الذوق و الأخلاق

 لو دخلنا أي بيت هنلاحظ إن العفش الموجود بيبقى مترتب بطرق مختلفه و الحوائط بتبقى متزينة بطرق مختلفه . هتلاقي التوزيع مختلف ، الألوان مختلفه ، حتى الروائح بتبقى مختلفه . و الإختلاف ده بيبقى على حسب الطبقه الإجتماعية لأهل البيت . مش بتكلم هنا عن مكان البيت لأن الثقافه بتتنقل بين الناس مش بين الأماكن . يعني ثقافه طبقه معينه بتتنقل معاهم لو عاشوا في مستوى تاني غيرهم . كلامي لا يحمل معنى وجود طبقه دنيا أو طبقى عليا و لكن لكل طبقه ثقافه.

الفكره هنا بقى مش معدل الإنفاق أو البذخ في الشراء و الترتيب ، إنما الفكره هنا تتعلق بالذوق الي بيحكم الإختيارات . معنى كدا إن هيكون في ذوق محكوم لكل طبقة إجتماعيه ، ذوق بتحكمه ثقافه ، ذوق بتحكمه لغة و مفردات ، ذوق بتحكمه عادات و تقاليد

الذوق بين الطبقات المختلفه ، بيختلف لدرجة ممكن توصل للتضاد . يعني الذوق هنا ممكن يكون قرف هناك و العكس طبعا صحيح. أنا بتكلم عن الذوق عموما مش مجرد ذوق فني أو جمالي

السؤال المهم جدا جدا بقى ، هل الذوق داخل البيوت ممكن يعكس قيمة الأخلاق جواها . ولا الأخلاق ثابته لا تتغير ؟

الصبر و الزراعه ...

 

كل خطوه بتتعمل و الواحد بيزرع بتبقى محتاجه شوية صبر

مش مجرد تحط البذره و خلاص . لا انت لازم الأول تختار و تحضر و تسأل . و طبعا تحاول و تحاول و تحاول ، لازم شوية صبر

الزراعه علم و خبره ،يعني لازم تتعلم و لازم تسأل أهل الخبره. و علشان تطلع زرعه كويسه هتبقى محتاجه شغل و تدريب لأن لكل نوع نبات ، بيبقى له شخصيته و أسلوبه في النمو . لازم تتعلمهم و تعرف تتعامل معاهم . الزرع بيديلك فرصه تغلط و تحاول و تعرف نتيجة غلطتك او محاولتك و الجميل ان بيبقى عندك فرصه تانيه و تالته علشان تحاول تاني و تتعلم من تاني

هل يتحرك السرطان

نعم السرطان يتحرك . في نوع من الخلايا الطبيعية بتكون وظيفتها الإلتصاق بالنسيج و المحافظه على شكله . الخلايا ده بتقدر تتحرك و كمان تتحكم في هذه القدرة داخل الأنسجة المختلفة و داخل الأوعية الدموية و الأوعية الليمفاوية

الخلايا ده طبيعية في جسم الإنسان و لها وظيفه مهمة جدا في شفاء الأعضاء و إصلاح الجروح . ودا بيفتح باب ان تصليح العيوب في عضو معين بيبدأ في عضو آخر بس دا مش موضوعنا دلوقتي

الخلايا المتحركة ده عباره عن نوع وسطي بين نوعين من خلايا أخرى هما ال Epithelial cell , mesenchymal cell و بيحصلها تحول بين النوعين ببساطه و بتتسمى عملية التحول ب Epithelial mesenchymal transition أو EMT

يبدو طبيعيا تماما دلوقتي أن السرطان وجد طريقه للإعتماد على عملية التحول ده نفسها و بقى يستخدمها كوسيلة لنقله و في علماء بيقولوا إن نوع السرطان كارسينوما carcinoma إللي بينشأ في خلايا من النوع ال Epithelial مثلا بيقدر بسهولة جدا الإنتشار عن طريق التحول ده يا إما بالتحول من نفسه أو إستخدام الخلايا المتحوله و الإلتصاق بها و التحرك معاها

و يبقى الأمل

في الجواز مين هيصرف و مين هيربي

شفت بيوت فيها رجاله بتشتغل و سيدات بتهتم وتربي ، و الرجاله بتصرف

و شفت بيوت فيها سيدات بتشتغل و رجاله مش بتهتم و لا بتربي ، و السيدات بتصرف

شفت بيوت فيها رجاله و سيدات بيشتغلوا و الإثنين بيهتموا و بيربوا . و هما الإتنين بيصرفوا

و شفت بيوت رجاله و سيدات بيشتغلوا ، و محدش فيهم مهتم و لا بيربي . وهما الإتنين بيصرفوا

و شفت بيوت لا رجاله و لاسيدات بيشتغلوا ، و محدش فيهم بيربي . و هما الإتنين بيشحتوا

المصاريف و التربيه مش المفروض يتحطوا في كفتين ميزان ، لأن كدا بنختار بين الفلوس و بين أولادنا . من المهم إن الأولاد يأكلوا و يشربوا و يلبسوا و يتعلموا ، بس المهم جدا إنهم يتربوا و يبقى عندهم ثقافه و حسن خلق

النضج العقلي عند الأولاد

 

الأب و الأم لهم دور رئيسي في تنمية مهارات و تنمية عقل أولادهم . هما المسؤولين عن تقبلهم لقدراتهم ، تشجيعهم على مواجهة التحديات و كمان مساعدتهم على الإحساس بالأمان و بالسند

النضج العقلي مش معناه إن الطفل يكون مثقف ، لكن معناه إنه يكون عارف مردود أفعاله إيه ، يعني نتيجة الإختيار هتكون إيه ، تسلسل الأحداث هيحصل إزاي . و الموضوع دا بيجي بالتدريب ، تدريب على المواقف ، لو حصل كدا هيحصل إيه بعدها

التدريب هنا بيبقى أحسن بكثير من التجربه ، لأن التجربه هتوصل لنهاية مش عاوزينها ، نهاية مش محسوبه ، او مش مرغوبه

بالطريقه ده انت عودت اولادك على التفكير السليم ، لأنهم هيحطوا أكثر من سيناريو للأحداث و بالتالي توقع أكثر من نهاية

الغرفة ٢٠٧

مسلسل معمول من رواية تعتبر متوسطة ، بس المسلسل حولها لتحفة فنية . حاجة تخليك مش قادر تستحمل ، عاوز تعرف . بس خلي بالك المعرفة لها ثمن ، هتدفعه يعني هتدفعه

كل حاجه بيكون لها سبب و كل حركة لها نتيجة . و الماضي هيفضل يطاردك . الفكرة هل أنت عندك الجرأة أنك تجري منه و لا هتقدر تواجهه و تعرف حقيقته و كمان تدفع ثمنه

الإبداع في المسلسل مش بس في التمثيل ، كمان في الموسيقى و التأثير و الألوان و الجرافيكس . إبداع بيخليك تشوف السيما بمنظور راقي و جميل

هو دا التطور الطبيعي للمسلسلات إلي تشدك و تجذبك و تثبتك و تسمرك و تسهرك . تحياتي لكل المبدعين إلي إشتركوا في المسلسل و مستني الجزء الثاني على أحر من الجمر

الإبداع ... مثالية الفن و واقعية الطبيعة

المثاليه هي كل شئ لا يمكن إدماجه في الواقع و إنما يتجاوزه و يتعداه و بالتالي إثاره حالة المثاليه تعتبر خروج عن الذات و عن الواقع الطبيعي الذي نحياه

وبمنظور آخر فإن كل عمل فني هو تعبير عن شئ مثالي لأن الفن هو تمثيل للطبيعه ولكن في صورة أسمى فلا يمكن أن تنقل الطبيعة في صورة تنم عن الخضوع المطلق لأنه بجانب الجمال يوجد القبح و بجانب العقل توجد التفاهة . وهنا تكمن واقعية التفكير الفني بالتغير الحادث في داخلنا و بتحولنا من الإنطواء على ذاتنا للتفتح و الخروج للطبيعة

ولنضع في الإعتبار أن مجال الفن المصور للطبيعة ليس هو العالم الحقيقي ، فبالرغم من أن جمال الطبيعة يبدوا مثاليا إلا أن جمالها ليس في حقيقتها ولكن يكمن في طريقة نظرتنا لجمالها و لإبداع الفن فيها

زرعة البداية 2

علشان الزرعه تطلع كويسه و قوية و تقدر تدي إنتاج لازم يتوفر شوية حاجات . بذور كويسه ، أرض صالحه للزراعه ، عوامل خارجيه مناسبه للزرعه

البذور فيها أشكال و ألوان و في أنواع بيبقى محتاج شوية شغل قبل ما تتزرع يعني مثلا تتحط في ماء مدة أو تعمل خربشه في غلافها الخارجي أو تشيل الغلاف الخارجي كله أو ساعات تغلي البذور

كمان تحط في بالك مساحه الأرض المزروعه علشان يتناسب مع عدد البذور طول الزرعه و كمان لازم الأرض تكون متقلبه كويس و متهوية ، يعني فيها رمل و طينة بنسب متوازنه ، و الأرض تكون متسمدة طبيعي أو مضاف عليها مكونات التسميد

العوامل الخارجيه بتبقى زي عدد ساعات الشمس المباشره و عدد ساعات التظليل ، درجة حراره الهواء ، الرطوبة ، سرعة الهواء ، الزرع الي حوالين الأرض علشان في زرع بيبقى عاوز ذباب علشان التلقيح و زرع الذباب بيحط البيض فيه و اليرقات بتاكله

إختبار آيمز Ame's test

بروس آيمز عالم من العلماء إللي بيشتغلوا على البكتريا . عمل إختبار للكشف عن المواد الكيميائية إللي ممكن تسبب السرطان عن طريق إختبارها على البكتريا و إعتمد على أن لو الماده ممكن تسبب طفرات في الخلايا العادية و بالتالي تحولها لخلايا سرطانية فدا ممكن يلاحظه في خلايا البكتريا برضه و بصورة أحسن لأن البكتريا بتتكاثر بسرعة و بالتالي التغيرات الجينية هتظهر أسرع

آيمز إعتمد في تجربته على بكتريا السالمونيلا لأنها بتنقسم بسرعه جدا فبيكون عندها قابلية عالية لحدوث الطفرات في جيناتها و بالتالي سهل متابعتها و تحديدها

الفكره في الإختبار إن السلمونيلا علشان تنقسم هتكون محتاجه لمواد غذائية معينه تكون موجوده في محيطها . لو المواد ده موجوده بصورة بسيطة هتكون سهلة الإمتصاص و هتنقسم بسرعه و لو موجوده بصورة مركبة صعبة الإمتصاص هتكون الإنقسامات قليلة

و لكن لو المواد الغذائية المركبة صعبة الإمتصاص ده موجوده بس السالمونيلا بقى عندها القدرة على إمتصاصها بطريقة أسها و أسرع فدا معناه إنه حدث داخلها تغير جيني أكسبها هذه القدرة الجديدة

ومن هنا جت الفكرة ، إن لو حط المادة الكيمائية إلي بيدرس تأثيرها السرطاني في محيط السالمونيلا مع المواد المغذية المركبة الصعبة الإمتصاص و حصل طفرة داخلها و أصبحت قادرة على إمتصاصها و بالتالي السالمونيلا إنقسمت أكثر ، تعتبر المادة الكيميائية مسرطنه

طبعا في الوقت الحالي بكتريا السالمونيلا إتبدلت بفطر الخميره و كمان بقى يستخدم اختبار أيمز كإختبار مبدأي وليس حاسم للكشف عن المواد المحتمل أن تسبب السرطان زي المبيدات الحشريه ، مضادات العشب ، صبغات الشعر، مستحضرات التجميل و إضافات الأغذية

العدل مع النفس و مع شريك النفس

 

كل ميزان و له كفتين ، كفه بتوزن و كفه بتوازن . كل واحد حر في الي بيعمله ، بس العدل أساس الملك . لو عدلت مع نفسي ، كسبتها و لو عدلت مع شريكي ، كسبته

زمان كان كل واحد بيحط كل حاجته في كفه ميزان و الشريكين بيتوازنوا . دلوقتي بقى لكل واحد فينا كفتين ، كفه لنفسه و كفه لدوره . بقى الميزان بيوزن بس مش بكفتين ، لا ، ب أربعه . طب هتتوزن إزاي . محتاجه ناس عادله ، ناس عاقله ، و ناس عندها ضمير

مش هنقول هنتنازل ، لا هنتوازن . التنازل يعني حد عالي و حد واطي ، و مفيش فينا حد واطي . لكن التوازن معناه أحلى ، معناه أعمق . معناه هنشوف بعض ، هنراعي بعض ، و هنشارك بعض

كان يا مكان الحياة

 

في مسلسل كارتون إسمه كان يا مكان الحياة . المسلسل دا عباره عن كارتون محاكاه للي بيحصل جوا جسمنا و بياخد عضو في كل حلقه بيعرفنا إزاي بيشتغل و إيه المشاكل الي ممكن تحصل فيه و ازاي بتتصلح

بيفهم الأولاد يعني ايه خلايا دم حمراء و خلايا دم بيضاء و صفائح دموية و ايه دورهم و ازاي بيتكونوا و بيقوموا بدورهم . وايه الفرق بين انواع كرات الدم البيضاء . و بيفهم الأولاد يعني ايه ميكروبات و ازاي عددها بيزيد و ازاي المناعه بتهاجمها

بيعرفهم ازاي المخ و الأعصاب بتعاونوا على التحكم في الجسم . وازاي الطاقه بتتكون و ازاي الأكسجين بيدخل في انتاج الطاقه

بصراحه ، من أحلى الكارتون التعليمي ، أنصح به بشده ، مع التكرار و التكرار و التكرار

سندباد

 

بحار عربي من مدينة بغداد يهوى الإبحار والمغامرات و يمر بعقبات و مصاعب و بإيمانه و طيبة قلبه بيعرف يخرج من كل مشكله و في طريقه كان بيحل مشاكل للناس الي يعرفها و الي ميعرفهاش و قدر يكسب أصحاب كثيره لما طلب مساعدتهم وافقوا و وقفوا جنبه

بتحكي قصته أن عمه أهدى له طائرا صغيرا قادر على الكلام و إسمها ياسمينه و قد قرر سندباء أن يخرج مع عمه علشان يتعلم الإبحار و التجاره و بسبب حوت كبير كانوا فاكرينه أرض لترسوا عليها السفن إنفصل عن عمه و بدأت رحلته لوحده في عالم مليئ بالأخطار

يتعرض سندباد الولد الصغير لعدة مواقف منها المثير والمخيف ويواجه مخلوقات غريبة مثل طائر العنقاء العملاق والمارد العملاق ذا اللون الأخضر الذي يأكل البشر و إبنه الصغير عمليق

و في طريقه يتعرف على صديقين هما علي بابا الشاب الذكي و القوي و العم علاء الدين الشيخ العجوز صاحب الحكمه و الدين و يساعدوه في محاربة بولبا و العجوز ميساء و بقية السحرة و المشعوذين حتى الوصول لزعيمهم الجني الأزرق و تابعته المخلصه للشر زغل صاحبة جسد المرأة و ظل البقرة

و بعد صراع و دهاء وقع زعيم الشر و تابعته المخلصه في شر أعمالهم و تحولوا لحجارة و إنتهى عصر السحره و ماتت ملوك النار و الجليد و الزيت و الصحراء و الجبال و الدخان و من كان يتبع زعيم الشر خوفا منه أو طمعا في قوته ، و إستطاع سندباد الوفاء بوعده و عكس السحر على ياسمينه طائره الصغير لتعود لشخصيتها الأصليه و هي الأميره الجميله ياسمينه و على والديها الذين قد تحولوا إلى عقابين لرفضهم إتباع زعيم الشر

من أجمل المسلسلات الموجه لتعليم الأطفال معنى الوفاء و العهد و الشجاعة و المرؤة و المحاولة و الأمل و مساعدة الغير و حب الخير للناس

شخصيات محترمة

 من أجود الشخصيات ، الشخصية إلي عندها أمانه . أمانه في القول و أمانه في العمل . الشخصيات ده بيبقى سهل التعامل معاها ، سهل الكلام معاها و كمان سهل الشغل معاها . الأمانه صفه تقريبا إنتهت من المجتمع . إنتهت لأنها صعبه ، صعب تتعلمها و صعب تطبقها و صعب تحافظ عليها

البني آدم إلي عنده أمانه ، بيبقى عنده أمانه في الكلام ، أمانه في النظر ، أمانه في السمع ، أمانه في الفلوس ، أمانه في حفظ الأسرار . لما يجي ينصحك بحاجه ، مش محتاج تلف و تسأل . لما تتكلم معاه ، مش محتاج تشكك في كلامه . ولما تشتغل معاه ، مش محتاج تأخد حذرك

تخيل بقى لو الإنسان الأمين ده ، يكون كمان قوي . عنده قوة جسمانيه ، قوة في شخصيته ، قوة في علمه . تخيل تاني لو الشخص الأمين و القوي ده ، يكون جندي ، أو دكتور ، أو مهندس ، أو محامي ، أو مدرس ، أو صنايعي ، أو موظف

صناعة الحضاره بيبدأ بصناعة إنسان أمين ، إنسان متربي . لأنه بعد كدا هو إلي هيحارب ، الي هيحمي ، هيعالج ، هيعلم ، هيصلح ، هيبنى ، هيحاسب . الأمانه هي مفتاح الحضاره

زرعة البداية

الزرعه بتبدأ ببذرة او شتله ، و بيبقوا عبارة عن نسخه طبق الأصل من الزرعه الأم . علشان كدا لازم تختار كويس بناءا على معرفه بالزرعه الأم . يعني مثلا في حوالي 10 أنواع من زرعة الطماطم و 3 أنواع من الخيار و 4 أنواع بامية . دا غير طبيعة جينات كل نوع

ودا علشان تعرف تتعامل مع شخصية الزرعه ، يعني بتحب الشمس و لا مش بتحبها ، عاوزه ماء كثيره و لا قليل ، بتعرف تعيش في هواء و لا هدوء ، بتعرف تتعايش مع ملوحة التربه ولا لازم تشيل الملح الأول

كمان ساعات الزرعه بتبقى مذكر أو مؤنث أو الاثنين مع بعض و علشان كدا لازم تزرع من كل نوع علشان يحصل تلقيح و يطلع ثمر

علاج السرطان

في علاج السرطان ، دائما في بالنا ٣ حاجات أساسيه

الأول ، إننا نموت السرطان بأسرع وقت ممكن ، و التاني إننا نحافظ إن السرطان ميرجعش تاني و التالته إن العلاج يكون بأقل أعراض جانبيه على قد ما نقدر

الفكره هنا ، إن الخلايا السرطانية بتبقى مقاومه للموت ، خلايا خالده أبدية ، و علشان أموتها كلها بيبقى صعب، صعب جدا ، بس الفكره إني بموت جزء كبير جدا منها يوصل ل ٩٩٪ و هيفضل ١ ٪ مش عارف أوصله او بيقاوم بعنف . و هي ده النسبه الي بسببها ممكن يرجع تاني السرطان

لكن هيرجع إمتى ، دا صعب نعرفه ، بس بنصنف الرجوع الي نوعين ، نوع سريع بيرجع بعد سنتين او تلاته بعد ما العلاج بيخلص ، و نوع بطيئ ممكن ياخد ٢٠ سنه علشان يرجع تاني

الخوف

 

الخوف شعور محرك و شعور أساسي في تحديد الإنسان لإختياراته .شعور لازم يكون موجود في الحياه علشان يكون في توازن، بس الأكيد مينفعش يكون موجود جوا البيت ، جوا الأسره . مينفعش يكون بين الزوجين و لا بين الأب و أولاده و لا الأم و أولادها

الخوف بيولد أساليب ملتوية في التعامل . زي الكذب و الخداع و طبعا ممكن يولد مشاعر زي الضغينه و الكره. الخوف بيخلي الأسره مفككه و بيخلي كل واحد متجنب التاني و منعزل في جزيرته . الخوف بيولد إنحرافات فكرية و سلوكيه عند الكبار و عند الصغيرين . الخوف بيعود الأولاد على الخداع و عدم إحترام روابط الأسره

أنا بتكلم هنا على الخوف المرضي مش الخوف الطبيعي ، الخوف الطبيعي بيكون مصاحب للحب . طبيعي إن إلي بيحب ، بيخاف . بس مش العكس ، إلي بيخاف مش بيعرف يحب

الإنسان الصريح

الإنسان الصريح بيبقى إنسان سهل ، سهل التعامل معاه ، نتكلم معاه ، نشتغل معاه و نعيش معاه . الصراحه صفه حميده ، و صاحبها بيكون صادق في كلامه و في فعله

الصراحه صفه مكتسبه ، صفه بيتربى عليها الإنسان . الصراحه صفه صعبه ، لأنها بتبقى عاوزه معاها تعود على صفات تانيه ، زي الصدق ، الثقه في النفس ، الإحتمال ، و الشجاعه . الصراحه بتبقى محتاجه مرونه ، و محتاجه حسن خلق

الصراحه أوقات بتستخدم للهدم مش للبناء . ساعتها بتتحول لصفه غير حميده . زي مثلا لو تحولت إلى هجوم ، أو إستخدمت في صراع علشان كدا مهم جدا يكون فيه حسن إختيار للكلمات و حسن إختيار للمواقف

مسلسل رأفت الهجان

من أول حلقة في المسلسل و انت هترتبط بشخصية رأفت الهجان و هتفضل مختار شخصية رأفت المصرية فوق بقية الشخصيات زي شخصية ياكوف حنانيا أو ليفي كوهين أو حتى شخصية ديفيد شارل سامحون إلي هتكمل لحد الآخر

المسلسل بيفتح أمامك مواضيع كثيرة جدا للنقاش و خاصة داخل نطاق الأسرة و تعليم الأولاد معنى الوطنيه و القومية . كل يوم بنتكلم عن الأحداث إلي حصلت و بنفكر و نحاول نتنبأ بالأحداث الجارية . ومع الأحداث تلاقي كل واحد بيختار الشخصية الأقرب إلى شخصيته و يتقمصها و يحاول أن يجاري الأحداث معاها

و طبعا كان في أوقات بيزيد معاها الروح الإنفعالية جدا من فرح لما إستطاع ليفي كوهين الهروب من البوليس و قلق لما ديفيد عدى الحدود و كانوا بيكشفوا عن أوراقه و خوف لما كان رأفت بينام و يحلم بالإعدام و كلنا شعرنا بالحزن الشديد وقت النكسه و الفرح الشديد وقت الإنتصار . كل حلقة من المسلسل بيكون لها روح معنوية مختلفه مره تترفع أوي و مره تنزل أوي و بتكون مؤازر تماما لمشاعر رأفت المخفية داخل مشاعر ديفيد سمحون

في المسلسل ذكر إثنين من رؤساء لمصر السادات و عبد الناصر و معاهم الأولاد عرفوا يعني إيه حكم ملكي و ليه حصل ثورة عليه و بعد كدا حركة الظباط الأحرار و الجمهورية المصرية و الإتحاد مع سوريا و تكوين الوحدة العربية ثم موت جمال عبد الناصر و الحزن الشديد إلي أصاب المصريين و قتها و خدعة حرب أكتوبر و تدمير خط بارليف و كمان كان في لمحات من السياسة الألمانيا القديمة

مسلسل رأفت الهجان يمثل حقيقة الشخصية المصرية في تفانيها لحماية بلدها و في دفئها و تماسكها . شكرا لهذا العمل و شكرا للممثلين

التواضع

التواضع صفه من صفات الإنسان المتربي ، إلي على خلق . الإنسان المتواضع هو إنسان قوي ، عيونه مليانه ، متزن نفسيا. الإنسان

المتواضع بيقبل بالحق ، بيقول الصدق ، أمين و معندوش مشكله في الإعتذار

التواضع بيطلع من البني آدم بطريقه عفوية مش محتاجه تصنع ، لأن متصنع التواضع بيبقى إنسان ذليل . متربي على المهانه ، متربي على الخوف ، و متربي على الطمع

التواضع صفه بترفع قدر الإنسان أمام نفسه و أمام الناس و الأهم أمام ربه . المتواضع مش محتاج ألقاب يتنادى بها و مش محتاج شهادات يتعرف بها . المتواضع مش محتاج يبقى صاحب سمو ولا عظمه ولا يكون معظم و لا يكون مفدى

بذور

 

في بذور علشان تبدأ تعمل جذور ، محتاجه رطوبة عاليه وده بتتحط في مكان مقفول مع كميه مياه كبيره . و في بذور تانيه محتاجه تتعرض للهواء و الشمس علشان تطلع جذور

معظم البقوليات بتبقى محتاجه رطوبة و معظم الورقيات بتبقى محتاجه هواء و شمس و هنا نظام الزراعه بيختلف، البقوليات بتتنقل بعد التجذير لتربه و الورقيات بيكون عن طريق رشها على التربه قبل التجذير

الفكره هنا إنك تفهم الزرعه و تفهم إحتياجاتها و تبدأ توفره علشان يحصل توافق بينكم و تكبر معاك

جيش قوي جدا

تخيل إنك بتحارب جيش قوي جدا ، جيش فاهم كويس جدا ، متماسك جدا ، معاه كل المعلومات عنك ، شايفك و عارف كل الطرق الي ممكن تحاربه بها . تخيل بقى إنك ضعيف ، مش فاهم ، مش شايف ، معندكش معلومات ، مشتت ، معندكش علم و معندكش قدرة و معندكش خبره . الحرب هنا مش متكافئه خالص ، الحرب هنا القوي فيها كسبان من غير ما يحارب . هو دا السرطان

في كام واحد فقد حياته علشان نعرف معلومه واحده عن السرطان . كام تجربه علاجيه اتعملت ، كام تدخل جراحي ، كام جرعة كيماوي ، و كام جرعة إشعاع . جيوش من البني أدميين بيشوفوا و يكتشفوا و يكتبوا و يتكلموا و يتفقوا و يختلفوا ، علشان نعرف معلومات و طرق نقدر نحارب بها السرطان

السرطان كائن محتل ، بيحتل أجسامنا و بيستغلنا و بيموتنا علشان هو يعيش . كائن واخد نفس شكل خلايانا ، بيعرف يستخبى ، و بيعرف يتأقلم و يتغير . بيقاوم و يقوم بسرعه . السرطان مرض مكلف جدا في علاجه ، مرض محتاج رعاية و عناية كبيره

زمان السرطان كان مرض فتاك ، بس دلوقتي بقى في أنواع منه بتخف . تخيل بقينا نقدر . بقى عندنا القدرة ، و بقى عندنا أمل . تخيل إن في أنواع منه إتهزمت ، في أنواع منه إنتهت . تخيل إن دلوقتي بقى في كمان تطعيمات بتحمي من السرطان . تطعيمات بتتاخد علشان بقينا عارفين و بقينا واثقين

أجدع ست

الست لما تبقى قوية بتبقى ست يعتمد عليها ، ست بتعرف تتصرف ، بتعرف ترسم حدود لنفسها و لغيرها. و طبعا بتعرف تعلم أولادها يبقى عندهم إستقلال ، عندهم قوة الشخصية ، و عندهم مرونه في التعامل . أنا هنا مش بتكلم عن الست الي بتاخد حقها بالخناق و المشاكل . أنا بتكلم عن الست الي عندها إراده ، عندها تفكير سليم ، قوة في إحتمالها ، و عندها تسامح . الست الي بتؤدي أدوارها بأمانه و بإخلاص مخلوط برحمه

الست ده بميت راجل . لأنها بتعرف تتصرف و بتعرف تتعامل و تروح مشاوير و تخلص أوراق و تتفق مع ناس ، و في نفس الوقت بتعرف تربي أولادها و تعدل سلوكياتهم و كمان تراضي جوزها . الست ده بتبقى أساس لبيتها ، بتبقى سند للراجل و للأولاد ، و بتخلي كل الناس يتلموا حواليها

الست ده بيبقى عندها إبن مسؤل ، و ملتزم و بيبقى عندها بنت مسؤلة و متزنه . الست ده بتبقى أجدع أم

نظام التربية

في بيوت عندها نظام حر في التربيه و بيوت نظامها بيبقى طبقي . على حسب شخصية الأب و الأم مع بعض أولا و مع الأولاد ثانيا

النظام الحر ، يعتمد على إن الأسره كلها عباره عن شخص واحد ، يعني الإهتمام بيكون موجه للشخص ، يعني كلنا بنسمع إللي بيتكلم ، كل واحد بيقول رأيه من وجهة نظره من غير ما يخاف ، و محدش بينتقد ، كلنا بنفكر مع بعض ، و نتناقش مع بعض ، و بنتفق مع بعض ، و نشوف أحسن رأي و نعمله . و مع الوقت تلاقينا كلنا قربنا من بعضنا ، فهما نفسنا وفهمنا بعض و المهم فهمنا طريقة تفكيرنا

النظام الطبقي بقى مختلف شوية ، ممكن نسميه نظام مغلق ، يعني الأسره مرتبه طبقيا ، بالعمر ، أو بالمكانه . الفكره إن الأب هو الآمر و هو الناهي و بعد كدا الأم و بعد كدا الأخ الأكبر . هنا الأدوار بتتوزع على الأفراد بطريقة الأوامر . نظام التربيه هنا بيحيد التفكير و يهمل الذكاء و بالتالي عمليه الإصلاح الأسري بتكون محدوده . و تفكير الأولاد بيتبلور بمدأ التبعيه مش بمبدأ التجربه

قرأت مقال بيتكلم ليه الطفل الرضيع بيمص أصابعه و بتبقى عاده عنده. و كان تفسير المحلل إن في أطفال بتكون لهم شخصيات قيادية و بتبقى محبه للإعتماد على نفسها ، بس هما لسه متعلموش يتعرفوا على نفسهم و لا على إحتياجاتهم و دا بيظهر من فترة الرضاعه

إزاي يعني ، المقال بيقول إن الطفل الرضيع بيقى مش فاهم الفرق بين إحتياجاته الداخليه لجسمه زي الأكل و الشرب و بين إحتاجاته النفسيه زي الحب و الأمان . و علشان كدا الطفل بيسكت لما بياكل و كمان بيسكت لما بيتلف و يتحضن

و مع الوقت بيبدأ يربط بين إحتياجاته و تصرفات أمه ، وهنا تيجي النقطه الفاصله ، إن الطفل يلاقي صوابعه هي الي بتسكته و متخليهوش يظهر إحتياجه لأي حد . و بالتالي بيقدر يكفي نفسه

الطفل دا محتاج تربيه متوافقه مع شخصيته ، محتاج حد يعلمه قوة الشخصية من غير ما يكسره ، الإستقلال من غير إنعزال ، إحترام الأخرين من غير أنانيه . و كمان محتاج حد يتسند عليه وقت ما يقع و يغلط

الطريق إلى إيلات

الطريق إلى إيلات ، من الأفلام إلي عاشت معانا عمرنا كله و إتربينا عليها و عرفنا كم التضحيات و المتاعب من أجل حرب العدو و المحافظه على الوطن

إتعلمنا معاه معنى القياده و تضحياتها و معنى الشجاعه و البسالة و المشاركه و الروح الجميله . و إن العلم و المعرفه وراء القوة . و إتعلمنا معنى الوحده العربيه و القوميه المشتركه

الفيلم تجسيد لقائد حازم و صبور و متحمل المسؤولية و بيفدي أرواح فريقه بنفسه و مش مره واحده دا مرتين . و جماعة لهم شخصية واحده و بيحركهم هدف واحد و مفيش بينهم أي ضغينه . و مهندس متعلم و خبير و وطني . عايشين مع بعض عساكر في البحر و أهل و أقارب على الأرض

الحرية

الحرية هي إنك تعمل إلي إنت عاوزه من غير ما تضر الناس ولا تضر ممتلكاتهم و لا معتقداتهم و لا تقاليدهم ولا دينهم كمان . يعني مينفعش يكون الناس مش بتشرب خمره و انت عاوز تفرض عليهم شربها أو ممنوع عندهم فكره و إنت بتتبنى نفس الفكره . لو عاوز تعمل حاجه غريبه ، روح عيش في مجتمع بيتبنى الحاجات الغريبه . و فكرة فرض فكره معينه في مجتمع رافض يعتبر تحدي لكل المجتمع . و دي كدا مش حرية ، دي وقاحه

خلي بالك ان المجتمع عباره عن شرائح ، و كل شريحه بيبقى لها كبير ، هو المسؤول عنها و عن أفكارها و عن توجهاتها و حتى عن حمايتها. هو المسؤول عن تعريف الصح من الغلط ، الحلال من الحرام ، المفروض من الممنوع. و الكبير هنا مش لازم يكون شخص ، ممكن يكون دين ، او قانون ، او تقليد معين في سلوك الناس كلها. ومن الوقاحه إعلان التحدي

إحنا شفنا أمثله كثيره لرجال و سيدات إتقتلوا او تم نفيهم علشان غيروا فكرهم او غيروا توجهاتهم و لجؤا لبلاد تانيه عندها إستعداد تتبنى نفس الأفكار. الناس ده إختاروا طريقه مختلفه في حياتهم ، طريقه في السياسه ، طريقه في الدين ، طريقه في الجواز . و مننساش ربنا دمر مدينة كامله بكل إلي فيها علشان أعلنوا التحدي و أعلنوا الوقاحه و إستقبلوا كل الي أعلن التحدي و الوقاحه معاهم

الفكره هنا بقى ، هل لو اتحطيت في إختبار و تكون ممثل لفكره تعتبر تحدي او تدعوا للتغير . هل هتقبل و تكون موافق او منافق و لا ترفض و تكون عبره او مثال

تعويد

 

علشان تسقي الزرعه بتاعك لازم الأول تحدد انت هتعود الزرعه على إيه . الزرع عنده فسيولوجيا زي الإنسان و من خلالها بيتعود و بيتأقلم . وعلشان كدا بيحصل إتفاق بينك و بين زرعتك . إنت هتحط كمية ماء قد إيه و إمتى . و دا هيخلي الزرع يتعلم يستهلك الماء بتاعته بحكمه و ميعطش

العطش عند الزرع بيبان عند طريق الورق ، تلاقيه ذبل و تلاقي الساق مايل و مش قادر يشيل الورق

كمان متحطش ماء كثير علشان الجذور بتحتاج تتنفس هواء و الماء الكثير ممكن يخنقها و الزرعه تغرق . كمان الماء الكثير ممكن يعمل عفن في التربه و الجذور تعفن منك

وهنا من خلال التوازن و التعود هتحمي زرعتك. و تربيها لأنك هتشوف نتيجة فكرك و هتحصد نتيجة عملك

علاجات للسرطان

زمان السرطان كان يعتبر مرض ملهوش حل ، بس دلوقتي في منه أنواع بتخف و المريض بيعيش بعدها سنين طويله .مريض السرطان أول ما بيعرف بمرضه ، بيجيله حاله من الخوف الشديد ، حاله من اليأس ، و حاله من الوحده ، ممكن علشان الصورة الذهنيه الي في دماغ الناس عنه . الصورة ده نصف صحيحه لأن بقية الأمراض بتموت برضه زي أمراض القلب مثلا وده بتموت أكتر من السرطان

مريض السرطان بيبقى محتاج كل الدعم من الي حواليه

مريض السرطان على قد ما هو محتاج يتعالج ، بيبقى محتاج يصدق في العلاج ، يصدق في تأثيره. محتاج يشوف أمثله كان عندها و خفت ، أمثله عايشه بعد العلاج . محتاج يقعد معاهم ، يسمع منهم ، يعرف هو داخل على إيه و التحديات إلي هيقابلها إيه

علشان كدا المستشفيات الي فيها علاج نفسي و علاج سلوكي و علاج روحاني و كمان علاج ترفيهي ، بيبقى معدل شفاء مرضاها أعلى من غيرها