أدم و حواء بقى عندهم أولاد كثير و أولادهم خلفوا أولاد و بقى عددهم كثير جدا . و مع مرور الوقت ، بدأوا يغيروا الطريقة الي علمها لهم أبوهم أدم لعبادة ربنا و صنعوا أصنام بأيديهم من الحجاره و سجدوا لها و عبدوها من دون الله . و كمان أطلقوا عليها أسماء زي وُدا و سُوَاعا و يَغُوث و يَعُوق و نَسرَا
فربنا بعتلهم بني إسمه نوح ، ربنا إختاره و علمه رسالة يقولها للناس ، علشان يفكرهم بربنا الي خلقهم و خلق قبلهم كل حاجه زي الأرض و السماء ، و الزرع و الماء ، و إداهم العقل و العين و الأذن . و بيقول لهم إعبدوا الله وحده و لا تعبدوا الأصنام
و لما بدأ يدعوا الناس ، في ناس كثيره كانت ضده ، و كانوا بيقولوا عليه إنه فقير و بيسألوا ليه ربنا إختاره . بس هما مكنوش عارفين إن إختيار ربنا مش بيعتمد على الغنى و الفقر ، إختيار ربنا بيعتمد على الإخلاص و الطاعه لله . و كثير جدا من الناس رفضت تسمعه و كانوا بيغطوا أذانهم بهدومهم و بصوابعهم علشان ميسمعوش كلامه . و نوح فضل يدعوا الناس ٩٥٠ سنة و الناس مش عاوزه تسمع و تفهم
و بعد السنين ده كلها دعا عليهم نوح عليه السلام بالموت و ربنا إستجاب له و أمره إنه يصنع سفينه كبيره في الصحراء ، و كان الناس بيضحكوا عليه لما بتشوفه وهو بيصنع السفينه في الصحراء . و لما خلص نوح عليه السلام السفينه ، ربنا أمره إنه يركب معاه الناس إلي سمعت كلامه و أمنت بربنا و كمان يحط فيها من كل زوج من كل الحيوانات
و في يوم العذاب ، ربنا أمر السماء تنزل مطر منهمر و أمر الأرض تطلع ماء من كل مكان . و بدأت الماء تملى الأرض و ترتفع الأمواج و الناس بدأت تهرب للجبال و تغرق و تموت . و نوح عيه السلام شاف إبنه و هو بيهرب مع الناس للجبل و قاله إركب معايا و أعبد ربنا , الإبن رفض و غرق في الماء مع كل الناس
و بعد ما العذاب خلص ، ربنا أمر السماء توقف المطر و الأرض تبلع الماء . و الناس الي ركبت بس في السفينه مع نوح عليه السلام نجوا من الغرق و بدوأ يعمروا الأرض من تاني و هما بيعبدوا الله وحده ، لا شريك له
ليست هناك تعليقات:
إرسال تعليق