الإراده و الإختيار خضوع بين العقل و العاطفه

كل حاجه بنفكر فيها و عاوزين ناخد فيها قرار بيبقى لها وجهين ، واحد عقلي و التاني عاطفي . و دائما بيكون في صراعات بينهم . الطبيعي ان التفكير العقلي بيحاول تكوين فكره عامه للموضوع ، فكره لا شخصيه . و التفكير العاطفي عكسه تماما ، يعني بيحاول تكوين فكره خاصه الموضوع ، يعني فكره شخصيه فردية

و دائما القانون العقلي بيكون أقوى و ملزم أكثر من العاطفي . و بالتالي تلاقي دائما العقل يمثل حاجز في وجه أهوائنا الشخصيه

الفكره هنا ان إرادتنا شأنها خضوع عقلي و الإختيار شأنه خضوع عاطفي . هنا هيكون للضمير دور أساسي في تحديد الخضوع . و لكن الضمير لن يعمل في داخلنا إلا بالاستقلال عن المفروض علينا . فهو الإلزام الوحيد لأخلاقية الخضوع

خلايا سيتوبلازمية فقط

هو ازاي الخلايا النباتيه المحاطه بجدار خلوي قوي و سميك بتقدر تتكلم مع بعضها و تتبادل المعلومات و المغذيات و كمان في نفس الوقت ازاي الغذاء و الماء بيتم تبادلهم مع قنوات التوصيل

الجدار الخلوي للنبات بيتكون من 3 طبقات مسؤولين عن الدعم الفيزيائي للزرعه. لكن عند تلاقي الجدر مع بعضها البعض تلاقي منطقه رقيقه جدا و بدون جدار ، يعني شريط رفيع جدا من السيتوبلازم لازق بين طرفي جدارين و يبوصلهم ببعض

السيتوبلازم دا اسمه البلازموديسماتا plasmodesmata . ودا بيكون شريط طويل و رفيع بيربط الخلايا كلها ببعض علشان تقدر تتكلم و تتبادل المغذيات و الماء و كمان يساعد في عملية الإخراج و التنظيف

قصة سرطانيه مش هتصدق حقيقتها

مش هتبقى عارف دا سرطان مرض و لا سرطان تفكير

بنت ١٧ سنة جالها نوع من أنواع الليوكيميا و بدأت علاج و كانت مستجيبه بشكل كويس جدا . الحمد لله

البروتوكول العلاجي أخذ حوالي ٣ سنين علشان يكمل و البنت تخلص علاجها . بس ربنا كاتب عليها إن يكون عندها نوع من الطفرات الجينيه إلي يخليها تأخذ علاج أقراص مدة تستمر بعد ما البروتوكول يخلص

العلاج دا نوع جديد من الأدوية و ثمنها بيكون غالي جدا . الدواء بيتصرف للبنت بصورة مستمرة و بدون توقف

البنت رجعت المستشفى علشان السرطان رد عليها من تاني ، الأم سألتنا ليه و إيه إلي حصل . حققنا و إكتشفنا إن البنت مش بتاخذ دواها . فسألناها ليه كدا وقالت أصله بيعمل إضطراب في الهرمونات و الأم قالت أصلها داخله على جواز فوقفنا العلاج . فسألتها وقفتي من إمتى ، ردت وقفنا من سنة ، ياه من سنة مش بتاخدي دواكي

طب و الأقراص إلي بتصرفيها بتوديها فين ، مردتش عليا . بس أكيد باعتها و جهزت بها بنتها , الله يرحمها

عقلانيا متطرفين و إنسانيا متلازمين ... التفكير و الإحساس

في نوعين من الناس موجودين في كل مكان . ناس بتهتم بالقواعد و النظام و ناس بتهتم بالمشاعر و الأحاسيس

النوع الأول ، الناس إلي بتهتم بالقواعد و النظام ، دول ناس بتعمل واجباتهم من غير تردد و بصوره كامله ، تفكيرهم بيكون متين و إرادتهم قوية ، معندهمش حاجه إسمها عاطفه في الشغل ، تكسبهم لما تخاطب عقولهم ، بيبقى عندهم ثبات و عزم ، عندهم بروده و قسوه في التعامل مع المتغيرات المفاجئه ، عندهم رضا و قناعه بشكل عالي جدا ، مش بياكلوا حق حد ، و لا بيعتدوا عليه ، مستحيل يضحوا بنفسهم علشان خاطر حد أو علشان فكره

النوع الثاني ، الناس ال مش بتهتم بالقواعد و النظام ، مش بيقيدوا نفسهم بظروف أو شروط ، بيتحركوا على حسب مشاعرهم ، قلوبهم محبه و نفوسهم كريمه ، متحمسين دائما ، بيعرفوا يتصرفوا في المفاجآت ، مشكلتهم الحقيقيه في الإلتزام ، مش هيشتغلوا بأي سيستم . أكثر معاناتهم إن محدش بيثق في تصرفاتهم لأنها نابعة من عاطفه مش تفكير

الفكره هنا إن الإتزان مطلوب بين التفكير و الإحساس . مهم نكون بنحس بالناس و بنحس بالمتغيرات و بالمعاناة ، بس الأهم إننا نعرف نوزن الصح و الغلط . و نعرف ندي لكل حاجه حقها

قل خيرا تغنم و إسكت عن الشر تسلم

 

الكلام هو أداة تعبر عن مكانة الإنسان و درجة وعية و دليل على جوهر نفسه . و يقال تكلم حتى أراك ، فأنت غير موجود طالما لا تتكلم . فكلما تعلمت كيف تتكلم كلما إرتفعت مكانتك و مقامك بين الناس

و هنا الكلام إللي هتختاره لازم يكون كلام صادق و معبر و خالي من السخرية

و خلي بالك أن للكلام أربعة أنواع ، كلام واجب ، و كلام نافع ، وكلام لغو ، وكلام ضار

الكلام الواجب زي الأمر بالمعروف و النهي عن المنكر و الدعوة للحق و التنبيه للخطر . و الكلام النافع هو إللي بيفيد الناس من علم و تعليم و ذكر . إنما الكلام اللغو هو الكلام إللي ملهوش لازمه و فيه مضيعة للوقت . و الكلام الضار بيكون زي الغيبة و النميمة و البهتان و الكذب و شهادة الزور و فحش الألفاظ و الخوض في الباطل و النفاق

خير نصيحه هقولها لك و هقولها لنفسي هي فكر دائما فيما تقوله و تدبره فلسان المؤمن وراء قلبه و إختصر الكلام و قس كلامك بمقياس الدين و المنطق و العرف ولا تحدث بكل ما تسمع و قل خيرا أو لتصمت

التفكير بين الحرية و التوجيه

القواعد الأخلاقيه هي نظام من القواعد بتبقى مفروضه من المجتمع على أفراده بقوة سواءا مادية او معنوية . و بما أن كل مجتمع يختلف عن الأخر ، فالقواعد الاخلاقيه هتختلف في كل مجتمع . وبالتالي الإراده الفرديه هتكون خاضعه لقانون من العادات و التقاليد المصنوعه و المتكرره و كمان هتكون هذه الإراده لها حدود مختلفه في كل مجتمع

الخطير في الفكره هنا ان نظام تربيتنا لأولادنا و لأنفسنا هيكون له تأثير ملحوظ فقط داخل حيز الأسرة و تأثير صغير جدا في المجتمع المحيط بنا . و بالتالي الفكره الأخطر إن هيكون للمجتمع تأثير أكبر و أشد على أخلاقنا و سلوكنا و على أخلاق و سلوك أولادنا ، و بالتالي هيكون من الصعب جدا مواجهته و في النهاية هنستسلم و نسير بإرادته و ننجرف مع تياره او هننعزل عنه

معنى كدا ان سلوكنا و كمان تفكيرنا موجه من سلطة المجتمع و حريتنا هتبقى في مدى موافقتنا على تطبيق هذه السلطه

السؤال المهم هنا بقى ، هل هيكون لحرية التفكير و محاولة التغير قيمه إذا كان فعلنا مقيد و محكوم عليه من الأول

الإستنبات

 

البذره هي الوعاء إلي بيحمي الجنين و بتحتوي على غذاءه و بتبقى في صورة السكون لحد ما يحصلها تنشيط . طبعا البذره مش ميته , هي ساكنه أو كامنه منتظره الوقت و العوامل المساعده علشان ينتفخ الجنين و ينمو لنبات كامل

لو الثمره إلي خرجت منها البذره كامله النمو و ناضجه ، هتكون البذره قوية و متماسكه و تقدر تحافظ على الجنين . بس لو الثمره إتعرضت لعملية تسخين أو إنضاج كيميائي ، هتلاقي البذرة تشققت و الجنين ميت و بالتالي لا تعطي نبات عند الزرع

علشان كدا تلاقي المزارعين معظم زرعهم بيكون من شتلات مش من بذور ، لأن البذور بتاخد وقت طويل علشان الإنبات يبان و إحتمالية أنها تكون متضرره بتكون عاليه فالمزارعين يخسروا وقت و مصاريف في عملية الإنبات ، ممكن المده توصل ل 3 شهور . و معظمهم بيقول إن شجره إلي طالع من بذره أضعف بكثير من الشجره إلي طالعه من شتلة تلقيم

أقدم عينة سرطانية

السرطان مرض من الأمراض الحديثة و إللي المفروض أنها من أسباب التطور أساليب الصناعة و الزراعه المعتمده على الكيماويات و المبيدات . و لكن بالصدفه وجد في مجموعة أحافير لأنواع من الإنسان القديم أطراف بها سرطانات معظمها سرطانات عظمية . و نتيجة كدا بدأ العلماء يقولوا إن السرطان مرض من الأمراض القديمة و يعتبر عامل مهم جدا في معرفة التطور و التكيف للظروف الطبيعية و كمان للكوارث

تعتبر أقدم عينة سرطانية موجوده على الأرض هي أحفورة الدكتور ريموند بومج ، دكتور المسالك . و دي عباره عن عظمه من ديناصور مصاب بسرطان العظم . الأحفورة ده إكتشفها الدكتور بالصدفه و تعتبر عينة من أغرب العينات و أقدمها

إكتشفها و هي محطوطه في المتحف و أول ما عينه وقعت عليها قال علطول دي سرطان . ومن بعدها بدأ علماء الأثار مع علماء الأورام و علماء الأمراض القديمة يدوروا في عظام الديناصورات الموجوده في المتاحف كلها و لقوا أنواع معينة من الديناصورات إلي فيها سرطان و كانت معظمها من أكلات النباتات . و الغريب كمان أنهم لقوا إن أكثر الأماكن إصابة بالسرطان كانت عظام الذيول في المنطقه البعيده عن جسم الحيوان

و دا خلاهم يحطوا إنطباع مهم جدا إن مرض السرطان بيحصل نتيجة عوامل غير التلوث و أسلوب حياة التصنيع . لأن وقت الديناصورات مكنش فيه تلوث صناعي و لا تلوث زراعي . و العوامل الي إعتمدوا عليها ده هي المتغيرات و الطفرات الجينية إلي حصلت بس مش عارفين سببها الرئيسي هو إيه لحد النهارده

خذوهم فقراء يغنهم الله

عمر ما الفقر كان عيب . العيب في إنك متعرفش توزنها . الفلوس مش كل حاجه بس هي إلي بتجيب كل حاجه . يعني المرتب على القد ، عيش على القد . إصرف و إتبسط على القد . مش هقول حرص او حوش ولا هقول إصرف و إداين ، بس راعي ربنا في المصاريف . الأكل و الشرب و اللبس و الفواتير هي الأساس و الباقي للإنبساط و الدلع . إنبسط و إفرح و إتدلع و عيش على القد

عايش في شريحه ماليه معينه ، إفضل فيها . الطموح جميل ، بس لو سيطر هيكون مؤلم و كئيب . إطمح على القد ، المهم إنك تعيش مستور و مبسوط

الجواز سنة من الحياه . و أساس مهم . لو المرتب على القد ، إتجوز على القد . و خلف على القد .الغنى موجود في القلب و الروح قبل ما يكون في الفلوس . إختار شريكة حياتك ، و جهز البيت على القد ، و عيش فيه على القد

و متنساش ، الصحة و الستر و القناعه و الرضا و الفلوس كلها من الرزق

النميمة نية و تربية ... للخير أو للفتنه

الأولاد و هما بيكبروا ، بيكبر معاهم طباع بيكون من شأنها حماية سيرتهم و حماية شكلهم أمام آبائهم و أمام مدرسينهم و كمان أمام أصحابهم

في طباع بتكون سيئة بس الأولاد بيأخذوها بنية حسنة و هنا دور المربين حمايتهم من سوء إستخدام هذه الطبائع . و من أشهر هذه الطبائع هي النميمة

النميمة هي نقل كلام الناس بين بعضهم بنية نشر الفتنة و الإفساد . و هي إفشاء السر و هتك الستر من أحوال الناس بما يكرهوا معرفته. النميمة تورث الضغائن و ترفع الموده و تبدد الجماعه و تهيج الأحقاد

طب إزاي تفهمهم طبع النميمة زي مثلا لما تسألهم عن أحوال يومهم في المدرسه ، فيبدأوا يحكولك عن أصحابهم و علاقتهم بهم و أنهم سمعوا عنهم كلام أو شافوا منهم أفعال ، خلي بالك لأن هيكون لك رد فعل مهم جدا في تغير أسلوب تفكيرهم و في حياتهم بعد كدا

لازم تسألهم الأول ، أنت في نيتك تحكي الكلام ده لحد تاني ، يعني هتحكي لأصحابك و للمدرسين إللي ميعرفوش و لا مش ناوي تحكي و هل ناوي تتكلم فيه مع أصحابك لو فتحوا الموضوع تاني . لأن نقل الكلام أو حتى المشاركة فيه يعتبر نميمة

ولكن في معضلة هتظهر في نفسية الطفل ، هي إنه يثق في أبوه و أمه و يحكي و يكشف السر و لا ميحكيش علشان ميكنش نمام و يعمل مشاكل

و هنا هيكون الوقت إللي هيتعلموا فيه النية من كلامهم و أفعالهم . لأن نيتهم في الكلام مع أبائهم أكيد هتكون غير نيتهم في الكلام مع أصحابهم

طبعا أساس التربية هي إن الأولاد يثقوا في أبائهم و يثقوا إنهم عاوزين الخير لهم و تربيتهم على ما يرضي ربنا و أكيد في نفس الوقت بيكون مهم جدا نسمع من أولادنا من غير ما نحكم عليهم و نشعرهم بالخزي . و طبعا طبعا لازم الطفل يأمن الشر من أبوه و أمه علشان يثق فيهم و يحكيلهم

تربية الأولاد بيحتاج أباء و أمهات بيتقوا الله في نفسهم و في معاملتهم مع بعض و مع الناس

الواجب و الخير بين الفعل و الوعظ

او إفترضنا إن في علاقه بتربط بين كل ما هو واجب فعله و بين الإراده في فعل كل ما هو واجب فعله . فالعلاقه بتحددها الأخلاق ، بشكلها العام

الواجب هو الأخلاق من حيث الأوامر و النواهي ، يعني التعاليم الواجب طاعتها بقسوتها و صرامتها . الخير من الناحيه التانيه هو الأخلاق من حيث نتيجتها و تأثيرها ، يعني طيبة الأثر على فاعل الخير و على متلقي فعل الخير

الأخلاق عباره عن سلوكيات بيتم تعليمها عن طريق التقليد و التجربه قبل الوعظ و التحفيز . الواعظ بيستخدم العواطف لإثارة المفاهيم الأخلاقيه و يزيد الفكره حراره إذا ما قرنها بالتقاليد و الأعراف و الدين . ولكن لغة العواطف لن تتعدى مرحله الثرثره . و الغلط كل الغلط يأتي عند دمج هذه الثرثره بالتعاليم الدينيه ، وهنا منطلق الشرر لأن تصديق الكلام الديني دائما يأتي بعد تصديق الأفعال و ليس بالثرثره

العواطف هي القوى المحركه للسلوك ، وبالتالي الوعظ و التحفيز و إثارة العواطف يكونوا بوسائل يمثلها الفعل و يقبلها العقل و إلا تتحول الى عواطف كاذبه ، هوجاء ، و حمقاء و النتيجه تكون تدميريه

الجفاف الزاحف لازم يتم بتره

الزرع بيحتاج كمية متعادله من الماء تتناسب مع درجة الحراره و خاصة النباتات المعمره زي شجر الفاكهه . لو الماء زاد الجذور تتخنق او تركيز الهرمونات جوا الشجره يقل و بالتالي الثمار تكون ضعيفه . و لو الماء قل الشجر هيجف

الغريب بقى إن جفاف الشجر بيحصل من أبعد نقطه للشجره الأول و ييزحف الجفاف لحد ما يوصل للساق . و علشان تمنع الجفاف الزحف دا ، لازم تشيل الفرع الجاف و للأسف هتاخد معاك حته من الساق الحي زي عملية البتر كدا

" Sonnet X Poem " Death Be Not Proud By John Donne

Death, be not proud, though some have called thee

Mighty and dreadful, for thou are not so;

For those whom thou think'st thou dost overthrow

Die not, poor Death, nor yet canst thou kill me.

From rest and sleep, which but thy pictures be,

Much pleasure; then from thee much more must flow,

And soonest our best men with thee do go,

Rest of their bones, and soul's delivery.

Thou'art slave to fate, chance, kings, and desperate men,

And dost with poison, war, and sickness dwell,

And poppy'or charms can make us sleep as well

And better than thy stroke; why swell'st thou then?

One short sleep past, we wake eternally,

And death shall be no more; Death, thou shalt die.

الجواز و الحريه

الجواز مش عباره عن إثنين عايشين مع بعض وخلاص ، الجواز عباره عن اثنين عاوزبن يعيشوا مع بعض ، محتاج يكون في رغبه في الإستمرار ، رغبه ان احنا نكون مع بعض ، ناكل و نشرب مع بعض ، نتكلم و نتفاهم مع بعض ، نحلم و نتفق و نختلف مع بعض ، نعين و نساعد بعض ، نواجه المصاعب مع بعض . كل دا كلام مش صعب بس محتاج شوية تعب و إحتمال

الجواز بيكون تجسيد للحريه ، أنا حاسس إني إنسان حر و أنا معاها و العكس هي حاسه إنها حره و هي معايا . الحرية بتيجي بعد التعود ، كل واحد بيتعود على التاني ، على كلامه ، صوته ، ضحكته ، أكله ، شربه ، هواياته

من كتر التعود ، تلاقيهم شبه بعض ، ساعات بيوصل الأمر لنفس الشكل كمان ، نفس طريقة الكلام ، نفس طريقة الأكل ، نفس طريقة اللبس ، نفس الأفكار ، نفس العادات و نفس التصرفات فبيكونوا شبه بعض

التربية الأخلاقية ... علوم و فن

في إتهام بيبقى موجه لكل العلوم التطبيقية بأنها تهتم بالأمور المادية فقط و لا تهتم بالجانب الأخلاقي على الإطلاق . وأن الأجيال الناشئة تتعلم الظاهرة الوضعية ولا تتعلم طريقة التعامل الأخلاقي . وبالتالي التكوين الشخصي لهم يطبع على العلوم المادية و ليست الأخلاقية

و بطبيعة الحال النشاط الأخلاقي بيكون عبارة عن نشاط تجريبي يهدف لخلق أفكار صحيحة و عادات عقلية صالحة تساعد على توجيه سلوكنا نحو الأفضل و الأنسب

وكمان الفن كالفنون الجميلة و الأدب يعتبر أداة مثالية و في نفس الوقت واقعيه تقدر من خلالها غرز و تكوين الإرادة الأخلاقية في التربية

الإحسان

 

الإحسان هو إمتلاك الإراده و القدرة على المساعدة . الإحسان صفة مرتبطه بصفات أخلاقيه كثيره و بتظهر في التعامل بعد التعود عليها و علشان تعلمها لأطفالك هتحتاج تعلمهم الأول معنى البذل ، و الإيثار ، و الكرم ، و المروءه ، و الشجاعه

الإحسان مش بيبقى موجه للإنسان بس ، هتلاقيه موجه كمان لكل حاجه زي الحيوانات و كمان الجماد

دائما تلاقي الأطفال الي إتعلموا قيمة الإحسان ، بتكبر معاهم صفة إسمها التعلق ، التعلق بالأفراد ، بالأماكن ، و بالذكريات . تلاقيهم بيتمسكوا بروابط مع أصحابهم و جيرانهم وكمان مدرسينهم ، بيزروهم و بيسألوا عليهم و بيساعدوهم . الأطفال المحسنين بيبقوا كمان بارين بأبوهم و أمهم

تقليب الأرض الزراعية سبب إجهادها و تصحرها

تقليب الأرض الزراعيه يستخدم لإعادة توزيع السماد مع كمية التراب حولين جذورر الزرع . طبقات الأرض الزراعيه بتبقى عباره عن ٣ طبقات , تقريبا كل 15 سم بيبقى لها طبيعه مختلفه حسب العوامل الي بتواجهها . يعني سطح الأرض بيكون تقريبا جاف و التربه مففكه و تحت شوية تلاقي نسبة الجفاف أقل شوية و التربه متماسكه نوعا ما . تحت شوية كمان تلاقي التربه رطبه و ساقعه و متماسكه أكثر

الفكره هنا هو ان ماء الري بياخد جزء من الأسمدة و ينزل بها في طبقات الأرض الداخليه و بالتالي تقليب الأرض بيوفر في كمية التسميد للزرع و بالتالي في التكلفة

ولكن المشكله الحقيقية هي إن المغذيات الحقيقية للنباتات هي فطريات التربة و ميكروباتها و الدود الموجود فيها . أنا بتكلم عن المكونات الطبيعية للتربه مش المكونات المرضيه. طبعا المرضية لازم تتعالج بس في نفس الوقت لازم أحافظ على المكونات الطبيعية

الفطريات الزراعيه الطبيعية تلاقيها بتمنو على عمق 25 سم من سطح التربه لأنها بتعيش في أماكن فيها ضغط و درجه حراره قليلة و مهمتها مساعدة الجذور على إمتصاص المغذيات و كمان حمايته من الإجهاد . و كمان ديدان الأرض تلاقيها بتعيش عند منطقة جذور الرفيعه للزرع و الشجر فتحفر خطوط للتهوية و كمان فضلاتها بتفيد النبات

و بالتالي علشان أحافظ على طبيعة التربه و خصائصها البيولوجيه ، لازم أحمي سكانها الطبيعين من الهلاك . و الهلاك هنا بيكون عن طريق إستخدام المبيدات الزراعيه و الفطريه و الحشرية و كمان عملية تقليب التربه قبل عملية الزراعه

عند تقليب التربه ، احنا بنحولها الي أرض ميته بدون حمايه طبيعيه و بدون قدرة على الإنتاج . لأن الشمس و الهواء بيموتوا الفطريات و الدود و بينشفوا الرطوبه . و بالتالي عملية الإستصلاح بإضافة الماء و السماد بتكون عملية أطول و مصاريفها أكثر

الفرق بين الحميد و الخبيث في السرطان

الورم الحميد تتضاعف خلاياه ببطء و لا يمتلك القدرة على غزو الأنسجه و لا الإنتقال من مكانه . الورم الحميد غير ضار و لكن خطره في أنه ممكن يضغط على عضو أو شريان أو وريد و هيكون سئ لو قدر يطلع هرمون معين

الخبيث بقى بتتضاعف خلاياه بسرعه كبيره جدا وفي وقت قصير ممكن يوصل لساعات قليلة . و معندوش قابلية للتوقف . و بيستعمر النسيج الي فيع و بيكبر بلا حدود . و بيقدر يبعت خلايا منه تقعد في أنسجه بعيده جدا عنه . و بيستهلك كل الغذاء. ولا يتنفس ولا يستخدم الأكسجين إلا نادرا . و يستطيع أن يهرب من المناعه

الصدق في البيوت

الصدق مفتاح الفرج . و الكذب برضه مفتاح الفرج . فرج الصدق ممكن بيزعل في الأول بس بيسهل حل المشكله في الأخر ، و فرج الكذب بيطمن في الأول بس بيعقد المشاكل في الأخر و بيزعل . و دائما بالصدق بنتفاهم ، و بالكذب بنتباعد

الصدق بيكون في الكلام ، في النظرات ، و كمان في الآلام . الصدق في غيابنا عن بعض قبل ما يكون في قربنا من بعض

الصدق بيخلينا أصدقاء ، قبل ما نكون أزواج ، الصدق بيبني ثقه ، وهي ده أساس البيت . الكذب بيخلينا متعادين قبل ما نكون متباعدين و طبعا مش واثقين ولا مصدقين

إندماج تربوي ... المحبة ، الإختيار ، التضحية

من أهم الأدوار إللي اي أب و أم بيبقوا مسؤولين عنها هي مساعدة طفلهم على الإندماج داخل مجتمعه . يعني يكون زيهم أو على الأقل ميكنش مختلف عنهم. في العموم الطفل بيحاط بثلاث انواع من الجماعات بس هو مش بيشوف غير إتنين بس منهم . الجماعه الأولى هي أسرته و التانيه أصحابه

في الأسره بيلاقي فيها روح التضامن و التسامح و المحبه و بالتالي بيكون فيها تقارب معنوي و تداخل بين حياة أفراد الأسره . و الأصحاب بيكون مجتمع إختياري ، بيمارس فيه الطفل ذكاءه الإجتماعي و فيه كل الحريه للإختيار و التغير

المجتمع الثالث بقى هو الصعب فيه الإندماج و هو المجتمع السياسي و الوطني . فالروابط إللي بتجمع الأفراد في وطن واحد ملهاش علاقه بالقرابه و لا الميول الشخصيه وبالتالي هيحصل عند الطفل فجوه إجتماعيه هيكون محتاج فيها معاونه من أبويه و أكيد مدرسينه لمساعدته على تخطي الحواجز و الإندماج فيه

وهنا يجي دور المدرسه ، لأن من دورها الرئيسي هو خلق مجتمع وسط بين الأسره و الدوله و تسهيل إندماج الطفل فيه لأنه هيكون محاط بمفاهيم جديدة بتحدد طبيعة العلاقات القائمه على القانون و العدل ثم التضحية

الإنتحار

 

الإنتحار هو الوصول للنهاية ، نهاية حياة ، نهاية علاقه ، او حتى نهاية وظيفه . دا قرار بيتاخد مع الوقت ، بس بيتاخد لما عمود أساسي في الشخصيه بيتكسر . العمود دا ممكن تسميه الإنتماء او الإحساس بإني مليش لازمه في المجتمع الي انا فيه سواءا الأسره ، او العمل ، او الوطن

طبيعة الإنسان بيحب يحس بأن له دور تبادلي ، يؤثر و يتأثر ، بالمجتمع المحيط به . و بالتالي الإنسان الوحيد إلي ملهوش دور مؤثر ، و كمان الإنسان الأناني إلي بيختار انه ميكنش له دور مؤثر ، بيكونوا أكثر عرضه للإنكسار و بالتالي أكثر عرضه للإنتحار

و الدراسات بتقول إن الميل للإنتحار بيزيد بين العزاب عن المتزوجين ، و بيزيد بين الأزواج من غير أطفال عن الي عندهم أطفال . و دا دليل على ان الإنسان يتوقف حرصه على حياته على مدى تأثيره في المجتمع المحيط به

التكامل في الطبيعه

الطبيعة بتتعامل مع بعضها في تكامل غريب و متوازن جدا. يعني تلاقي دورات الحياة متوازنه و متداخله بين الكائنات الحيه المشاركين في الزرع . تلاقي درجة الحراره لها عامل في تنشيط إنزيمات معينه في الزرع بتبقى مسؤله عن التزهير ، علشان يطلع ثمر

تلاقي نوع من النحل بدأ بيضه يفقس في نفس الوقت و يبقى في نفس الوقت محتاج رحيق الأزهار علشان يكبر و ينمو . و تلاقي في فترة التزهير الجو بقى حر و في هواء علشان تنتقل حبوب اللقاح و يحصل تلقيح . وفي نفس الوقت تلاقي بيض النمل و الذباب و الفراش و الخنافس و العناكب يبدأ يفقس و ينتشر

طبعا عدد ساعات الليل و النهار و كمان برودة الجو في النهار عوامل تانيه مهمة أحطها في إعتباري. و الحاجه المهمة جدا جدا هو كمية قطرات الندى الي بتكون على الثمر لأنه مصدر أساسي للحشرات و الفطريات المنتظره ظهور الثمرة