الحياة بين الجد و الفن

دائما بنقول إن الإنسان الي مش بيعرف يتذوق الفن بيكون إنسان همجي ، إنسان لا يعرف الذوق ، إنسان معندهوش حس مرهف . مش بتكلم عن نوع معين للفن لأن لكل شريحه ثقافتها و فنها ، بتكلم عموما ، عن التذوق في الفن

وكمان بنقول إن الإنسان الغير مشغول بعمل ، إنسان فارغ ، إنسان مش جد ، يعيش الحياه بدون هدف و بدون وجهه . يعيش عاله على المجتمع ، يتلمس الصدقه و الرأفه في أعين الناس و جيوبهم

الفكره هنا ، انك تلاقي إنسان فنان ، محترف تذوق و حس مرهف و تيجي تشغله تلاقيه فارغ ، بدون هدف

احنا محتاجين التوازن يكون في المجتمع بين حياة الفن و حياة الجد ، لأن لو الفنون الجميله إحتلت مكانه أكبر و أعلى من الطبيعي على حساب حياة الجد ، هيتكون مجتمع بدون وجهه و يعيش على الرأفه و الصدقه

علشان نوصل لشجره كاملة النمو و تعطي ثمار يعتمد عليها ، محتاجه جذور قوية و متعمقه في التربه . نمو الجذور بيكون جوا التربه للبحث عن الماء ، بس لو انا بسقي الشجره كل شوية بماء قليل ، تلاقي الجذور بتنمو على سطح التربه . و دا بيخلي الشجره ضعيفه متستحملش ثمار كثيره

و كمان بيخلي الجذر ينشف بسرعه نتيجة درجه حراره سطح التربه العالي . او يشرب الماء بسرعه فيحصل إختلال في تركيز الهرمونات جوا الشجره ، فتسقط الأزهار و بالتالي لاتثمر

علشان كدا الري بيكون بكمية محدده و أوقات محدده على حسب طبيعة الشجره و عمرها و كمان وقت الري يعني أثناء التوريق و لا التزهير و لا الإثمار