سرطان العظم سهل يسيب أثر

مش كل أنواع السرطان بتسيب أثر و بتعمل علامه مميزة في مكانها لكن السرطانات التي تصيب العظم أو تنتج من العظم بتسيب أثر واضح و علامه مميزه و خاصه لما تبدأ تتحرك للخارج

يعني مثلا نوع الساركوما العظميه osteosarcoma بيعمل أثر عامل زي قشرة البصل و نوع المايلوما myloma بيخلي شكل العظم مخروم من كل ناحيه. انما اللوكيميا leukemia بتعمل حفر سطحيه منفرده في حته و متجمعه في حته تانيه. شكل فقاعات الصابون و كمان شكل حبوب الفشار بتبقى مميزه للأورام الغضروفيه chondroblastoma . و شكل الزجاج المصنفر بيميز خلل التسيج الليفي fibroys displasia

طبعا مش أي حد هيعرف يفرق بين الأشكال ده و غيرها في الأشعه و عينات الباثولوجي إلا المتخصصين و المتدريب كويس عليها

الجواز

 

الجواز ، حاله إجتماعيه معقده . تعقيدها في جعلها تسير في إتجاه واحد ، للأمام . عمر ما الدنيا بتبقى سهله . الدنيا مليانه سقطات و هفوات و مناكشات و خناقات

بالكلام و التفاهم تلاقي الدنيا بتمشي ، تلاقيها بتتحل ، حلول وسط ، بس حلول مرضيه . الكلام و التفاهم بيكونوا مبنين على أساس مشترك ، أساس معروف و مفهوم من الطرفين

التجارب اليومية و المواقف إلي بنشوفها و بنسمعها و بنعيشها ، بتخلينا نتمسك ببعض أكثر أو نبعد عن بعض أكثر . المسافه إلي بينا بتتحدد عن طريق صدق كلامنا مع بعض و صدق التفاهم إلي بيننا

أفعال الطفل بين الشر و الإستكشاف

كل حاجه الطفل بيعملها وهو بيلعب بيبقى عنده هدف منها . في حاجات بنبقى فاهمين غرضه ايه و في حاجات تانيه بنبقى مش فاهمين غرضها عنده . وبالتالي بنحكم على الطفل بأنه شقي أو شرير

الأطفال كائنات رحيمه ، معندهاش قسوة . ممكن ميكنش بيتألم نفسيا بسبب أفعاله ، بس هو معندوش نزعه أو حتى ميل للشر أو إيقاع ألم بغيره من بشر أو حيوان

الفكره هنا ان الدافع بيكون حب الإستطلاع ، ودا شعور فطري في الأطفال . فالطفل ممكن يكسر مش علشان هو بيحب التكسير بس علشان يعرف تركيب الحاجه من جوا إيه . ونفس الكلام لو مسك فراشه و قطع جناحتها مش علشان يعذبها ولكن لمعرفه إزاي الجناح ماسك في جسمها

لكن الطفل يقرر يكون شرير و قاسي علشان يثبت أنه الأعلى و يثبت سيادته على الضعفاء فدا غير موجود في قاموس الطفولة

مسلسل البشاير

مسلسل بيحكي على شاب مصري ، سافر و اتغرب و جمع فلوس . رجع بلده لقى الدنيا إتغيرت ، الناس بقت غير الناس . الناس سابت الأرض و الزرع و إتجهت للإنفتاح و إشتغلوا موظفين و تجار بيبسي و عصير

الشاب عاوز يشتري أرض و يزرعها ، عاوز يعمل لنفسه تاريخ . بيحاول يجمع أهله كلهم و أسرهم ، في الأرض . الكل يزرع و الكل يعمر و الكل يأكل أكل نظيف

الفكره مش أن محدش مصدقه ، الفكره إن محدش عاوز يتعب ، يقولوا لسه هنزرع و نسقي و نسمد و لا نتوظف و نقعد مرتاحين . بس هما مش عارفين إن راحتهم في أرضهم

القيمة الأخلاقيه بين الضمير و التضحيه

يعيش الإنسان و يحيط نفسه في أربع مجتمعات ، يؤثر فيهم و يتأثر بهم و له إرتباطات أخلاقية فيها ، هي الأسره ، و العمل ، و الوطن ، و الإنسانيه

تتفاوت القيمه الأخلاقيه في كل مجتمع نظرا لأهمية التأثير المتبادل بين الفرد و الحياة الجماعيه فيه . و نظرا لهذا التفاوت تجد أن الضمير الأخلاقي يضيف للقيمة الأخلاقيه عمقا عند تنفيذ أي عمل موجه للأفراد الأخرين في نفس المجتمع

ولكن التضحيه من وجهة نظر أخرى ، و هي أعلى غاية أخلاقية موجه لصالح الغير ، ممكن أن تقل قيمتها الأخلاقيه اذا إختار الفرد أن يكون العمل الموجه لنفسه أفضل من العمل الموجه للغير

مصدات الرياح

مصدات الرياح عباره عن شريط من الأشجار سريعة النمو و لها أوراق شوكية تحيط بالمزرعه من كل الإتجاهات . و ظيفتها بتعمل كحائط صد للرياح لحماية الزرع و الشجر من الخلع و من التراب المحمل على الرياح في الصيف و حماية الزرع من الهواء البارد في الشتاء فيزيد تدفئة الزرع

تعتبر البزروميا و الكافور من أكفئ المصدات نظرا لسرعة النمو و أيضا تعمل كسياج عازل من الحيوانات و القوارض . بعد حوالي سنتين او ثلاثه تقريبا تقدر تبيع أشجار المصدات كخشب وزراعة غيره

من التفاصيل المهمة في زراعة المصدات انها تكون بطريقة رجل الغراب الثلاثية و تزرع شجره في كل نص متر و ترك مسافه قدرها ٨ متر مع أقرب شجره في المزرعه لعدم تداخل الجذور و حماية الشجر من الأوراق و الفروع المتكسره نتيجة الرياح . و طبعا يفضل عمل خندق بعد صف المصدات لقطع الجذور لعدم دخولها على المزرعه

أخيرا سعر المصدات رخيص جدا ، يعني الألف شجره تقريبا ب ٧٠٠ جنيه من غير مصاريف زراعته

سرطان الدم

سرطان الدم ، عباره عن انقسام بعدد كبير جدا لنوع معين من خلايا الدم ، يا إما الحمراء او البيضاء او الصفائح . الإنقسامات الكثيره ده ينتج عنها أعداد كبيره جدا من الخلايا السرطانيه ، و طبعا الخلايا ده بتلاقيها محجوزه جوا نخاع العظم

بس ممكن من كتر العدد تلاقيهم خرجوا من النخاع و راحوا جمعوا بعض في عضو تاني بعيد عنها زي الكليه مثلا و سدوها . يعني تلاقي الإنسان بيشتكي من أنه مفيش بول و لكن لما يعمل تحاليل و ياخد عينات ، يلاقي سرطان دم . و طبعا مجرى البول بيفك لما السرطان بيتعالج

في نوع بقى غريب جدا من سرطان الدم ، تلاقي مفيش خلايا في النخاع خالص ، و كل الخلايا خرجت و راحت برا النخاع و قعدت في حته لوحدها و عملت كلكيعه و بتقعد في المخ فيفتكروا إنه سرطان مخ أو في الثدي فيكون سرطان ثدي و لما تعمل باثولجي يلاقوه سرطان دم

أختار الفعل الصح و لا الفعل الأنسب

دائما في أي موقف او مشكله بيبقى أمامك كذا طريق للحل . طبعا الطرق ده بتبقى على حسب سنك و خبرتك و تجاربك . بتبقى عارف الحل الصح أو حتى شايف أنه هو دا الحل الصح

الفكره هنا إنك لازم تكون عارف نتيجة الحل دا إيه ، نتيجته على المدى القصير و على المدى البعيد . يعني هينتح عنه إيه و و الناس هتتقبله و لا هترفضه

و بالتجربه و بالخبره هتبدأ تفكر مش في الحل الصح ، هتفكر في الحل الأنسب . الحل إلي ميعملش خناق و لا مشاكل و لا حتى مجرد إحراج . الحل الأنسب للموقف و الأنسب للطرفين

الزنكلوني

 

المسلسل عائلي تربوي متكامل يحكي عن رب أسرة إسمه الزنكلوني عنده صفات سيئة في شخصيته يتعامل بها مع أسرته و جيرانه و

أصدقائه و زملائه في العمل

المسلسل يعرض هذه السمات بحلقات منفصلة لكل سمة و ينتقد فيها الفعل و يبين مردوده على المحيطين به بإطار إجتماعي منظم و بقصة مكتوبة بطريقة يسهل فهمها

الزنكلوني من أجمل المسلسلات الموجه للعائلة و تفتح مواضيع كثيرة للنقاش. و الأهم إنها تزرع في الأولاد معاني و عبر للفعل السئ و تأثيره على المحيطين به و خاصة أسرته و أصحابه و جيرانه

المسلسل يناقش أفعال و صفات تكاد تكون لا تناقش في السينما و التلفزيون و لكنها متواجده في حياتنا و نتعرض لها يوميا ك

الغبي، الطماع، النصاب، المهمل، الكذاب، الحِشري، المذعور، إللي ملهوش كلمة، المرتشي، الخائن، جار السو، الخجول، المتكبر، الفهلوي، المنافق، المتعصّب، المتشائم، الأُكلتي، شاهد الزور، الكرم الزائد عن اللزوم، المُدعّي، المزور، المفجوع، والدسّاس

حلقات المسلسل الطويلة تأخذنا من بداية الحكاية لرسم الشخصية كاملة و تسير بالفعل السئ في صورة حدوته من الأحداث إلى نهاية الحلقة و كيف أن لكل فعل رد فعل و كيف ينتهي الحال بصاحب السمة السيئة و هو مرفوض من أسرته و أصحابه و جيرانه و مجتمعه

الشخصيه الجماعيه بين الإنتماء و التضحيه

كل شريحه في المجتمع و بيبقى لها أفكارها و سلوكياتها . يعني بيبقى معروف عن الشريحه ده السلوك ده . مش مهم هنا السلوك دا صح ولا غلط ، ولا حلال او حرام . المهم انه بيميز الشريحه ده بس . وبالتالي علشان تكون منتسب للشريحه ده ، لازم تسلك نفس السلوكيات المعروفه فيها . وهي ده الشخصيه الجماعيه

طبعا الشخصيه الجماعيه بيكون تأثيرها أقوى من الشخصيه الفرديه ، يعني الأفراد الي جوا الشريحه الواحده بيحركهم سلوك جمعي واحد و مش هتقدر تغيره او تبدله بسلوك تاني و إلا هتكون منبوذ أو مطرود او حتى مقتول . وبالتالي إنتماءك هيتحدد بمدى تأثير الشخصية الجماعيه على سلوكك

السؤال بقى هنا ، هل الشخصيه الجماعيه ممكن ان تنتهي و تزول بعد زوال كل أفرادها سواءا بالطرد او بالقتل ، ولا الشخصيه الجماعيه بتبقى قوية لدرجه عدم زوالها و تنتظر إنتساب أفراد جديده و تضحيات جديده

خطوط زراعيه

في عمليه ترتيب الأرض الزراعيه عندنا طريقتين لرسم خطوط الزراعه . خطوط طوليه أو خطوط مثلثة . الخطوط الطوليه بتكون خط طويل من أول الأرض لنهايتها ، بتتحفر كلها و تتسمد كلها و بتتزرع فيها الشتلات وراء بعضها بالترتيب . بتكون المسافه بين الشتلات محسوبه على حسب إرتفاع الزرعه أو الشجره و تداخل الأغصان الجانبيه و حجم الشجره عند النمو الكامل

الخطوط الطوليه بتترسم فى اتجاه بحرى قبلى علشان الشمس و التلقيح . يعني أبدأ زراعه في الناحية البحرية من الأرض . علشان أنا عاوز الشمس تطلع على نص الشجره اليمين زي نص الشجره الشمال بالظبط ، علشان كل الشجره تتأثر بنفس درجه الحراره و مدة سطوع الشمس ، علشان الثمار تطلع متماثله . و كمان تكون أول شجره في الخط مواجهه للرياح علشان تاخد معاها حبوب اللقاح لأخر الشجر على طول الخط المرسوم

أنما زراعة الشجر بطريقة مثلثة بتكون بس في الأشجار إلى على حدود الأرض علشان بتعتبر مصدات للرياح الشديده ، فتهدأ الرياح قبل ما تخبط الشجر

الخلية الحية ... وهمية البساطه و حقيقة التعقيد

كل كائن عضوي يتكون من عنصر واحد فقط و لكن يتفاوت في عدده حسب حجمه و وظيفته . العنصر هو الخليه الحيه . خليه واحده بها كل أسرار الحياه و أسرار الموت . بسيطه في شكلها و معقده في تركيبها

فهي كائن يتغذى و يتنفس و يخرج و يعمل و يتحرك و يستجيب للمؤثرات الخارجيه و الداخليه و يتكاثر ، مثلها في ذلك مثل أرقى الكائنات الحيه تطورا

الخليه الحيه الواحده تستطيع أن تترابط مع خلايا حيه أخرى بشكل غريب ، فهم يتجمعون سويا في حيز محدود جدا و يحدث بينهم إحترام و تجاوب فيتشاركوا الغذاء و الهواء و الماء بدون جهد و بدون حروب . و تتناسق في أدوارها بدون أن يكون لهم مركز خاص فلا تعرف للواحده دورا مميزا فرديا مختلف عن جمعها

و الأغرب من كل هذا ، أنها تتكون في الأصل من عناصر غير حيه . و مع تجمع و إتحاد الغير حي ينتج الكل الحي و إن الكل الحي ليس مساويا لمجموع الغير الحي . إنها الخلية الحية

البيت

 

أكثر حاجه الراجل بيحبها في بيته هي الهدوء، هدوء الجو و الهدوء النفسي . و أكثر حاجه الست بتحبها في بيتها هي السكينة . و أكثر حاجه الاطفال بيحبوها في البيت هي الإنتماء ، الإنتماء للأب و للأم و للبيت

الراجل هو المسؤل عن إحساس السكينة للست و الست هي الي بتهيئ الهدوء للراجل . و هما الاتنين الي بيعطوا للاطفال إحساس الإنتماء

الأطفال لما يتربوا على الإنتماء لأبوهم و أمهم و يحسوا بالهدوء مع أبوهم و يحسوا بالسكينة مع أمهم ، يطلعوا أطفال أسوياء ، و عندهم قدرة على تأسيس بيوت مليانه راحه و سعاده

وازع

الأطفال بيبقوا محتاجين يمشوا في حياتهم بوازع ، نوع من أنواع التفكير العكسي يعني ، من خلاله يقدروا يفكروا و يقرروا يعملوا الصح او الغلط

الوازع ده بيتحط جواهم من التربيه ، و التجربه ، و التوجيه . الوازع ممكن يكون ديني ، ممكن يكون إجتماعي ، و ممكن يكون إنساني المهم إن الأطفال يكون لهم مرجعيه يقدروا يعتمدوا عليها و يثقوا فيها . الأطفال بيبقى تفكيرهم مغلف بتفكير الأب و الأم و بيبقى لهم حرية محدوده ، بس لما بيكبروا بيبقى عندهم كل الحرية ، حرية التصرف ، حرية التفكير ، و حرية الإختيار

أنا هنا مش بتكلم عن الوازع المبني على الخوف ، الخوف من المصير ، او الخوف من نتيجة الفعل ، لا ، أنا بتكلم عن إمكانية التراجع او على الأقل الإستعداد للتراجع وخاصة لو عن فعل يؤدي لأضرار من غير لازمه علشان كدا الأطفال إلي بيبقى عندهم وازع و طريق مختارينه في تفكيرهم ، بيدخلوا في صراعات أقل خطوره من أصحابهم . و ممكن كمان يكونوا قدوة لأصحابهم

مفارقة بين مسلسل بالطو و كتاب "لأن الإنسان فان - الطب و ما له من قيمة"

مفارقة غريبة جدا بين الطبيب المصري الذي كتب المسلسل و بين الطبيب الأمريكي الذي ألف الكتاب , كلاهما طبيب و كلاهما مر على نظام للرعاية الصحية. أحدهما مر بأحداثا عسيرة لا تمت للطب بأي صلة ولكنها كانت عقبات شديدة الوطأة عليه لممارسة طبه و الأخر مر بأحداث عسيرة تقع ضمن سيطرة طبه . و عندما يأتى الأمر إلى الحقائق فإن الناس دائما تتوقع أن تحصل على المستحيل

يكشف الطبيب المصري عن مقدار الخلل الرهيب الموجود في نظام الرعاية الصحية و خاصة في المناطق البعيدة عن الحضر و التي يبتعد الناس فيها عن المنطق العلمي و يسيروا وراء أعينهم و ألسنتهم و أهوائهم. فعلى الطبيب أن يلبي رغبة المريض أو رغبة عائله حتى و لو كانت عكس ما تعلم و عكس ما يعرف. بينما يكشف الطبيب الأمريكي منظور أخر عن المعاناة التى يسببها إهمال الطب لرغبات المرضى التى قد يرغبون فيها فيما وراء مجرد الحفاظ على الحياة

كلاهما يستحوذا عليك و يدخلا اليأس في قلبك و لكن أحدهما أكثر بؤسا و أكثر بأسا فيظهر لنا كيف أن الهدف النهائى ليس الحصول على موت ناجح وإنما الحصول على حياة ناجحة وهى الحياة التى تستمر حتى آخر لحظة

الطاقه المتولده

لو إفترضنا إن كل فعل بينتج عنه طاقه ، طاقه إيجابيه لو فعل خير و طاقه سلبيه لو فعل شر . إنت بتبقى عارف قلبك و فعلك

الطاقه ده تلاقيها بتحاوط صاحبها ، بتلف حوليه ، بتصاحبه في طريقه . تلاقي فعل الخير بيترد خير و فعل الشر بيترد شر . و الخير و الشر بينزل على صاحب الفعل نفسه

الأفكار تعتبر فعل و ينتج عنها طاقه ، و النوايا فعل ، النظرات فعل ، الإهمال فعل ، حتى طريقة الكلام و التعبير فعل . و من ناحية إفعل ما شئت ، فكما تدين تدان ، برضه فكر ما شئت و إنوي ما شئت و إتكلم بما شئت ، فكما تدين تدان

قمة جذرية يتوقف عليها شغل الزرعه

جذر النباتات يعتبر أهم عضو على الإطلاق للزرعه علشان كدا الإهتمام به و المحافظه عليه هو أساس النمو و إستمرار الحياة

الجذر بيتكون من جذر رئيسي و بيكون طويل و نموه يتجه لأسفل ناحية الجاذبية و الظلام و الرطوبه . و بيتفرع منه مجموعه جذرية بتكون تقريبا شبه دائرية حول الجذر الرئيسي . في قمة الجذر موجود مجموعة من الخلايا بتكون لها مسؤولية كبيرة جدا للنبات. بتكون هي المسؤولة عن النمو و إفراز ماده مخاطيه صمغية mucigel علشان الجذر يلزق في التربة و النبات يثبت و كمان بتحميه من الحشرات و القوارض و تساعده على إمتصاص الماء و الغذاء

الجميل في موضوع الجذر لما تبصله من بعيد إنك تلاقي الفرع الرئيسي يتفرع على الجانبين بنفس المكان و نفس الوقت و بنفس السرعه . يعني لو طلعت الزرعه و بصيت على الجذر هتلاقي تشابه شبه تام حول الجذر الرئيسي

و طبعا لو قمة الجذر الرئيسي ده إتقطعت لأي سبب ، نمو النبات هيقف و إحتمال كبير جدا الزرعه تموت منك . و أكثر سبب للقطع بيحصل لما بتنقل الزرعه من إصيص صغير لواحد كبير أو للأرض الدائمه ، تلاقي الجذر الرئيسي خارج برا الإصيص و لازق في الأرض و إنت تقطعه بدون قصد

و بالتالي لو عاوز تكبر زرعتك و تحافظ عليها لازم تكون عارف إن شغلها و حياتها هيقفوا لو لم تفهم طبيعة قمة جذرها

السرطان و الماء

في تجربه اتعملت لدراسه سلوك الخلايا السرطانيه مع الماء . ماء الشرب العادي بتاعنا . فكره البحث ان اثناء ما الجراحين بيقطعوا الورم بيعملوا غسيل للمكان يا إما بماء او بمحلول ملح متعادل يا إما بمحلول ملح مركز

الموضوع يبان غريب بس الفكره وراه كانت انهم يدرسوا تأثير الغسيل على تحريك خلايا الورم من مكانها و ادخالها في نسيج تاني مش بتاعها . ولكن شافوا حاجه غريبه . لقوا ان الناس الي اتعملهم غسيل بالماء العادي ، كانت نسبه انتشار السرطان عندهم اقل بدرجه ملحوظه

فجابوا خلايا سرطانية من القولون و الكليه و المثانه و زرعوها في أطباق خارج الجسم ، ولما وصلت لحجم معين حطوا عليها ماء او محلول ملح متعادل او محلول ملح مركز ، الغريب إنهم وجدوا إن الماء العادي قدر يموت خلايا السرطان كلها في خلال ٤٠ دقيقه و ان وجود اي نسبه من الملح مقدرتش تموت كل الخلايا السرطانيه. ودا شيئ غريب جدا في دراسه الشخصية السرطانية

معنى كدا ان السرطان يقدر يعيش في الدم بس ميقدرش يعيش في الماء

PMID 34414644

هدية

لما تيجي تجيب هدية لشريك حياتك ، هاتله هديه هو عاوزها ، هدية هو محتاجها . هدية نفسه يجيبها بس مش عارف أو حتى مش عاوز يدفع فيها فلوس . ممكن تسأل سؤال مباشر ، انت محتاج ايه اجيبه لك هدية او ممكن تلاحظ من كلامه ، بس هيبقى طعمها أحلى لو تسأل مباشرة

الهدايا في البيوت بتحسن المزاج ، و بتخلي التفاهم أعمق . الهدايا بتعني إهتمام ، و محبه . تخيل بقى الأولاد ينشؤا على تهادوا تحابوا، و خاصة بين بابا و ماما ، تلاقي نفسيتهم هادئه ، مش بيقارنوا ، و كمان تلاقيهم بيهتموا بالتفاصيل

تعليم الإلتزام

الإتزام صفه صعبة جدا تخلي الأولاد يتعودوا عليها . صعبة لأنها بتديق على الحرية . أنا حر أعمل أي حاجه . صح إنت حر بس الحرية لها حيز بتتحرك جواه مش كل حاجه متاحه و مش كل حاجه مباحه

طبعا الأولاد ممكن يزعلوا من تقيد حريتهم ، بس مع الوقت بيبدءوا يعرفوا معنى الإلتزام. في الأول علشان ميزعلوناش ومع التشجيع تلاقيهم بيلتزموا و بيحسوا بالفخر امام نفسهم

الأولاد لو إتعلموا الإلتزام ، هيتفتح امامك الطريق انك تعلمهم الإعتماد على النفس ، الصدق ، إحترام النفس ، إحترام الغير ، الذوق، الإيثار ، التسامح ، التفريق بين الصح من الغلط ، و أخيرا التعاون

مسلسل العسل المر

قال رسول الله ﷺ: كفى بالمرء إثماً أن يضيّع من يَقُوت

من أعلى درجات الإثم في ولي الأمر أن يضيع من يقوت أو من يعول أو من يعتمد عليك أو من يسمع كلامك أو يعتبرك قدوة

في مسلسل إسمه العسل المر بيحكي عن أم عندها عقده نفسيه من صغرها و نتيجة عدم وجود وعي من أبائها أدى لجعلها تعيش تجربه زوجيه سيئه و تدرجت مشاعرها من الرفض إلى الكره ثم القتل . و نتيجة إمتلاك الشر منها حاولت بكل جهدها أن تنقل نفس مشاعر الكره لبنتها في كل الأوقات و كمان بتخلي كل الخدام يكذبوا على البنت حتى تصدق أن الرجال هم مصدر الشر و أنهم هم الجحيم . وكانت الأم تختار مدرسات مطلقات لتدريس بنتها و إشباعها بالألام و لما تزوجت إحداهن إتهمت بالخيانه

البنت فضلت طول عمرها محبوسه جوا بيت أمها خائفه من الرجال والحب و تجنبًا لمشاكله وجراحه . و عندما رأت قطة مع أولادها في جنينة البيت نمى عندها مشاعر الأمومه . و لما عرفت أمها بمشاعرها قتلت القطط لتقتل إبنتها معها . و عندما دخل للبيت رجل ، إنقلبت الأية و بدأ الصراع

فكرة المسلسل تدور حول محاولة إبراز الصراع بين الرجال و السيدات و التعصب الواضح ضد الرجال و تربيه الأجيال على إكمال الصراع و التعصب بدون تجربه أو حتى أدلة

المسلس مأخوذ عن رواية بنفس الإسم

عن الفقد و العطاء

 

هل فاقد الشيئ لا يعطيه و لا فاقد الشيئ يعطيه بقوه نتيجة حرمانه و نضجه . يعني هل الطفل الناشئ في بيت بدون رحمه ، هيكون أب عديم الرحمه و لا هيكون أب رحيم جدا . و هل البنت الناشئه في بيت بدون ود ، هتكون أم شرسه و لا أم ودوده جدا

الطبع بيتكون نتيجة تلاث مؤثرات ، بيئة التربيه ، أسلوب التعامل ، و رد الفعل لسلوك الطفل . وهنا الطبع بينبع من داخل الشخصيه ، شخصية الطفل ، يعني تلاقي الطفل ممكن يتصرف بسلوك معين و لما تكلمه و تفهم كلامه تلاقيه قصده سلوك تاني خالص، السلوك هنا رد فعل

الطفل هيمر لتكوين طبعه بمراحل سلوكيه ، يعني كل ما تفكيره يتغير ، تلاقي طبعه كمان إتغير و كل ما يكبر طبعه هيكبر معاه . و كل ما ينضج طبعه هيختلف . بس هيفضل السؤال هل فاقد الشيئ لا يعطيه و لا هيعطيه بقوه

تكامل هوائي عجيب

لما تيجي تتأمل تركيبة الإنسان و الحيوان تلاقي إن الخلايا علشان تنتج طاقة محتاجه تأخذ مصادرها من خارجها . يعني الإنسان لازم يأكل علشان يفضل عايش و ينتج طاقه تشغله . فتلاقي الإنسان بيأكل و يمضغ و يهضم علشان يحلل الغذاء لمكوناته الأصليه إلي بتمشي في دمه علشان توصل لكل خلية فيه . بس الخلايا مش هتعرف تشتغل من غير ما يكون فيه مكون رئيسي فيها و هو الأكسجين

طبعا الأكسجين متوفر في هواء التنفس ، و عن طريق الرئه بينتقل إلى الدم و منه إلى جنيع الخلايا . و من هنا تبدأ الخلية سلسلة من التفاعلات المعتمده على مكونات الغذاء الأصلية و على الأكسجين في الهواء لتكوين طاقه و في النهاية ينتج ثاني أكسيد الكربون إلي بيخرج مع التنفس للهواء

و العكس تماما بيحصل في عالم تاني موازي لعالم الإنسان و الحيوان هو عالم النبات . النبات هو نفسه مصدر طاقة ، هو الغذاء إلي بيتكسر و يتمضغ و يتهضم . طب النبات بيعيش إزاي و بينتج طاقه لنفسه منين

النبات بيعتمد على الهواء و الشمس في معيشته ، يعني النبات بيتنفس الهواء من الأوراق و بيفصل منه ثاني أكسيد الكربون و تبدأ سلسلة من التفاعلات المعتمده على ضوء الشمس لتحويله إلى مركبات بسيطة و منها لمركبات أكثر تعقيدا زي السكر و الأكسجين إلي بيخرج من تنفسه في الهواء . تكامل عجيب

عينة لتحليل سرطان الدم

تكوين خلايا الدم بيبقى في نخاع العظام ، فلو في مشكلة ببقى محتاج عينه من نخاع العظام علشان أعرف أحلله . النخاع بيبقى عباره عن نسيج مليان دم و خلايا متوزعين على طول العظمه

في طريقتين علشان أخذ عينه من النخاع ، يا إما بسرنجه تدخل جوا العظمه و أسحب من النخاع بتاعها ، يا إما أدخل بمنشار أخد حته من العظمه و معاها حته من النخاع

طبعا الموضوع دا مؤلم جدا و هيحتاج لتخدير . و كمان هيحتاج رعايه و نظافه بعد العمليه علشان مفيش ميكروب يدخل العظام أو يدخل الدم و يعمل تسمم

دور تقليدي بميت راجل

في إحدى المجتمعات تولد فتاة جميلة بتكوين أنثوي تشريحيا و هورمونيا و تمنو بصورة كامله جسديا و لكنها تحمل في نفسيتها نتيجة التربية و المجتمع عقلا و إحساسا بدور رجولي في الحياة . يعني هي إمرأة من الناحية الشكلية و رجل من الناحية النفسية

تعيش هذه الفتاة و تصبح إمرأة و تحمل مرارة مكبوتة بداخلها لأنها تحب شكلها الأنثوي و لكنها تكره دورها الذكوري المجبوره عليه إجتماعيا فتحدث فجوة بداخلها و تنقسم بين إرادتها أن تكون كالأنثى و إرادة المجتمع أن تكون كالرجل

و نتيجة هذا الضغط و التشتت بين شكلها أصبحت تتقبل دورها كرجل و لكنها محصوره داخل كيانها الأنثوي . و الاكثر مرارة أنه مطلوب منها أن تؤدي فوق دروها الرجولي إجتماعيا دور أنثوي أسريا فتتزوج و تحمل و أن تصبح أما

بالرغم من هذه الفجوة و من هذا التشتت إلا أنها مازالت تواجه و أصبحت إمرأة تقليدية بعضلات و أصبحت إمرأه بميت راجل

إزاي تعلم أولادك الشبع و يكون عيونهم مليانه

شبع العين بيجي بعد شبع القلب و شبع القلب بيجي بعد شبع البطن . الأول عود الأولاد على الشبع ، الشبع من كل حاجه . خليهم يختاروا و إملاهم و يختاروا تاني و إملأهم تاني و تالت و رابع و خامس . في كل حاجه ، في الأكل ، في الشرب ، و كمان في النفسية يعني الأولاد يكونوا شبعانين أكل و شرب و شبعانين حب ، و شبعانين حنيه ، و شبعانين فخر

الشبع بيولد كرم ،و الكرم بيولد عطف و حنيه . ومع الوقت هتلاقيك إنت نفسك محتاج تشبع منهم . هي دائره ، هتملاها بإختيارك