#طريقتي_في_تربية_أولادي
عارف المثل اللي بيقول: "عامل الناس كما تحب أن تُعامَل"؟ ده بالظبط اللي بيحصل بين الإخوات في البيت. الطريقة اللي ابنك بيتعامل بيها مع إخواته، هتكون نفس الطريقة اللي هيلاقوها منه لما يكبروا، وهتكون نفس الطريقة اللي هيعاملوه بيها بعدين.
لو هو طيب وحنين عليهم، بيسمعهم وقت ما يكونوا زعلانين، وبيشاركهم فرحتهم، هيكبروا وهما شايفينه السند والأمان. هتلاقيهم أول ناس بيجروا عليه لما يحتاج حاجة، وأول ناس بيفرحوا لفرحه. ولو كان بيتعامل بتعالي أو أنانية، بيتريق عليهم أو بيستقوى عليهم، فطبيعي لما يكبروا هيبقوا بعيدين عنه، ولو احتاجهم ممكن يلاقيلهم مشغولين عنه، زي ما هو كان مشغول بمشاعره بس.
البيت هو المدرسة الأولى للعلاقات، ولو ابني مش متعود على احترام مشاعر إخواته، ولا يعرف يعني إيه يراعي حد غير نفسه، هتبقى عنده مشكلة في التعامل مع الناس برا كمان، لأن اللي بيتعلمه في البيت بيبقى الأساس لكل حاجة بعد كده.
الموضوع بسيط جدًا، لو عاوز ابني يلاقي حب ودعم من إخواته طول عمره، لازم أساعده من وهو صغير إنه يكون هو كمان مصدر حب ودعم ليهم. عشان في النهاية، اللي هتزرعه النهاردة، هو اللي هتحصده بكرة.
