المسؤلية

 

الواحد لما بيتجوز و بيبقى له بيته و يبدأ يكون أسره ، بيشيل المسؤلية . مسؤلية محتاجه تعاون و محتاجه تركيز . الراجل و الست بيتشاركوا فيها ، كل واحد على حسب إلي يقدر يعمله و على حسب ما يقدر يستحمل . يعني مفيش حاجه مفروضه على حد

الإهتمام بالبيت و الأولاد و البيئة الي هيعيشوا فيها مسؤلية الزوج و الزوجه ، مش حد تاني ، مش الأهل مثلا . هي مسؤلية مشتركه . يعني الزوجه لو طبخت و مسحت و كنست و لمعت و غسلت و نشرت و طبقت مش معناها إنها خدامه . و الزوج لو جاب و ودا و شال و حط و ساعد و صلح و إشترى و شحن و دفع و حافظ و قفل و فتح مش معناه انه خدام او سواق . الاتنين عايشين مع بعض و عايشين لبعض

الفكره في الجواز مش الراحه و رمي الدنيا على الطرف التاني . الفكره في الونس . وعلشان تحس بالونس لازم يكون لك دور في البيت . و دا المفروض الأولاد بيتربوا عليه من صغرهم . يشيل المسؤلية و يساعد في البيت و يقعد يتونس بأهله

ملاحظه تحتمل الصواب و الخطأ

 

أولادنا بيبقى لهم نصيب من جينات الأب و نصيب جينات الأم . بيبقى النص في العدد بس أكيد مش النص في الأخلاق

التوريث هنا بيبقى توريث شكل يعني توريث للصفات الجسدية زي لون العين ، شكل الشعر ، طول الجسم . الغريب بقى إنك تلاقي توريث للأخلاق كمان . يعني تلاقي الأولاد عندهم كرم أو عند أو عصبيه . و الغريب جدا بقى إن السلوكيات الي بيبقى عليها الأب و الأم قبل وقت الحمل علطول إحتمال كبير جدا تلاقيها في الطفل

يعني ممكن لو الأب عصبي أو الأم عنديه ، تلاقي الطفل طالع عصبي أو عندي أو الإثنين و لو العصبيه ده إتحولت لهدوء و العند بقى تفاهم ، تلاقي الطفل التاني طالع هادئ و متفهم

الفكره هنا إنك هتربي نفسك الأول قبل ما تربي أولادك ، لأن سلوكك هيفرق في جيناتهم و بالتالي في حياتهم

وزي ما قلت ملاحظه تحتمل الصواب و الخطأ

قصص و أفلام

الروايات و القصص و الأفلام و المسلسلات عباره عن حواديت بتحكي و بتحاكي سلوكيات بين الناس ممكن تبقى حقيقية و ممكن تبقى فانتازيا خيالية

الفكره إن السلوكيات ده لما تتكرر بتخلينا نشعر إنها متأصله في مجتمعنا و بتخلينا نتعامل مع بعض كإنها سلوكيات طبيعية عندنا . السيئ في الأمر إنها تكون سلوكيات ضاره ، أو سلوكيات تدعوا للغش و الخداع و تخوين الناس و الخيانه . هنا ما يتكرر ، يتقرر

و بالتالي الناس بتتعامل مع بعضها زي ما حصل في المسلسل

على العكس لو مسلسل بيعالج قضية أو بيأصل صفه حميده في المجتمع. معظم المسلسلات ده بتيجي في إطار ممتع و بالتالي بيبقى لها جمهورها و تأثيرها. زي مسلس ضمير أبله حكمت ، البخيل و أنا ، بكيزة و زغلول

و المسلسلات ده بتخلي الأسره تقعد مع بعضها و نشوفها سوا و نتناقش في القضيه و الفكره و نوضح الصح من الغلط

الحرية 3

في فرق كبير جدا بين الحرية إلي بإختياري و الحرية المفروضه عليا بإختيار غيري . يعني أنا من حقي أختار بس مش من حقك تجبرني على الإختيار

طبعا من حق أي حد يختار تصرفاته ، يختار دينه ، يختار فلسفته و توجهاته . بس مش من حق أي حد إنه يجبرك على تقبل إختياراته هو

تخيل مثلا لو حد حر في تصرفاته و إختار يعيش في روث البقر ، هنعمل إيه . هل هنمنعه ، هل هنفضحه ، هل هنحاربه ،هننفيه ، هنقتله. لا طبعا كل واحد حر طالما لا يضر بمجتمعه . طب لو أجبرنا على العيش في روث البقر ، هل هنوافق ، هل هنجرب ، هل هندافع عن حريته . طبعا لا محدش هيوافق يعيش في روث البقر زيه . طب هل لو راح عاش مع ناس زيه بتعيش في روث البقر ، هل هيتقبلوه ، هيساعدوه . طبعا أيوا ما هو عامل زيهم

طب تعال نفكر بالعكس ...

هل لو واحد عايش مع مجتمع في روث البقر ، و حب يغير تفكيره و يغير مجتمعه . طبعا من حقه يغير تفكيره و يرفض يعيش في روث البقر . بس مش من حقه يفرض على المجتمع الي فيه إنهم يرفضوا هما كمان العيش في روث البقر . طب لو عمل كدا و حاول يفرض على الناس التغير ، هل هيمنعوه ، هيفضحوه ، هيحاربوه ، هينفوه ، هيقتلوه . طبعا ممكن جدا

هنا بقى التغير لازم يبقى مدروس و محسوب تأثيره و عواقبه ، لأن الناس بترفض كل ما هو مختلف . التغير بيبدأ من فكره ، الناس لازم تصدقها و تعمل بها و بعد كدا تتصرف على أساسها . كدا تبقى إنت حر و عايش في مجتمع من الأحرار

الماء إستراتيجية الزرع لنموه

كمية الماء الي الزرع بيشربها بتعتبر عامل أساسي في تحديد إستراتيجية الزرع لطريقة نموه سواءا كان نمو ساق او اوراق او ثمار او حتى بذور. يعني في نوع كل ما يشرب ماء ينمو له ساق و أوراق جديده زي الطماطم و لو منعت عنه الماء ينمو له بذور جديده زي معظم الورقيات زي الجرجير و الخس . في انواع من الشجر كل ما تزود ماء كل ما الثمار يزيد حجمها زي المانجا و في انواع شجر كل ما زودت ماء الثمار تقع من على الشجر زي الجوافه

طبعا كل ما الماء زاد ، الجذر هيمتص ماء أكثر و بالتالي تركيز الأملاح هيقل ، و ممكن نوصل لمرحله ان الأملاح تخرج من الجذر للتربه و يبقى التأثير بقى بالمعكوس . و كمان حاجه ان الماء هيغير تركيز الهرمونات داخل النبات و بالتالي النمو الهرموني يكون فيه مشاكل و الزرعه تكبر من غير ثمار

الفكره هنا انك تكون فاهم و عارف شخصية زرعتك و هي بتحب الماء و لا . و كمان مهم تكون عارف أوقات الري و أوقات التعطيش لأنه بيبقى ضد رغبة النبات بس بيبقى لمصلحة الزرعه علشان تركز طاقتها في حماية الثمره مش الأوراق

علشان السرطان يموت

السرطان مرض غريب ، مرض له طابع مخصوص به. السرطان مرض بيتحايل على الموت . خلاياه بتتكاثر بكمية كبيره جدا في وقت قصير. و علشان السرطان يموت لازم احنا نموته بنفسنا

طب ازاي هنموته و هو جوا جسمنا ، موجود طبيعي معانا . أصعب حاجه دلوقتي ان احنا نستهدف خلايا السرطان لوحدها ، نموتها من غير ما نموت الخلايا التانيه . مس سهل خالص . علشان كدا تلاقي أثار جانبيه بتحصل ، زي ان الشعر يقع ، المناعه تقل ، العظم يجيله هشاشه ، إلتهابات في الفم ، ترجيع كتير

علشان السرطان يموت ، بيبقى قدامنا لحد دلوقتي طريقتين نستخدمهم ، يا إما نفجر الخلايا السرطانيه (necrosis) ، يا إما نحاول نبوظ السيستم بتاعها من جوا و بالتالي السرطان يستبعد الخليه البايظه و يموتها بنفسه (apoptosis) . بس طبعا كل طريقه لها مميزاتها و عيوبها . و علشان كدا العلاج بياخذ وقت و محتاج شوية صبر و إحتمال

الإستقرار النفسي

هل الإستقرار النفسي معناه إن الشاب أو البنت بيفكروا بطريقه علمية ، او ثقافيه ، او دينيه . و لا بيكون تفكيرهم مرتبط بالمجتمع و عاداته و بالموروثات الأسريه

في العادة الشباب و البنات بيبقى لهم طريقين في إختيار شريك الحياه ، يا إما بالتعارف في الكليه او الشغل ، يا إما بالتعارف بين الأسر و بعضها. وهنا بيجي دور الأب و الأم في مساعدة الأولاد في إختيار شريك حياتهم و بناء بيتهم . و طبعا مش قصدي ماديا ، بس برضه لا يمنع المساعده المالية

الأسر المحترمه ، هي الأسر الي فيها أب و أم مهتمين بأولادهم من الناحيه السلوكيه ، يعني موجودين في حياة أولادهم و في تفكيرهم و بيزرعوا فيهم القيم و المبادئ إلي تساعد على انهم يعيشوا محترمين

الأسر المحترمه هي الأسر الي فيها تفاهم و رحمه ، هي الي فيها المليان بيدي للفاضي ، هي الي فيها ساعد بالي تقدر عليه

هل الجواز ينتج عنه إستقرار و لا الإستقرار ينتج عنه جواز

يعني أتجوز لما أستقر و لا أستقر لما أتجوز

دا بصراحه سؤال مهم جدا . كتير جدا من الشباب بيقول إنه هيستقر لما يتجوز بس تقريبا كل البنات بتقول علشان أتجوز لازم يكون الشاب مستقر

الحقيقه إن النضج العقلي عند البنات بيبقى أسرع من الأولاد . و دا بيخلي البنات بتفكر كتير جدا قبل ما تختار . طبعا مفيش علاقه خالص بين وظيفة الشاب و نضجه العقلي . بس العلاقه الأكيده هو بيته و أسرته هل عندهم النضج الكافي إنهم يربوا أب و أم و لا بيكتفوا بالمذاكره و الأكل و الشرب بس

الإستقرار هنا هيكون بمعنى الإتزان ، يعني متزن في أخذ القرارات ، متزن في الإنفعالات ، و أكيد متزن في المصاريف

الجواز هو أكثر سلوك إجتماعي تعقيدا ، و دا بيخليه مخيف عند الشباب و مقلق عند البنات . علشان كدا لازم يتجهزله و يتعمله حساب تربوي

تحديات النضج

 

كل مرحله نضج للأولاد بيبقى لها تحدياتها . بيبقى عندهم أسئله محتاجه يترد عليها .عندهم رغبه في إثبات نفسهم . عندهم خوف او قلق او صراع مخبينه جواهم و بيحاولوا يتعايشوا معاه . كل ما الأولاد بيكبروا كل ما الواحد محتاج يقعد مع نفسه أكثر ، يفكر أكثر ، و يقرأ أكثر و طبعا يسأل متخصصين أكثر

و المخيف ان مفيش فواصل بين مراحل نضجهم ، يعني ممكن فجأه تكتشف حكايه هما عايشنها و مخبينها عنك و تنفجر في وشك . الترابط الأسري هنا مهم جدا علشان نحافظ على روابط المحبه وسط الاسره . بس هل دا كفاية ، الأولاد بيبقوا محتاجين كمان حرية ، محتاجين قدوة ، و محتاجين حمايه

كل مرحله عمرية بتبقى محتاجه التلات حاجات دول ، بس على قد سنهم . يعني مثلا مرحله الطفوله بتبقى محتاجه حرية التجربه ، يتذوق الأكل ، يتذوق الشرب ، يلمس. قدوتهم تكون من نفسهم علشان تحسن أفعالهم و تحسن من شكلهم امام نفسهم و دا بيبقى عن طريق انهم يقلدوا فعل هما عملوه قبل كدا و انت صورته مثلا و كل شوية بتوريهم الصوره و تشجعهم . و الحمايه بتبقى حمايه من الأخطار زي انك تشيل حاجه اتكسرت او تبعدهم عن حاجه ممكن تتحشر في زورهم او صوابعهم و الكهرباء

و طبعا دا غير مرحله الصبا خالص ، يعني لسه هيدخل على المراهقه. دي محتاجه حرية في التعبير و حرية في الإختيار . محتاجه قدوة في إتخاذ القرار و قدوة في التفكير و التصرف . الحمايه هنا بقى هتبقى حمايتهم من الأفكار الشاذه إلي هيشفوها او هيسمعوها في المجتمع

المهم إنك تكون أسرع منهم و تبدأ تلمح من بعيد على المشاكل إلي ممكن يواجهوها و تعرفهم الصح من الغلط و الأهم إنك تجدد جواهم حبهم لنفسهم الأول و حبنا الكبير لهم

أغاني التسعينات

لو جيت تقارن بين أغاني النهارده و أغاني التسعينات ، تلاقي فرق كبير جدا في مستوى الكلام و المعنى و كمان في التلحين و الموسيقى و كليبات فرقعت الدنيا

مغنين التسعينات هما الي كبرنا على صوتهم و على كلامهم و هما الي اتكونت شخصياتنا و افكارنا على حسهم

المغنين دول في منهم لسه محافظ على مستواه و محافظ على طريقته و بيجدد و الحاجه بتطلع منهم حلوه . و طبعا في منهم مشي مع التيار و عمل تغير لأغانيه علشان تتماشى مع العصر و دول خسروا متابعين قدام مهمين ، بس هما همهم يعملوا ماتبعين من أجيال الألفينات ، بس طبعا عندهم منافسه شديده مع البيكيا و الشواكيش

الحرية 2

 س : هل فعلا كل واحد حر في حياته و حر في تصرفاته ؟

ج : طبعا أنت حر في حياتك تخطط لها زي ما أنت عاوز و زي ما تقدر تستحمل و زي ما تحب. بس هتتحمل نتيجة حريتك و نتيجة أفعالك

س : هل فعلا كل واحد المفروض يقبل التصرفات و التوجهات للأخرين من مبدأ الحرية؟

ج : أكيد بس لازم تكون التصرفات في إطار يوافق عليها المجتمع و الدين و تتوافق مع عادات و تقاليد الناس . يعني متاكلش لحمه في مجتمع بيعبد البقر . مترحش تتجوز في بلد سلوها غير سلوك . طب و لو مقبلتش أعمل إيه ، شفلك مكان تاني

س : هل فعلا إن حرية الفرد نابعه من مبدأ إفعل ما لم تضر ؟

ج : كلام ناقص ، فالضرر هنا مش بس ضرر سلوكي ، دا ممكن يكون ضرر عقائدي يضر دين المجتمع ، او ضرر تقاليدي يعني يدمر عادات و تقاليد المجتمع. او حتى ضرر فكري ، يدمر أفكار الشباب لأن دائما النشئ بيحبوا يجربوا الحاجه الجديده من غير تفكير في نتيجتها و تأثيرها

س : هل ممكن أعيش بطريقة أنا كدا لو عاجبكم؟

ج : طبعا كلام مرفوض ، انت كدا بتفرض نفسك او سلوكك او ثقافتك او توجهاتك . و المفروض دائما مرفوض حتى لو كان صح فما بالك لو كان غلط . انت كدا هتعيش منبوذ ، او تروح مكان بيدي الحرية للمنبوذين.

مفيش فرق بين الزرع الشقيان و المتدلع

علشان تدلع الزرع اديله ماء كثير و تسميد عمال على بطال من غير إحتياج . فتلاقي الزرعه طالعه ضعيفه و مش متينه. لان كل إحتياجاتها موجوده من غير حتى ما تطلب. تلاقي الجذور قصيره و الساق رفيعه و الأوراق كثيره. و طبعا هنا لما الزرع يبدأ عمليه الإثمار تلاقي الثمره صغيره و مش مسكره وكمان سهل إصابتها بالأمراض

إنما الزرعه الشقيانه ، تلاقي جذورها طويله و متشعبه و ساقها مش متين و تفرعاتها كثيره و تلاقي لها لكل فرع في الزرعه فروع تانيه طالعه منها كإنها عامله شبكه و عدد الأوراق قليل . وتلاقي الثمره طالعه بطلوع الروح و قليله و ممكن الشجره متستحملهاش و توقعها

طبعا النمطين دول بيبقوا خساره و الإتنين مش بنتجوا ثمار . علشان كدا التوازن مهم جدا علشان تربي زرعه متزنه

السرطان مرض مفيهوش هزار

السرطان مرض بيصيب الكبار و كمان بيصيب الأطفال و الرضع . ممكن يجي لشخص عمره 90 سنه او عمره 15 سنه او عمره شهر . السرطان مرض ممكن يجي في أي مكان في جسمنا ، في أي عضو من أعضاءنا . ممكن يظهر في الجلد ، في القلب ، في المخ ، في الكليه ، في المعده ، في الرئه ، في الأمعاء ، في العين ، في أي مكان

السرطان مرض مش معروف سببه ، يعني محدش يقدر يحدد سبب معين للإصابه به ، بس في أبحاث كثيره بتحاول تربط شوية حاجات و تخليها من مسببات المرض ، بس برضه محدش يقدر يقول و يحلف عليها

السرطان في الكبار بيحصل تقريبا زي السرطان في الأطفال ، نفس الطريقه ، بنفس الشكل ، تقريبا . ما عادا شوية إختلافات بسيطه بينهم

السرطان مرض مفيهوش هزار و مفيهوش إستنى لحد ما الأعراض تزيد . السرطان مرض خطير و محتاج رعاية طبية سريعه

التعامل و حل الخلافات جوا البيوت

أساس التعامل و حل الخلافات جوا البيوت خمس حاجات

مفيش تصغير ، مفيش تكبير ، مفيش تأويل ، و مفيش تشهير ، و طبعا مش هنشيل

مش هنصغر المواضيع الكبيره و نقول عليها دا كلام تافه ميترضش عليه . و مش هنكبر المواضيع الصغيره و نعمل من الحبه قبه

مش هنقول انت قصدك ايه من الكلام ده ، انت عاوز توصل ايه بطريقتك ده ، يعني هناخد بالظاهر . و مش هنشهر بالتاني ، يعني مش هنحكي للناس ، مش هنتكلم في مشاكلنا مع غيرنا ، مش هنفضح بعض. و أخيرا مش هنشيل من بعض ، الخناقه بتخلص ، و الموضوع بيتحل و الدنيا بتبقى بسيطه من غير ذيول ولا تراكمات.

الحياة بتبقى أسهل و الخلافات بتتلم بسرعه و المناوشات بتخلص ، لما الطرفين يتفقوا على حلها و يتفقوا على حلول سلمية تراضي الطرفين مع بعض

كارتون فرح

 

كارتون الأطفال واحد من الطرق الي بتبقى مؤثره جدا على نفسية الطفل و على سلوكياته و خاصة لو الكارتون بيتكلم نفس اللهجه و الأبطال في نفس سن الأولاد ، بيبقى فيه تعلق و إدمان. انت ممكن تغير من شخصية الطفل بالكامل عن طريق الكارتون . ومن ناحية إن التعليم في الصغر كالنقش على الحجر ، لما الكارتون يدعوا الطفل إلى الحقد و الغضب و الأذية ، تكون المصيبه كبيره . لأني هنا هبقى من ناحيه بعالج إدمانه و من ناحيه تانيه بعالج أفكاره . و دي دوامه كبيره مع الطفل

و الكارتون إلي حبيته فعلا و بعد كدا منعته تماما ، إسمه مسلسل فرح

دي بنت مصرية ، في المدرسه ، عندها بابا و ماما و أخوها . أسرة مصريه جميله ، بس البنت بتواجه أفكار و سلوك المجتمع السيئ و هي بتبدأ تتعامل معاه. بس المشكله بقى إنها بتتصرف من نفسها و تغلط و تقع في مشاكل . طبعا الفكره هنا إنها بتبني شخصيتها و بتتعلم من خطأها . بس الأولاد الي بيشوفوا الكارتون مش بيفهموا كدا . الأولاد بياخدوا تصرفها الخاطئ على إنه هو دا الطبيعي و هي ده طريقة التعامل مع بقية الأطفال . لأن الحلقه كلها بتركز على فرح و رد فعلها و في آخر مشهد في الحلقه ، البنت بتروح لبابا و ماما علشان يحلولها المشكله . فالطفل بيفضل مركز نص ساعه على سلوك خاطئ و تجربه سيئه و بيبقى له ثانيتين بس لتصحيح المفهوم

للأسف كارتون فرح ممنوع في البيت عندنا

في مسلسل بكيزه و زغلول

 

بكيزه هانم او باكيناز او بيكي ، واحده عايشه دور الهانم بنت الباش بنت الأصول . اتجوزت في سن صغير علشان تعيش في قصر و تعيش في الفلوس. كل الناس عندها تحت المستوى و هي فوق كل الناس ، فوق اختياراتهم، فوق ذوقهم وكمان فوق حريتهم

زغلول بنت ، مش ولد ، مقهوره ، مرميه ، يتيمه ، عانت كثيرا في حياتها ، فقيره جدا ، عايشه في الشارع ، تشاء الظروف انها تجمعها مع بكيزه هانم في بيت واحد و تحت سقف واحد . بس هنا البيت مش بيت بشوات ، البيت بقى خرابه ، إتباع كل حاجه فيه لما الراجل الغني مات و هو مديون . بقم زي بعض معندهمش فلوس بس عندهم حاجه واحده بتربطهم ببعض ، لسه مكتشفوهاش ، هيكتشفوها مع الوقت و مع العشره ، هي الأصول

بكيزة هتعرف الأصول بعد ما تعرف الإعتماد على نفسها و تنزل من كبريائها . و زغلول هتعرف الأصول لما تتعامل كإنسانه و تحس إنها عندها خبره تعييشها من غير ما تحتاج لحد . هما الاتنين مختلفين جدا بس هما الاتنين في الأخر ولاد أصول

الحرية

 

الحرية الشخصية من حق كل إنسان ، حرية في تفكيره ، في عيشته ، في فلسفته ، في فلوسه ، في وقته ، في دينه . مش هينفع ، و ممنوع ، و غير إنساني هو إعتبار إن نوع معين من الناس المفروض ميكنوش أحرار ، بسبب لغة ، بسبب لون ، بسبب فكر ، بسبب شكل ، او حتى بسبب دين

ربنا خلق الإنسان و ركبه في أحسن صورة و بقت الإختلافات الي بيننا هي أساس للتعارف و التناسب . و خلى التقوى هي أساس التقرب منه . وكمان نهى عن التعصب و القبلية قبل ما ينهى عن العبودية

الحرية المطلقه بقى ، مفسده مطلقه ، يعني انت حر ما لم تضر . و زي ما انت حر ، غيرك برضه حر . لو الحرية ملهاش مساحه ، هتكون عبودية ، و لو ملهاش حدود ، هتكون إنفلات

التوازن في الزراعه هو الأساس في كل حاجه

 

التوازن في الري , كل ما الماء قل تلاقي الجذور بقت عميقه و متشابكه و كل ما الماء زاد تلاقي الجذور صغيره و ضعيفه و متقدرش تمتص الكميات الي النبات محتاجه فتلاقي النبات صغير و ضعيف

التوازن في التسميد ، لأن التسميد بكثره هيترسب في الأوراق و بالتالي تسقط و النبات يتخنق. و التسميد بكميه قليله هتخلي النبات يختار يعمل أوراق بدل الثمار علشان يقدر يعيش

التوازن في الشمس ، كل ما النبات اتعرض لشمس أكثر كل ما فقد ماء أكثر و بالتالي ذبول أكثر و كل ما إتعرض للشمس أقل تلاقي الحشرات إتجمعت عليه أكثر

التوازن في عدد الأغصان ، كل ما العدد زاد هتتشابك مع بعضها و الشمس مش هتوصل للفروع كلها ، و كل ما عددها قل ، النبات مش هينمو لأنه محتاج يتنفس و محتاج ورق ينتج طاقه

التوازن في عدد الثمار ، كل ما عدد الثمار زاد ، تلاقي الثمار صغيره و مسكره جدا و ممكن الغصن يتكسر و مستحملهاش. و كل ما عددها قل ، كمية الإنتاج للشجره يبقى ضعيف

علشان كدا التوازن مهم جدا علشان تربي زرعه مناسبه . الزرع المتزن بيطلع جذور مناسبه لطوله و ساق مناسب لطبيعته و كمان أوراق مناسبه لنموه . تلاقي الثمار طالعه بأعداد مناسبه و حجمها مناسب. التوازن دا محتاج مزارع فاهم شخصية الزرعه ، فاهم أوقات ريها و تسميدها وكمان فاهم أوقات قصها و تنظيفها

تقبل

الأطفال إلي بيجيلهم سرطان تلاقيهم بيواجهوا المرض بطريقه مختلفه شوية عن الكبار . الكبار ممكن يحصلهم يأس و رفض للعلاج ، إنما الأطفال قليل منهم إلي بيحصلهم يأس . أعتقد لأن اليأس محتاج إدراك و الأطفال بتبقى لسه غير مدركه لحقيقة المرض و طريقة علاجه

الأطفال بيبقى عندهم تقبل للمرض ، بس بيجلهم حاجه تانيه ، بيجلهم شعور غريب بالمسؤولية. يعني تلاقي الطفل عنده 5 سنين مثلا و شايل مسؤولية مرضه و مسؤولية أمه و مسؤولية بيته . تلاقي الطفل ده بيحس بالذنب علشان إخواته لوحدهم من غير أمهم ، لأنها قاعده معاه في المستشفى . تلاقيه زعلان إن بسببه محدش في بيته عارف يعيش كويس . أبوه بيخرج من شغله عليه يقعد معاه . وأمه بتبات معاه ، و أخواته قاعدين من حد غير أمهم

الأطفال ده بتكبر قبل سنها ، بيكبر جواهم إحساس الخوف ، مش الخوف من المرض ، ولا الخوف من الموت ، لا، الخوف على أحبابهم . علشان كدا بيبقوا محتاجين حد يستحملهم ، و يشيل عنهم . بيبقوا محتاجين حد يسندهم و يديلهم دعم ، حد يفرحهم و يرجعهم أطفال من تاني

لما بيكون في رحلة علاج أطفال السرطان ، ناس مسؤلة عن الفرحه ، عن المسانده ، و عن الدعم ، بتكون رحله محتمله و بتكون تقلباتها قليلة

الحبكه الدرامية في البيوت

في عالم السينما و الافلام تلاقي جمهور مهتم جدا بالحبكه الدرامية . الحبكة الي لازم تنتهي نهاية واضحه سواءا سعيده او حزينه . تلاقيهم بيبقوا مرتاحين مع شخصيات واضحه ، شخصيات بتلعب أدوار مألوفه . شخصيات بتجسد زوايا حياتهم المعروفه. و في جمهور تاني بيرتاح للشخصيات الغير مفهومه ، المتناقضه . الشخصيات الي بتاخذ طابع رمزي . بيرتاح للأفلام المليانه ألغاز ، غموض ، تشابك ، و تلاعب . كل واحد على حسب بيحب إيه و بيرتاح في إيه . مفيش مشكله

و بالتالي علشان يكون الفيلم ناجح ، هيبقى محتاج جمهور بيكون مستعد للمشاركه أو بمعنى أدق للإنخراط في موضوع الفيلم و الدخول في اللعبة الدرامية . بمعنى إن لكل نوع فيلم جمهور بيشوفه ، و العكس صحيح ، لكل نوع جمهور أفلام بيعيشها . أعتقد إن مفيش فيلم بيجمع بين النوعين مع بعض . لأن النوعين مش هيعرفوا يندمجوا مع بعض

خد كل الكلام ده بقى و طبقه على البيوت . بيوتنا ، تلاقي شخصيات بتحب تعيش بطريقه واضحه و صريحه ، بتحب تعيش مع ناس زيها ، فاهماها و فاهمه طريقة تفكيرها ، فاهمه الي بيفرحها و فاهمه الي بيزعلها . و العكس تلاقي شخصيات غامضه بتحب تلف و تدور و تعمل حوارات و كلام رايح و كلام جاي . الشخصيات ده بتبقى محتاجه معامله خاصه ، بتبقى محتاجه ناس فاهمه ، محتاجه ناس عندها علم و عندها قدره على الإحتمال

الحياة جوا البيوت مختلفه تماما عن الحياة جوا الأفلام ، البيوت بيبقى فيها أسرة و أخلاق و حب و حرية و أمان و دفئ . وكمان البيوت بيبقى فيها أسرار و إختلافات و تصادمات . المهم إن إحنا نعرف نعيش او على الأقل نتعايش مع بعض

تربية و تعود

الأولاد و النشئ الصغير بيبقى عندهم سلوكيات بتبقى محتاجه شوية تعديل . من أول ما يبدأ يبقى لهم رأي ، بتبدأ معاهم تكوين الشخصيه و دي بتفضل للزمن . طبعا بيبقى فيه عرق متكرر من أصول الأب أو الأم . علشان كدا إختيار شريك الحياة من أسر محترمه و أصول محترمه بيبقى مهم جدا

و علشان تربي صفه معينه لازم الأول تعود الطفل على الصفه ده . بس تحط في بالك إن في بعض الصفات علشان تتعدل بيبقى الطفل محتاج يفهم الأول إنها صفه مش كويسه . ودا بياخد وقت و بتبقى محتاجه نضج عقلي للطفل

علشان توصل لطريقة تعلم بها طفلك ، لازم الأول تعرف هل الطفل بيتعلم عن طريق الصورة و لا السمع و لا اللمس و بالتالي تقدر توصله المعلومه بسرعه لأن موضوع التعود بياخد وقت و مجهود و تركيز

بس مننساش ان الواحد لازم يربي نفسه الأول قبل ما يربي أولاده

ونيس

ونيس ، مسلسل بيتكلم عن أسرة مصرية عادية بس متماسكه . لها أب موجود و أم مهتمة

المسلسل بيحاكي كل الأعمار و بيظهر مشاكلهم و الطرق المقترحه لعلاجها او على الأقل محاولة الأب و الأم في تعديلها . وإزاي الأسرة بتواجه مشاكل الحياة اليومية أو المشاكل و المصائب المفاجئه . و ازاي هما دائما مع بعض و بيحاولوا بجد يفضلوا مع بعض

طبعا المسلسل لا يخلوا من شوية سقطات بس الواحد بيحاول يشرح لأولاده وقت المسلسل إن مفيش حد كامل و مينفعش نسعى للكمال في أي تصرف. إحنا نخلص النيه و نعزم الأمر و نتوكل على الله و نفضل مع بعض للآخر

في موت شيرين ابو عقله

الأصل في الحياة هو الموت . و لكل أجل كتاب . و فكرة ان الواحد يموت بشرف او يعيش بشرف ، دي فكره جوهرية

طبعا الموت بحد ذاته مصيبة كبيره ، بس هو دا المكتوب وهو دا الأصل. في ملاين من البشر بيموتوا كل يوم و كمان ملاين بيتولدوا . الفكره هنا انك بتبقى مسؤول عن حياتك و عملك

ربنا بيقول وما تدري نفس ماذا تكسب غدا و ما تدري نفس بأي أرض تموت. طبعا القتل حرام شرعا و ممنوع قانونا ، بس لكل وظيفه مخاطرها. يعني معظم الأطباء بيموتوا بالعدوى و البنائين بيموتوا متكسرين و السواقين بيموتوا في حوادث

شيرين أبو عقله ماتت وهي بتنقل حقيقة الحرب و أهوالها وشكل الناس المقهوره او الخانعه المتعايشه مع القهر ولكن الله لا يغير ما بقوم حتى يغيروا ما بأنفسم

شيرين ابو عقله قتلت بدم بارد و هي بتدافع عن قضية تعتبر أزليه لا جيلنا و لا عشرين ألف جيل بعدنا هيبقوا عاوزين يحلوها. دم شيرين ابو عقله في رقبة الكل . اصبحتي ذكرى و اصبحتي شهيده و بقيتي زيك زي غيرك

#شيرين_أبو_عقلة

#جمال_خاشقجي

#طارق_أيوب

#شفا_كردي

#دليشان_إيبش

#هوكر_محمد

#غفران_وراسنه

شوك الإستراتيجيات للحماية

 

واحده من الإستراتيجيات الي بيستخدمها الزرع للحماية سواءا حماية الثمار أو الحماية من الجفاف هي ان يبقى في شوك . مكان الشوك و شكله بيختلف على حسب نوع الزرعه . ممكن على جزع الشجره نفسه او على ساق النبات او على الثمره . زي شجرة الليمون مثلا ، تلاقي شوكه على الساق تقريبا كل ٣ سم. و الشوكه عامله زي الرمح بتكون كبيره و مستقيمه و مدببه و ممكن تقطع زي السكينه . و بصراحه الشوكه بتقدر تخترق اي حاجه من الهدوم او الخيش حتى . فخلي بالك من عينك وقت لم الثمار

النوع التاني من الشوك بيبقى موجود في الورد البلدي ، الشوك موجود على ساق الورده ، الشوكه بتكون صغيره و عامله نص دائره . و دي بقى مش بتشك دي بتغرز و الأوحش إنها بتحقن ماده بيضاء تحت الجلد بتبهدل و بتألم بطريقه عنيفه

النوع الأخير من الشوك موجود على الثمره نفسها ، زي في التين الشوكي مثلا بس هنا الشوكه بتبقى خفيفه نسبيا و تقدر تستحملها

رحلة

رحلة السرطان على قد الي فيها من تعب و ألم و خوف ، على قد ما فيها من ترابط و تماسك و تراحم . قد إيه تلاقي أطفال السرطان بيرتبطوا بكل إلي بيبقوا معاهم في رحلة علاجهم . تلاقيهم بيرتبطوا بالأطباء بتوعهم ، بالصيادله ، بالتمريض ، بكل الموجودين و كل الي بيساعدوهم

قد إيه تلاقي أطفال السرطان بيحبوا اللعب و الهزار و الدلع . قد إيه تلاقي عندهم تقبل للوضع ، رغبة في تكملة المسيره ، رغبة في الحياة . قد إيه بيبقوا غلابه و مساكين و قد إيه تلاقي في عيونهم حب معجون بخوف . قد إيه تلاقيهم صابرين ، قد إيه تلاقيهم كاتمين

قد إيه تلاقي أطفال السرطان، و خاصه الكبار منهم ، بيبقى عندهم ترابط بينهم ، تلاقيهم بيشجعوا بعض ، بتلاقيهم بيسندوا بعض و تلاقيهم بيحبوا بعض و بيخافوا على بعض . وفي أحيان كثيره تلاقيهم بيتجوزا من بعض . شركاء طريق واحد ، شركاء تجارب واحده، شركاء ألم و فرحه