة كلام الناس، حركاتهم، وحتى أسلوبهم. ولو قدرتي تعرفي برجه من غير ما تسأليه وطلع صح، يبقى كسبتي قلبه قبل ما تكسب عقله. قولي له كام صفة حلوة عن برجه، وشوفي الفرح في عينيه. هيصدقك على طول ويطلب منك تقولي أكتر. بس خليكي ذكية، ركزي على المميزات، وسيبي العيوب على جنب."
بتضحك وهي تضيف: "الصفات الحلوة دي هتشبع غروره وتخليه يحس إنه مميز جدًا في عيونك، وإنك الوحيدة اللي شايفة جماله الحقيقي، الجمال اللي حتى أهله وأصحابه مش شايفينه. بس خلي بالك، متصدقيش الكلام ده كله إلا لما يثبته بنفسه، لأن الرجال أوقات بيكونوا... عارفين، مش مضمونين. دي أصول اللعبة يا قمر!"
وأنا واقف، مستغرب، مش لاقي كلام أرد بيه. بس طالما قالت إنه "علم" و"تجارب وخبرات"، شكلي هسكت وأتفرج.
ليست هناك تعليقات:
إرسال تعليق