فيلم تانجرين

أكبر مقوله معروفه في مجال الحرب ، هي الحرب خدعه . الخدعه بتتعمل على الأعداء ، خدعه في وقت الحرب ، في طريقه الحرب ، و كمان في الإعداد للحرب

الغريب إنك تلاقي ناس ، بتبيع نفسها للحرب ، بيشتغل محارب ، حاجه غريبه ، مقاتل مأجور ، التنافس مش بيكون على حاجه مفيده ، التنافس بيبقى على من هيموت الأول و من هيموت الآخر

فيلم تانجرين ، بياخد لمحه من حياة مقاتلين مأجورين متنافسين ، ضربوا بعض بالرصاص ، و كانوا على عتبة الموت . واحد غريب عنهم أنقذهم و عاشوا في بيت واحد ، كلوا و شربوا مع بعض . في الأول كانوا بيكرهوا بعض و بيتمنوا يموتوا بعض ، ومع الوقت لقوا إنهم مخدوعين . ملعوب بهم ، مستغلين من تجار الحرب

عاشوا مع بعض ، بس ملحقوش ، هجم عليهم مجموعه مكنوش مصدقين إن الصداقه معناها أعمق و إن الحريه أكبر من الحرب ، قتلوا واحد منهم و التاني كان بيدافع عنه . إتقلبت الأيه . أفلا يتذكرون

فيلم قوي في معناه ، مؤثر في نتيجته

عقل المجتمع و قلبه

لو حبيت أشبه جسم الإنسان بالمجتمع إلي بنعيش فيه ، هيكون كل عضو داخل الجسم بيمثل شريحه في المجتمع .و كل عضو في الجسم بيكون له سلوكه و وظيفته يعني كل شريحه في المجتمع هيكون لها سلوكياتها و وظيفتها

الفكره الأولى هنا إني لو حبيت أعمل جسم إنسان واحد يبقى لازم أجمع أعضاء الجسم المختلفه جنب بعض ، و بالمثل علشان أصنع مجتمع واحد هيكون لازم أجمع شرائح المجتمع المختلفه في سلوكياتها و وظائفها برضه جنب بعض

و طبعا هيكون في تفاعل و تداخل و تكامل بين أعضاء الجسم و بعضها ، و بالمثل هتكون الشرائح المختلفه تتفاعل و تتداخل و تتكامل مع بعضها . و بالتالي الجسم الواحد يقدر يفكر و يتحرك و كمان المجتمع الواحد يقدر يفكر و يتحرك

الفكره الثانيه بقى هي ان جسم الإنسان فيه أعضاء حيوية مسؤوله عن حياته و أعضاء ثانوية ممكن يعيش بدونها و بتبقى مسؤوله عن وحدته و تكامله . فهل في المجتمع شرائح حيوية مسؤوله عن حياته و شرائح ثانوية مسؤوله عن وحدته و تكامله و بالتالي اقدر أستغنى عنها

إلي هيسقي النهارده ، هياكل بكرا

 

في الزراعه ، نوعين من الماء . ماء الحنفيه و ماء مخصص للزراعه

الإتنين مختلفين عن بعض . ماء الحنفيه ، ماء نظيف ، صالح للشرب ، من غير لون و منزوع منه الرائحه

ماء الزراعه ، ماء صرف (مجاري) مكرر ، غير صالح للشرب ، له لون بني ، وله رائحه سيئه

ماء الحنفيه يضاف عليه كلور و ملح و له حموضه معتدله ، إنما ماء الزراعه له ما له و عليه ما عليه

ماء الحنفيه سعره غالي و ماء الزراعه سعره رخيص

إنت بقى حر تسقي بإيه و هتدفع كام ، بس إلي هتسقي به النهارده ، هتاكل منه بكرا

ملايين الخلايا

جسم الإنسان بيتكون من ملايين الخلايا ، كل الخلايا ده خرجت من ٣ أنواع من الأنسجه ، الأنسجه المكونه للزيجوت إلي هو البويضه الملقحه

علشان كدا تلاقي أنواع خلايا كثيره مشتركين في الخليه الجد لهم . و تلاقيهم مش موجودين جنب بعض ، لا ، دول أنسجه ملهاش دعوه ببعض . زي مثلا نسيج الكبد و الرئه ، تلاقيهم مشتركين مع بعض في النسيج الجد . و نسيج العظم و العضلات مشتركين برضه في النسيج الجد

و علشان كدا تاخد بالك من إنتشار السرطان ، تلاقيه بينتشر أكثر في الأنسجه المشتركه في الجد و هيفكر مرتين لما يروح لنسيج تاني ميعرفهوش

زرعة إسترونج إندبندنت و ضعيفة

كل كائن من الكائنات الحية بيكون عنده طرق يحمي بها نفسه و يحافظ بها على حياته و على نوعه . كل الكائنات الحية المتحركة عندها جهاز مناعي يحميها من الغزو و يحميها من الموت ولكن النباتات و هي كائنات لا تتحرك و لا يوجد عندها جهاز مناعي

الزرع بيكون عنده مقاومة طبعا للغزو سواء الميكروبي أو الحشري و كمان عنده القوة على مواجهة القوارض و الديدان بدون ما يتحرك . حقيقي المملكة النباتية هي من أقوى الممالك الموجوده و المحافظه على كونها إسترونج إندبندنت طوال الوقت

الزرع بيقدر يقاوم من خلال المواد الكيميائية المفرزه من خلاياه و بيستخدم قدرته الفيزيائية و الميكانيكية القوية لمقاومة العوامل الطبيعية الشرسه و لكن قوته تعتبر ضعيفة و قدرته تعتبر محدوده نتيجة عدم وجود ذاكرة تقدر من خلالها الزرعة تتذكر أحداث الماضي و تعمل حسابها للمستقبل

صناعة القدوة

من أهم العوامل الي بتفرق في مستقبل الطفل هو وجود القدوة أو بالمعنى الأدق هو صناعة القدوة . في مرحلة الطفوله تلاقي الأولاد متعلقين جدا بالأب و الأم و مش شايفين في الحياه حد غيرهم و بالتالي أي تصرف نابع من الأب و الأم تلاقي الأولاد بيقلدوه و بيعتبروه هو دا الصح . و طبعا بنبقى مبسوطين علشان أولادنا زينا . هنا الأولاد بيعملوا زينا علشان هما بيحبونا

وبعد كدا ، الأولاد بيبقى عندهم شخصياتهم المستقله و بيبقى عندهم و عي ، و مع تجاربهم و إحتكاكهم بالمجتمع ، تلاقيهم بيسألوا عن تصرفاتنا و إختياراتنا . و تلاقي الأسئله من نوعية ليه يا بابا انت بتعمل كدا و ليه حصل كدا وليه فلان عمل كدا . و هنا هما هيصدقوا كلامك حتى لو معجبهمش . وهنا الأولاد بيعملوا زينا علشان هما بيثقوا فينا و في رأينا

و مع مرور الوقت تلاقي شخصيات مختلفه بدأت تدخل حياتهم ، من النادي ، من المدرسه ، من الجيران . أطفال زيهم و أمهاتهم و أطفال كبيره عنهم و تبدأ معاها فترة صراع داخلي . تلاقي دخل في حياتهم ناس بيقولوا متعملش كدا انا شفت فلان طلع غلط او فلان في التمثليه حصله عكس كلامك . و يبدأ الأولاد يفكروا في كلامك من تاني و يدخلوا في صراع مع نفسهم و مع إلي إتعودوا عليه. المهم هنا جدا إنهم يرجعولك و يسألوك ، و المهم إنك تكون صاحي و مهتم لمشاكلهم و صراعاتهم

الأبوة فتره بتبقى قصيره في حياة الطفل و الأب كقدوة دوره بيصغر مع الوقت . وهنا لازم دورك في حياتهم يتغير و المفروض بتبقى صاحبهم . صاحبهم الي مش هيحكم عليهم و الي هيفهمهم و يحكيلهم تجارب ناس تانيه و نتيجة أفعال حصلت . فترة الأبوة حوالي ٦ سنين بس في حياة الطفل

علشان كدا هتبدأ تصنع لهم قدوة ، او هتصنع معاهم قدوة ، قدوة مناسبه لشخصياتهم مش عكسها . قدوة تصرفات مش قدوة لبس و شكل . ممكن تصنعها من شخصية في مسلسل ، شخصية من كارتون ، شخصية من حكاية او شخصية من الناس

مسلسل جميل و هناء

دائما الراجل بيبقى عاوز يعيش في هدوء و سلام . بيرجع من شغله علي بيته يلاقيه مرتب و نظيف و مليان دفء . فتلاقي حياته بقت مترتبه و دماغه بقت مظبوطه . و دائما تلاقيه بيحاول على قد ما يقدر يحل المشاكل كلها علشان يعيش مستريح و باله مش مشغول

إنما بقى يكون هو مفتعل المشاكل ، هو الي بيهد الهدوء الأسري دا ، هو السبب في ان الدنيا تتلغبط و البيت يلف في دوامة مشاكل

المسلسل دا بيحكي عن راجل نفسه مراته تغير عليه ، هي واثقه فيه بأقصى درجه و مش مخوناه خالص و مش متخيله انه ممكن يعمل حاجه . و هو مش مستحمل كدا ، عاوز مراته دائما قلقانه ، مش عارفه تنام من كتر التفكير ، عاوزها دائما بتسأل عليه و بتسأل رايح فين و جاي منين . و عنده صاحب مؤلف بيعمله حواديت و حوارات علشان يلعبوا بها على مراته و يخلوها تغير . مسلسل كوميدي و جميل جدا و عائلي جدا

الفن و الأخلاق ... إختلاف أم تكامل

الطبيعي أن الفن ينقلنا من عالم الواقع إلى عالم خيالي يفصلنا عن طبيعتنا و عن كل ما هو موجود في لحظتها و يخرجنا عن ذاتنا . و العكس صحيح تماما في العالم الأخلاقي ، فالأخلاق دائما تأمرنا بالتمسك بطبيعتنا الإنسانية و أن ننظر إليهما بعين الواقع الحقيقي الذي نحياه لتحسينه

و لكن من دعائم الثقافة الأخلاقيه هي أيضا حث الفرد على الخروج من ذاته و العمل على دعم الروابط الجمعية للمجتمع الواحد

على ذلك يتضح أن الفن لا يصرفنا عن الحياة الأخلاقية نتيجة الخروج عن ذاتنا و لكن لأنه يصرفنا عن الحياة الواقعية و الحقيقية التي نحياها . فوجه الشبه بينهما هو إخراجنا عن ذاتنا و وجه الإختلاف هو أن الثقافه الفنيه تربطنا بالخيالات و الثقافه الأخلاقيه تربطنا بالواقع

و بالتالي لا نستطيع أن نقارن العادات التي تنميها الثقافة الفنية بالعادات الأخلاقية إلا مقارنة جزئية . ولا نستطيع أن نأخذ الأخلاق من جانب فني لأن ثقافه الأخلاق تدعوا للنظر إلى القبح و البؤس لنوجد الدواء بينما الثقافه الفنيه تدعوا للتأمل و الحلم

في النهاية التربية المعتمده على الناحية الفنيه فقط تنتج أجيال يقتصر سموها الأخلاقي على الخروج من ذاتها و الدخول في الأحلام الجميله فيصبح عندهم مثل عليا خامله و غير فعاله وقد تصل لكونها غير واقعيه

الإجهاض في شجرة المانجا

عملية التزهير و الإخصاب في الشجر بتعتمد أساا على عوامل الجو زي درجة الحراره و الرطوبه . شجرة المانجا بتبقى محتاجه حراره معتدله علشان يحصل إخصاب و تكوين جنين للثمره . و لما الشجره تتحط في درجة حراره غير مناسبه زي البرد و الحر الشديد أثناء عملية الحمل ، يحصل إجهاض للثمره و تلاقي المانجا الناتجه صغيره و البذره رفيعه و رقيقه

النوع دا من المانجا بيبقى إسمه مانجا فص . و ده بتبقى مانجا صغيره وطعمها مسكر و حموضيتها أقل . و طبعا الطلب بيبقى عالي عليها لأن محدش هيغامر و يجهض شجرة المانجا عنده ، تقريبا بيحصل إجهاض بنسبة 1 % من إجمالي الشجره

يعني المانجا الفص مش بتتزرع ، دي مانجا بتيجي من شجرة العويس بس مكملش حملها

خلية سرطانية

السرطان بيحصل في نوع خلايا معين . يعني تلاقي السرطان في نوع عضلات معين و تلاقيه ظهر في الرئه ، دا مش سرطان رئه ، الرئه فيها نسيج للرئه و كمان نسيج عضلات ، فيكون السرطان للعضلات مش للرئه

دا غير فكره إنتشار السرطان ، الإنتشار عباره عن مجموعه من خلايا السرطان راحت و قعدت وسط نسيج تاني غير نسيجها و في عضو تاني . يعني مثلا سرطان العضلات ، تلاقي خلايا العضلات السرطانيه راحت و اتزرعت وسط نسيج الرئه . و طبعا إلي بيقدر يعرف هو دكاترة الباثولوجي ، لأنهم عارفين شكل كل نوع خلايا و كمان عارفين أماكنهم

روح برائحة الفجر

بكل هدوء و لطف بتصحيه و بتقوله وقت الفجر بدأ . بتهمس و تقوله إتوضأ عقبال ما الأذان يأذن . بتفتح بلكونة الصاله لتدخل نسمه هواء جميلة و عذبة تملئ جو الصاله برائحة الفجر المميزه . بعد دقائق من الصلاة بدأ العزف الجماعي لمجموعه من العصافير على شجره أمام البلكونه . بتشغل الراديو على أغاني صباح أو فيروز و بيشربوا القهوه سوا و يطبع علي يدها بوسه و ينزل كل واحد منهم لشغله

دي قصة مش هيفهمها إلا إتنين عاوزين يعيشوا مع بعض و يتشاركوا الحياة و جمالها مع بعض. إثنين بيحترموا شخصيات بعض و بيحترموا حدود بعض. محدش بيضغط فيها على التاني و كل واحد بيعمل إللي يقدر عليه. الثقة المتبادلة و التناغم بينهم بتخلق روح تجمع بينهم . روح لها رائحة الفجر

عالم الحكايات

محدش يقدر ينكر إن اللعب هو الطريقه المثاليه للترفيه عن الأولاد . الألعاب بتنمي روح التعاون و روح الشجاعه عند الأطفال . في لعبة جميله جدا و مفيده جدا لتنمية روح الخيال. اللعبه عباره عن تأليف حدوته ، مينفعش واحد بس يلعبها لازم أكثر من واحد . الإختيار الوحيد إلي في اللعبه هو في بدايتها . بتختار مكان أحداث القصه هتبقى فين ، يعني في البحر ، في الصحراء ، في الفضاء مثلا. و بعد كدا كل واحد له دور ، هيحكي حته من الحدوته و المفروض تكمل الحكايه في دورك

اللعبه عباره عن ورقه عليها طريق بتمشي فيه ، فيها خطوات لها بداية و نهاية ، فالحدوته لازم يبقى لها نهاية. و انت ماشي هتلاقي حاجات إيجابية تساعدك و حاجات سلبية هتعطلك ، إنت و حظك ، أو إنت و ذكائك هتستخدمهم إزاي

اللعبه بتعلم الأولاد ، يفكروا ، يخططوا ، يحسبوا خطواتهم ، يتخيلوا ، يتعاونوا ، اللعبة بتنمي عندهم الثروة اللغوية و قدرتهم على رسم صورة و قدرة على ربط الأحداث و إستخدام الموارد الي في إيديهم

بصراحه من أفضل الألعاب إلي حبتها و الأولاد كمان حبوها ، و أكثر لعبه مش بتقلب بخناقه في الأخر

تخيل بقى لو سجلت الحدوته الي بتتحكي ، هيكون رد الفعل إيه

اللعبه من صفحة عالم الحكايات مع آيات

فيلم الباب الأخضر

فيلم مصري بيتكلم عن التجارب الإكلينيكية اللاأخلاقية و خاصة في مجال الطب النفسي و إستخدام أدوية غير معروفة للتحكم في الطبيعة الإنسانية . أدوية بتخلي الإنسان لا يفكر و يعطي ردود فعل محسوبة و تكون أفكاره سهلة التغير و بالتالي سهل التحكم في مشاعره و بالأخص هويته الوطنية

و بيتكلم على مدى تغلل الشركات الكبرى في النظام الطبي و قدرتهم على التحكم في ذمم و حياة العاملين فيه و مدى تخليهم عن مبادئهم و أخلاقهم في سبيل المادة أو سبيل العلم و التجربة

غش بذكاء الكمبيوتر

قرأت مقال من فترة عن حالات غش تعتمد على ذكاء الكمبيوتر في التوقع . كلام غريب بس في عالم الشطرنج مش غريب ، مستوى ذكاء الآلة بيوصل لمرحلة عالية جدا من التعقيد نتيجة وجود آلاف الحركات و الخطط و ذكاء الإنسان يظل دائما محدود أمامها

فكرة الغش هنا أن اللاعب يقوم بتقليد خطط الكمبيوتر لإيقاع الخصم في شبكة من الحركات المعقده و بالتالي يفقد الخصم سيطرته على القطع و يخسر

هنا الغش يعتبر في إستخدام ذكاء أعلى من ذكاء الفرد لمحاربة ذكاء فرد آخر ودا شئ عجيب بصراحة . يعني أغش لما أستخدم الكمبيوتر في اللعب و التوقع . و علشان يواجه المحكمين هذه الحركة في مباريات الشطرنج تلاقي ناس متخصصه في نقل نفس حركات اللاعبين مع الكمبيوتر و حساب مدى توافق حركاتهم مع حركات الكمبيوتر . و طبعا يعتبر اللاعب غشاشا إذا زادت نسبة التوافق عن ٨٠ ٪ ... تخيل

التسميد

 

في طريقتين لتسميد التربه ، الأولى تستخدم سماد عضوي زي روث البهائم و الأحصنه او زبل الحمام و الفراخ ودا بيمد الأرض بكميات كبيره من النيتروجين و الكبريت ودا مفيد جدا للزرع و لتسميد التربه قبل عملية الزراعه

المشكله بقى إن بقيت المكونات من منجنيز و ماغنسيوم و فسفور و بوتاسيوم و زنك و كوبالت بيبقوا كميتهم قليله جدا جدا و بالتالي ميحصلش تسميد كامل و تلاقي النبات قوي بس من غير أزهار أو ثمار . غير كدا بتلاقي رائحة التربة سيئه و الرائحه بتدوم لأيام . المشكله الحقيقية بقى إن الروث يكون فيه دود ، زي الدوده الشريطية مثلا ودا بيبوظ الدنيا

علشان كدا الطريقه التانيه بتبقى أحسن و بتحمي الأرض من الدود و هي انك بتحط المكونات كلها بنفسك سواءا ذائبه في ماء الري او تحفر جنب الجذور و تحط الكميه المناسبه . وكمان بتقدر تتحكم في كميتها و وقت تسميدها

المشكله هنا إنك ممكن تحط كمية غير مناسبه لطبيعة زرعتك و طبيعة نموها . زي مثلا لو لسه صغيره و بتكبر هتبقى محتاجه نيتروجين أكثر و لو فيها زهر هتيبقى محتاجه فوسفور أكثر و لو فيها ثمار هتبقى محتاجه بوتاسيوم أكثر . الفكره هنا إن الكميات الغير مناسبه ممكن تنشف الجذور أو تسقط الأزهار أو تطلع الثمار صغيره

الدم

 

الدم بيتكون من ٣ أنواع من الخلايا ، كرات دم بيضاء و كرات دم حمراء و صفائح دموية . كل نوع منهم بيمر بمراحل تكوين و مراحل تنشيط . من الأول كدا ، خلايا الدم بيتكونوا من خلال إنقسام الخلايا الجذعيه المسؤله عن الدم و الخلايا الجديده بتمر بمراحل تطور و شكلها يتغير لحد ما توصل للشكل الناضج و بعد كدا تنشط بوظيفتها . التكوين بيبقى على حسب ما جسم الإنسان يحتاج

كل مرحلة تطور ممكن يحصل فيها سرطان ، يعني عدد أنواع سرطان كبيره في سرطان الدم لوحده . علشان كدا من الصعب تحديد نوع السرطان بمجرد النظر ، دا محتاج أجهزه و تحاليل و صبغات علشان نعرف نوع السرطان . و كل دا من غير ما اعرف إستجابته للعلاج ، دا موضوع تاني

أجيال النصف و العيشة الهنية

في سؤال مهم بسأله لنفسي و هو لماذا يختار الرجل إمرأة أقل منه ليتزوجها و لماذا تحب المرأة أن تتزوج من رجل يقل عنها

الحقيقة إن في سؤال كمان مهم جدا لازم يتقال برضه ، هو من إلي حدد المقامات ، يعني على أنه أساس تم وضع تقييم الأحسن أو الأقل. موروثاتنا و عاداتنا و ثقافتنا هي إلي بتخلينا نحط الناس في مقامات و كثير جدا من الأحيان بتكون خاطئه . لأنها تعتمد على قصور فهمنا و جمود تفكيرنا زي مثلا دا خريج جامعه لازم يتزوج من خريجة جامعه مثله

في مكان تاني ، تلاقي الرجل له عمله و المرأة لها عملها و مفيش حد أعلى من حد . يعني تلاقي رجل يعمل في التنظيف يتزوج من إمرأة تعمل في التطبيب .مفيش حد أعلى أو أقل لكل واحد دوره و عمله ولكن لعنة الناس تكمن في أعينهم و ألسنتهم

الثقه الكاذبة في النفس مع أصدقاء السوء و تجارب أصحاب العقول الخاليه و حلول من أنصاف المتعلمين تنتج أجيال النصف التي لا ترى و لا تسمع و لا تفقه إلا نصف الحقيقة و لكنها تطلب كل مقامات العيشه الهنية

الفكرة هنا أن الزواج وجد للتشارك و ليس لتغطية عقد النقص أو لإكمال النصف . الزواج هدفه خلق عيشة هنية للرجل و المرأة معا فلا يستطيع الرجل أن يهنأ مع نصف إمرأة و لا هي تستطيع أن تهنأ مع نصف رجل

أربع كلمات

أربع كلمات سحرية لازم تقولهم لأولادك كل يوم . كل يوم يعني كل يوم . و مش مره واحده في اليوم . كل موقف ، كل حركه و كل نفس

الكلمات هي أنت إنسان لطيف ، إنت إنسان ذكي ، أنت إنسان مهم ، أنا بحبك

الطفل لما بيسمع كل يوم من أبوه و أمه الكلام ده ، بيبدأ يحس أنه أهم واحد في الدنيا في عنيهم ، يحس أنه في أمان من إحتياجاته ، يحس بالدفئ و المحبه . دا طفل يطلع سوي نفسيا ، متوازن في إنفعالاته ، و متعاون بيحب المشاركه. الطفل دا بيتربى على كونه أب

عنده حنيه ، عنده تسامح ، عنده شجاعه ، وعنده حسن خلق

أربع كلمات بس ممكن يغيروا حياته كلها لو إتربى عليهم و دخلت في شخصيته

فاتن أمل حربي ... إسهال إجتماعي تم علاجه بالمليات

بخلاف أن المسلسل يجسد فكر و رأي فردي بحت و هو الإبراهيمي العيسوي و ليس الواقع الحقيقي

و بخلاف الإستمرار في عرض نفس القضية كل حلقة بدون غرض واضح إلا للتأصيل لفكرة الزوج الخائن و الزوجة المطحونة

و بخلاف أن المسلسل يبين أن الزواج عبارة عن سجن - نسوي - بكل معاني السجن من منع حرية و فرض رقابة و مساومات و إهانات

و بخلاف تأصيل فكرة الحماة - أم الزوج - التي قتلت سينمائيا من فترة زمنية بعيدة

و بخلاف الإسهال في كمية الصراعات التي تواجهها المرأة في المجتمع - النسوي النزعه و الرجولي التشريع - و عدم قدرتها على مواجهته إلا بالإتحاد معا و الثورة عليه

و بخلاف إفتراض حالة زوجية خبيثه و لا وجود لها في الحقيقة من زوج فاسد و طماع مع زوجه مستيكنة و مستسلمة و ضعيفه

و بخلاف أن المسلسل يؤكد فكرة أن العنف على المرأة هو في الحقيقة سببه إمرأة أخرى ربت رجل إتكالي غبي متكاسل

و بخلاف إختيار أسماء الممثلين الغريبة و لكنها ذات معنى عيسوي درامي جدا

و بخلاف عدم الوضوح في فكرة المسلسل و هل يناقش صعوبة الحياة الأسرية أم أكذوبة الحياة الإجتماعية أم صعوبة التقاضي فيما بعد الطلاق

و بخلاف أن الحقيقة الإجتماعية هي أن الحكومة والقومي للمرأة وضباط الشرطة والجيران والأصدقاء والعائلة في صف المرأة أصلا ، فمَن يُدين المؤلف في قصته ؟ إنه دائما الفقه الإسلامي و دائما فكرة الفقه الإبراهيمي و التشريع العيسوي هو الحل السحري للنجاة بالمجتمع

و بخلاف وجود بعض الشخصيات الملحقة بالقصة - المعيبة في فكرها - و التي صنعت خصيصا لإثبات وجهة نظر واحده و هي أن النساء - و خاصة المطلقات - ملهاش غير بعض . بخلاف أن المجتمع الحقيقي يبتعد كل البعد عنهمدن و أن النساء المتزوجات يرونها مطمعا قد يقع فيه أزواجهم فيبتعدوا عنهم و يعزلوهم

و بخلاف الدور الثانوي جدا - المحذوف من القصة أصلا - للسيدة التي جمعت توكيلات حقيقية للترشح لرئاسة مصر و هل لها معنى في بطن - إسهال - المؤلف أم مجرد إحتياج مالي أو فني للممثلة

و بخلاف إدخال الفكر الديني المتعصب و القاتم و المكره على الحياة بلحيته و عيونه - المبرقه - و صوته العالي

و بخلاف إظهار الأئمة و المفتين أنهم مجرد مشتغلين في الدين و لهم حياة و أطماع - فيسبوكية و تكتوكية - شيطانية خبيثة

و بخلاف إختيار جامع لصلاة الجمعة به أربعة أماكن لمدارس الفقه إلا أن الصلاة لا تكن إلا في ناحية واحده دائما كتصوير بأن الفقه القانوني ما هو إلا رأي فقهي واحد فقط

و بخلاف أن القائمين على المراجعة من ألمع الناس إلا أنه لا يوجد طبيب نفسي واحد حقيقي - يوحد ربنا - لوضع المواضيع النفسية في نصابها و إستخدام قراءة القرآن لتهدئة النفس كحل وحيد

و بخلاف أن المسلسل يعطي إنطباع بأن العنف الأسري مشكلة صارخة تحتاج إلى علاج قانوني و ليست مشكلة مرضية و تحتاج للعلاج النفسي و السلوكي

و بخلاف أن العنف الأسري مشكلة إجتماعية صريحة بين طرفين إلا أنها موجهة ضد الرجل

و بخلاف أن شخصية الأم المضغوطة و التي تكاد أن تنفجر من الأهوال الواقعة عليها إلا أنها تكذب على بناتها و تحاول أن تصور الأب المفتري بصورة الرجل المحترم فتنتج طفولة مشوشه و بالتالي تسمي البنت نفسها بإسم أمها بدل أبيها

و بخلاف أن المؤلف يستطيع بكل أريحية الدخول في الفقه و القوانين الإسلامية إلا أنه لم يستطع حتى أن يذكر القوانين المسيحية إلا في مشهد أو مشهدين فقط

و بخلاف محاولة لتصحيح فكرة المركز القومي للمرأة و دوره في دعم قضايا المرأة و حمايتها إلا أن واجهة قضية فرمونت و حبس الشهود مازالت في الذاكرة

و بخلاف أن فكرة مراكز الأستضافه كانت و مازالت لفرض الإقامة الجبرية و القهرية على النساء إلا أن المسلسل حاول جاهدا لتغير الفكرة و إظهارهم بأنهم مساكن إختيارية و صالحة للمعيشه العادية للأم و كمان أطفالها

و بخلاف عملية التلميع المقصودة لأجهزة الدولة و أنها تحاول جاهدة التوفيق بين المتنازعين و أن التعقيد يأتي من فهم المشرع و الناس للقانون

و بخلاف أن المسلسل مهترئ فكريا

و بخلاف عدم الحبكة الدرامية

إلا أنه

يناقش قضية من أهم القضايا الإجتماعية و يتفاعل مع قانون منظم للعلاقات لكل فئات المجتمع إجتماعيا وإقتصاديا وثقافيا و دينيا . و بدوره يؤكد على أهمية التربية و إنعاكاساتها على البيوت و على بنات الناس

بين قول الصدق و إلتزام به عوض ربنا

الصدق هو قول و فعل الحقيقة بوضوح وهو مخالفة الهوى ، إنما إلتزام الصدق هو حقيقة توافقه مع الحق و العدل و خاصة وقت الإمتحان و وقت الشدة

إلتزام الصدق محتاج إرادة صلبة و عزيمة قوية و إيمان بالله . إلتزام الصدق في كل كلمة و كل خطوة و كل بيع و كل شراء . إلتزام الصدق محتاج بذل جهد كبير في التحري و الإلتزام

وقال قائل (حقيقة الصدق أن تصدق في موطن لا ينجيك منه إلا الكذب )

الصدق شعور باعث على الخوف لأن فيه الحقيقة و أحيانا الخسارة و لكنه أيضا باعث على الراحة لأن من إلتزم به فقد قبل بعوض الله

مذكر و مؤنث

في الزرع تلاقي زرعه مذكر لوحده و زرعه مؤنث لوحده و زرعه مذكر و مؤنث مع بعض . و اكيد إلي بيطلع الثمره هي الزرعه المؤنث و بالتالي لو زرعت النوعين كدا هيبقى في هدر للأرض لأن الزرعه المذكر هتاخد مساحه و مش هتدي إنتاج . وعلشان كدا تلاقي المزارعين بيزرعوا الزرعات المذكره في بداية المزرعه و عكس إتجاه الريح علشان يستغلوا الهواء في التلقيح

و طريقه تانيه هي تركيب ساق نبات مذكر على النبات المؤنث . و دا طبعا بيوفر مساحه كبيره جدا بس مش بيضمن حدوث تلقيح للزهور و خاصة لو النبات بيعتمد على الهواء في التلقيح

و الطريقه الأخيره ، هي عمل التلقيح يدويا ، يعني المزارعين يجمعوا حبوب اللقاح و يلقحوا الزهور المؤنثه بفرشه او يرشوا حبوب اللقاح عليها

في طريقه انا مش مقتنع بها و هي زراعه أكثر من بذره في مكان واحد علشان يشتركوا في جزر واحد وبالتالي يطلع ساق واحد عليه المذكر و المؤنث

طبعا في الأخر زي ما هتراعي شجرة الزرعه المؤنثه ، هتراعي برضه شجره الزرعه المذكره . يعني تسميد و حمايه من الطفيليات و علاج الأمراض و تقليم

صراع سونيك مع بوكيمون شوه الخرفان و أنتج السرطان

زمان زمان في الخمسينات تقريبا كانت مجموعه من الأغنام ترعى في الجبال و كان معظمهم حوامل بالأجنة . و في أكثر الحالات بشاعه ولدت لهذه الأغنام مجموعة من الصغار مشوهين لهم أدمغة صغيره و بأعين واحده

و بعد الكشف و التحليل وجد الأطباء أن المخ لم يكتمل نموه و لم ينقسم لفصين داخل الرحم . و بعد ما بدء العلماء دراسة هذه الحالة الغريبه و وضعوا خرفان أخرى حوامل في نفس المكان وجدوا أن الخرفان التي أكلت عشبه معينه ولدت خرفانا مسوخا برأس صغير و عين واحدة

وبالتالي تم تحليل هذه العشبة و عزل المواد كلها الموجوده فيها و إختبارها و تجريب تأثيرها على أجنة حشرات و أسماك و تم إكتشاف مادة السيكلوبامين cyclopamine

الماده ده بيكون عندها القدرة على إيقاف عمل الجينات المسؤولة عن تنظيم نمو الأعضاء و تحديد شكلها و حجمها و إنفصالها داخل الجسم و أشهر هذه الجينات جين إسمه القنفذ سونيك ودا موجود جوا كل خلايا الكائنات الحية و لما تم إيقاف عمله في فترة النمو الجنيني نمت أجنة الخرفان بمخ غير منفصل و بعين واحده و دا يأخذنا لفكرة أن الأعضاء داخل أجسامنا تتكون ثم تنقسم لعضوين متطابقين و يتحرك كل عضو ناحية مكانه و ينمو منفردا

و لأن عمل أجسام الكائنات الحية يعتمد على سلسلة من الجينات التي تؤثر على بعضها فقد وجد جين آخر ينشط و يعمل بشراسة و شراه إذا ما توقف الجين سونيك عن العمل فيجعل الأعضاء تنمو بسرعة و بدون توقف و يكبر حجمها عن الطبيعي و بالتالي تتسرطن

الباحث إللي إكتشف هذا الجين من شدة حبه لشخصيات ننتيندو أطلق على الجين إسم بوكيمون . و لما كتب بحثه و نشره و إنتشر الكلام ، هددت شركة نينتيندو المالكه لشخصيات البوكيمون برفع قضية على الباحث لإستخدامه الإسم بدون الرجوع لها ، لأنه هيرتبط إسم بوكيمون بالسرطان و بالتالي يدمر سمعة الشركة ، و طبعا الباحث تنازل عن الإسم و أطلق عليه إسم آخر أقل إثارة و سماه جين Zbtb7

فهل السرطان لا يعتبر أكثر من جين منظم توقف عن عمله لسبب مجهول فأدى لعمل جين آخر بشراسة و شراهة و الحل يكمن في إعادة تنشيطه من جديد

و يبقى الأمل

المرأة الصالحه إستقرار و إستمرار

هي التي تجسد حنان الأم و حب العاشقه و خضوع الإبنة . دائما الرجل يتوقع الإهتمام و التقدير من زوجته . لأنها بتعيش معاه أحلامه و إنتصاراته و أمجاده ، حتى لو كانت هي الشاهده الوحيده عليها .هي مشاركه في حياته و إهتماماته و عمله طول اليوم و طوال الحياه

هي المدركه أن الزينه الخارجيه و الجمال له تأثير شكلي بنفوذ قصير الأمد و إنما النفوذ الحقيقي يكمن في جمال الأفكار و رونق الروح و حب العشره

المرأة الصالحة هي مصدر للحياه جوا البيت و جوا الروح و هي مصدر للإستقرار و الإستمرار

التماهي

في شعور بينمو داخل الأطفال ، شعور مسؤول تقريبا مسؤولية كامله عن شخصيتهم و طريقه تفاعلهم و تقبلهم لكل أمورهم الحياتيه . شعور هينشئ معاهم و هيكبر جواهم كل يوم

الشعور دا إسمه التماهي . شعور التماهي دا له شقان ، شق تقليد و شق إرضاء . و دا بيعتمد على جنس الطفل . يعني لو طفل ولد هتلاقيه بيقلد أبوه و بيحاول يرضي أمه و العكس لو طفله تلاقيها بتقلد أمها وعاوزه ترضي أبوها . التماهي شعور بناء و مهم في تحديد أولويات الطفل و مهم في تحديد علاقته بأصحابه و جيرانه بعد كدا

لما الطفل بيكبر و يدخل المدرسه ، تلاقيه الشعور دا طلع من تاني ، و الطفل هنا بيختار المدرسين الي يقدر يتماها معاهم و خاصة عند غياب الأب أو غياب الأم و برضه على حسب جنس الطفل . يعني الولد هيدور على مدرس يسعى لتقليده و مدرسه يسعى لإرضاءها و العكس البنت هتدور على مدرسه لتقليدها و مدرس لإرضاءه

الفكره هنا إن الأطفال هيكبروا و هيبقوا زي أبوهم أو أمهم . يعني لو نشؤا في أسره متزنه ، فيها حب و إحترام و أخلاق . فيها أب متفاهم و بيحترم مراته و فيها أم حنينه و بتعلي من قدر زوجها . هيطلعوا قدوة لغيرهم من الأطفال و هيكونوا أباء و أمهات صالحين

كونوا قدوة لأولادكم أو على الأقل إعرفوا من هم قدوتهم

جزيرة غمام

بخلاف القصة التافه

و بخلاف السيناريو المتكرر و إلي إتهضم مليون مره

و بخلاف الأسلوب المبتذل لعرض قضيا المجتمع

و بخلاف الإدخال السطحي لعرض قضايا الدين

و بخلاف الهبل و الإستخفاف بالعقول لغرض التصديق

و بخلاف سوء النية المبيته لضرب و لزعزعة الأخلاق

و بخلاف التأكيد السافر على أهمية السحر و الشعوذة في معرفة الحقائق

و بخلاف الإسقاطات الهابطة الناتجة عن أشباه المتعلمين

و بخلاف وجود رؤية غير طبيعية و فوق العادة للدين

و بخلاف إستخدام مؤثرات بصرية و صوتية ضعيفه

و بخلاف أغنية التتر الغير مفهومه و الغير مفهوم سياقها

إلا أن المسلسل حاول أن يقرأ حالة الواقع البائس للناس من فقر و عوز و جهل و شر و غرور و طمع و كسل و كفر و تحدي و مقاومة التغير . و حاول أن يربط ما بين دين الناس بدنياهم و معرفة طرق الفتن و إدخال فكرة التصوف الغير طبيعية و إعتبارها الحل الوحيد لمكافحة الأزمات و العفاريت

و طبعا و دائما محاولة العبث بتقسيم فكرة الدين بين الإرهاب ( الشيخ حربي ) أو الحجاب ( الشيخ يسري ) أو الخروج عن سجن الجسد ( عرفات إلي مش شيخ - النجار - المنشغل بالمحبة ) . و ألقى بفكرة السلطة الغاشمة و كيف أصبح (العجمي ) كبيرهم - العادل - بعد طمعه في السلطة و قتله لأخوه الكبير وقت مرضه

و القى بظل خافت جدا على طريقة شيخ الشيوخ ( مدين ) في كتابة فضائح الناس و خطاياهم بأسماءهم وقت سؤالهم الشيخ فيها في كتاب من الجلد و لكنه لم يتطرق للسبب و لكن المعنى الخبيث قد أدخل في السياق بدون مجهود . و لموازنة التأثير الدرامي إضطر المؤلف بإستحداث شخصية الشيطان ( خلدون ) - أي من الخلود - و العايقة و أنهم هم السبب في إظهار معادن الناس و إستعدال ميزان العدالة القائم على المحاسبة الدقيقة للفعل و رد الفعل

مسلسل جزيرة غمام كان الغرض منه صناعة ملحمة إجتماعية بطريقة القصص الخيالية المدعومة بالفكر التراثي و لكنها أنتجت عمل فني يقترب من رواية أولاد حارتنا لنجيب محفوظ بشكل غبي و تافه و ضعيف و يميل بالشخصيات لواقع العبط و العفاريت و الحل هو الخروج من الجسد و إعادة دورة الحياة الأزلية و الغير قابلة للتغير

أشكر المؤلف و القائمين على هذا العبط لمحاولتهم الدائمة الدمج بين قصة النبي نوح و موسى و عيسى و الواقع الذي نعيشه وأحمد ربنا أن القانون يمنع ظهور الأنبياء و الرسل في السيما و إلا كنا شفنا العجب