بعد ما سيدنا أدم و أمنا حواء نزلوا على الأرض علشان مسمعوش كلام ربنا و أكلوا من الشجرة الممنوعه ، نزل كمان معاهم إبليس الشيطان . كان أدم و حواء لوحدهم على الارض ، مفيش بني أدمين معاهم . بس كان موجود معاهم الحيوانات و الزرع
بعد سنين ، أدم و حواء بقى عندهم ولدين ، قابيل و هابيل . قابيل هو الكبير . و الولدين بقوا بيشتغلوا مع أبوهم أدم . كان قابيل بيشتغل في الزراعه و هابيل في رعاية الحيوانات زي البقر و الغنم . قابيل كان شديد و قاسي بس هابيل كان طيب و هادئ
و لما كبروا ، أبوهم أدم قالهم عاوزين نشكر ربنا على الرزق الي بيبعته لنا و كمان نشكره على الصحه الي بيديمها علينا ، و أمر كل واحد فيهم يحط من المحصول بتاعه على الجبل علشان الحيوانات و الطيور تأكل منه . هابيل الطيب راح و جاب أحسن خرفان و جهزهم و راح حطهم على الجبل للحيوانات و الطيور يأكلوا منهم . و كمان قابيل القاسي عمل كدا ، بس قابيل إختار أسوء زرع و أردئه ، و راح حطه على الجبل . كدا هابيل الطيب قدم لربنا أحسن هدية و قابيل القاسي قدم أسوء هدية
و بعدها راح أدم الأب مع أولاده ، قابيل و هابيل ، علشان يشوفوا و يطمنوا على الهدايا بتاعتهم إلي قدموها لربنا . هدية هابيل إتأكلت كلها و بقاش منها حاجه ، لكن هدية قابيل مفيش حيوان و لا طير أكل منها و فضلت زي ما هي علشان رديئه . و هنا هابيل فرح و شكر ربنا ، و قابيل غضب جدا و إتغاظ من أخوه وقاله ربنا قبل منك الهدية و مقبلهاش مني علشان إنت أحسن مني . فقاله أبوه أدم ، ربنا قبل هدية هابيل علشان هي هدية طيبه و لكن هديتك كانت سيئه و رديئه
وهنا الشيطان راح وسوس لقابيل و قاله روح إقتل أخوك علشان تبقى إنت الكويس و يبقى مفيش حد أحسن منك و قرر قابيل القاسي ينتقم من هابيل الطيب و يقتله . و لما قابيل مسك أخوه هايبل و رفع إيده علشان يقتله ، هابيل الطيب قال له أنا مش هرفع إيدي عليك و أقتلك ، أنا بخاف من ربنا
و كدا قابيل القاسي قدر يقتل أخوه هابيل الطيب و بقى مش عارف يعمل إيه في الجثه بتاعته و بقى حيران . يعني يسيبه و الحيوانات و الطيور تأكله ، ولا يعمل معاها ايه . و بعد كدا شاف غراب بيحفر في الأرض و بيدفن غراب ميت ، فعمل زيه . و بدأ قابيل القاسي يحس بالندم و الحزن على نفسه و على أخوه الي موته . و عاش قابيل حياته كلها ندمان و حزين لحد ما مات
ليست هناك تعليقات:
إرسال تعليق