حكاية بنت فاضيه خريجة جامعه نصف متعلمه، محدش غيرها متجوز في عائلتها. و إللي إتجوزت إتطلقت. عائلتها مفككه من أب قاسي و بذئ و أم صامته و لئيمة. متعرفش إيه حكايتهم، الفضى و لا الإنتقام و لا ولاد الحرام
الوقت إللي هي صاحيه فيه محدش معاها في البيت. جوزها بيشتغل و بيرجع يأكل و ينام. عايشه من غير شغل ولا قراءة ولا حتى هواية. قاعدة و خلاص. هي شايفه إن لازمتها على القد. مش عاوزه تخلف، أصلها لازم تختبره الأول. تشوف صبره و إحتماله قد إيه. هينفع يكون أب لها بدل أبوها و لا هيكون مجرد زوج
فبتتكلم كتير مع أهلها و معندهاش غير الكلام و معندهاش غيرهم بتزورهم و بيزروها. و كل أصحابها و أقاربها فاضين من غير شغل و لا مشغله. الكل بيتكلم و بيحكي. عملت ايه و صرفت ايه و اشتريت ايه و راحت فين وجيت منين
البنت الوحيده اللي متجوزه، بتطلع كلام محدش غيرها عارفه أو عرفوه بس مبقوش عايشينه. هي مش وحشه بس أستوحشت. الفراغ ملى قلبها و عقلها و جبلها المرض. سمعت كلامهم و كرهت عيشتها. و الراجل لا حول له و لا قوة. الدنيا زنقت جامد، الصبح خناقه على المصروف و بالليل خناقه على الفضى و بينهم مكالمات خناق على انت سايبني لوحدي و مش عاوز تكلمني. بتحاول تحاوطه و تخنقه و تفطسه
هوصلك لآخر قدرتك على الإحتمال، هطلع فيك القطط كلها. هتخانق و أزعق و أصرف و أنزل و أمتنع و أكذب و أكيد. كل حاجه هعملها فيك و لو لسه بتحبني لازم تستحمل. أصل أنا دلوعه، و حبوبه العيله. أصل أنا الوحيده إلي لسه متجوزه
خنقت نفسها و خنقت جوزها و بوظت حياتها. و لسه بتحكي و لسه بتسمع و لسه مصدقه نفسها و هي بتموت كل يوم ميت مره علشان هو مش بيسمع و لا بيشوف و لا بيهتم. بيقولوا لها لازم يستحملك أو تمشي. لازم تتطلقي، إبعدي عنه دا مش قادر يكون راجل. إهربي يا بنتي من الجوازه ده، إخرجي منها بكل المكسب. خدي كل فلوسه و عفشه و خدي الذهب و القايمة و المؤخر و خدي كمان النفقة، إعصريه و خليه يفلس. سمعت و وافقت و صدقت. و نسيت إنها ظلمت نفسها و ظلمت جوزها و ظلمت بيتها
و إتطلقت
ليست هناك تعليقات:
إرسال تعليق