نزعة تجاوز الحرمان

هتلاقي أطفال و خاصه الكبار منهم بيبقى عندهم صراع رغبات ، معظمها رغبات نفسية ، بيحاولوا يغيروا من أفكارهم و طباعهم و طموحهم علشان يتحركوا من طبقتهم الإجتماعية إلي نشئوا فيها و يبقوا في طبقه إجتماعية أعلى منها، على حسب رؤيتهم فقط طبعا . مش معنى كلامي إني موافق على التصنيف ، بس المجتمع بيخلق الفروقات ده و بيصنف الطبقات بين طبقه عليا و دنيا ، أو طبقه مهيمنه و طبقة مهيمن عليها

النزعه ده بتخلق نوع من الرغبه الخبيثه . تلاقي الأولاد بيبقى عندهم تنافس غير شريف ، ممكن يضحي بأخلاقه ، بأسرته ، بنفسه ، بأي حاجه و ممكن يدفع أي ثمن ، علشان يتحرك و يوصل للطبقه الأعلى

كثير جدا من المسلسلات و الافلام بتجسد النوع ده من الشخصيات و بتركز على الصراع ده و بتخلق تعاطف مع التصرفات ده و بتخليهم يهاجموا بيئة التنشئة و بالتالي بيبقى عندهم رفض و كره للمجمتع المحيط بهم

دورنا هنا كأباء و أمهات مش إننا نأكل و نشرب و نشتري هدوم بس ، دورنا إننا نخلي أولادنا يحبوا نفسهم و يحبوا أسرتهم و يحبوا عيشتهم و أبدا ميحسوش بالحرمان

الجده ، الأم ، البنت ولا وجود للزوجه .

تلاقي في الكتب المدرسيه إلي بتربي و تعلم الأطفال أدوارهم الإجتماعية ، أدوار و صفات محدده للبنت و الأم و الجده لكن متلاقيش خالص صفات للزوجه . تلاقي مثلا صفات البنت زي انها تبقى جميله و مؤدبة و رشيقه ، و الأم صفات زي مسؤلة التغذية و الدعم ، و الجده صفات زي العناية و الرحمه

الغريب انك متلاقيش صفات للزوجه خالص ، كإن الدور دا غير موجود في الكتب المدرسيه و يقتصر بس على الروايات . و حتى في الروايات تلاقي برضه الزوجه صاحبة صفات سيئه ، كالباحثه عن الجمال في العيون ، او باحثه عن الحب في الكلام ، او باحثه عن الدعم و الإهتمام . و دائما تنتهي شخصياتها بالإنتحار او الندم او العقاب

الزوجه بيبقى لها الدور الأهم في تكوين الأسره و تكوين المجتمع . وبالتالي الأطفال محتاجين تأسيس و تربيه من الصغر لهذا الدور العظيم

أرقام زراعية

الفدان عباره عن 4200 متر مربع و يتقسم ل 24 قيراط . و القيراط 175 متر مربع و يتقسم ل 24 سهم و السهم 7.25 متر مربع .

الهكتار عباره عن 10000 متر مربع و يتقسم ل 10 دونم . و الدونم 100 متر مربع .

يعني أزرع كام شجره في الفدان

في الزراعة المكثفة الشجر بيتزع في خط مستقيم بين كل شجره حوالي 1.5 متر و المسافه بين الخطوط 3 متر . و كدا نعمل حوالي 800 شجره في الفدان . بس علشان المسافات ده تعتبر محدوده فطول الشجر هيكون قصير علشان الشمس توصل للجزع الرئيس و ميظللش على بعضه .

و في الزراعه العادية الغير مكثفة بتكون المسافات بين الأشجار أوسع و المسافات بين الخطوط أوسع فممكن تزرع حوالي 100 شجرة بس في الفدان . بس الشجره هتنمو براحتها و تتفرع برضه براحتها .

مادة فوق العادة ... تقتل و تحافظ على الحياة، بيتقال كثير و الحقيقة غائبة

كثيرا ما يقال أنه يمكن الوقاية من ثلثي حالات الإصابة بالسرطان من خلال التوقف عن التدخين و تناول وجبات صحية و ممارسة الرياضة . لكن الأدلة التي تربط هذا الكلام تعتبر ضعيفة و غير مبنية على أساس صحيح

و كلام آخر يتسم بنفس مقدار الشك و هو أن مضادات الأكسدة مثلا زي فيتامينات C و E الطبيعية الموجودين في الفواكه و الخضراوات و الصناعية منها بيكون لها الدور الحامي من الجذور الحرة التي تسبب السرطان

ثالثا يقال أن فيتامين D يقلل من إحتمالات الإصابة بسرطان القولون و لكن تتضارب الأبحاث و يثبت أنه يزيد من إحتمالية الإصابة بسرطان البنكرياس

و أخيرا أثبت أن المنتجات الغنية بالمركبات الطبيعية المختلفه الموجوده في النباتات ليس لها نتيجة في التجارب السريرية التي أقيمت لبيان قدرتها على علاج أو حتى الحماية من السرطان

التفاعلات الحيوية و الكيميائية داخل الخلية السرطانية معقده جدا و متناغمة إلى أبعد الحدود ولا يوجد مادة واحده فقط تستطيع أن تهدد وجودها و تقضي عليها. ولهذا السبب يقوم الباحثون طول الوقت بالتجارب و محاولة إستخدام أكثر من طريقة مدمجه مع بعضهم لمجابهة ذكاء و تعقيد السرطان

علاج السرطان يحتاج إلى مادة غائبة و فوق العاده تستطيع أن تقتل و في نفس الوقت تحافظ على الحياة

هل الشجره بتموت

البيت ، العائله ، الزواج . هو الارتباط الحقيقي للإنسان ، هو الإكتمال . مفيش حد معندوش بيت و بيبقى مكتمل ، كل إنسان بيبقى ناقصه حاجه ، محتاج شريك لحياته يكملها . مش فلوس ولا سلطه ولا شهره و لا حتى تعليم

مفيش حاجه بتعوض وجود شريك لحياتك ، هو أثمن من كل حاجه تانيه . علشان كدا المحافظة عليه لازمه و محتاجه جهد و عمل . البيت عامل زي الشجره ، علشان تثمر هتحتاج عنايه و رعايه و مصاريف و هتحتاج وقت و جهد و إهتمام

شجرة الزواج ، هى شجرة الأمان ، هي الشجره الي بنلجألها وقت راحتنا و ألمنا ،و وقت فرحنا و يأسنا . وثمارها هي فلذات أكبادنا

مدرسة أولادي من وجهة نظر الأب

أدخل أولادي أنه مدرسه ، سؤال مهم جدا و محوري في طريقة التربيه و التنشئه . مش لأن المدرسه هي المكان الي هيبقى فيها الولد حر و بالتالي هيختبر فيها نفسه و هيختار يعمل الي نفسه فيه . ولكن السبب المهم هو إن المدرسه هيبقى موجود فيها طبقات إجتماعيه متعدده ، و نتائج تربوية كثيره ، و هتكون أول مكان الطفل ممكن يحس فيه بالطبقية سواءا كطبقه عليا أو طبقه دنيا و بالتالي يبدأ يكون فكره عن دوره و مكانته

النظام التربوي في المدارس بيكون نظام تبعي ، يعني الطفل هيسمع الكلام حتى لو مش هو نفس الي متربي عليه . و هيكون منبوذ لو مسمعش الكلام و نفذه . و دا طبعا بيأكد على فكره مين إلي هيقود نظام التبعيه ده ، هل هو المال و لا السلطه و لا القرابه و لا الدين

هتلاقي مدرسه القوي فيها أولاد الأغنياء و مدرسه أولاد ذوي السلطه و مدرسه أولاد المدرسين و المديرين و مدرسه أصحاب طائفه دينيه معينه . و القوي في المدرسه هو الي هيحدد نظام التبعيه . طبعا انا مش بتكلم عن الصراعات الي هيواجهها مدير المدرسه و لا الأساتذه الكرام . انا بتكلم عن قدرة الطفل على التعامل مع الصراعات ده و قدرته على تحديها و تخطيها طوال سنين دراسته و بعدها عمره كله

علشان كدا لما تيجي تختار مدرسه ، روح للمدرسه الي هيكون فيها اولادك مرتاحين ، مش منبوذين ، و لا حاسين بالدونيه . مدرسه يكون لها نظام قريب من نظام البيت و الأسره

المسؤوليه بين الإستعباد و الإستحمار

غريبه جدا الناس إلي بتحاول تخرج برا دائرة المسؤوليه . طول الوقت في حرب و عناد و مقاومه . بتحاول على قد ما تقدر إنها ترفضها و كمان بتطلق عليها اسم العبودية . عبودية لوظيفه ، أو لبيت و أسرة ، أو لأي فكره أو حتى لدين

العبودية عندهم لها أشكال زي الإجبار على الخدمه ، أو الإلتزام بمصاريف أو حتى الإعتماد عليهم في أداء وظيفه محدده

فكرتهم إنهم عايشين مرتاحين على أكتاف غيرهم ، مش عاوزين يفكروا أو حتى يتحركوا . بتبقى أراءهم واجبة التنفيذ و نظرتهم فوق نظرة الكل . محترفين للتمثيل و الكذب و عند المواجهه محترفين تبرير و بكاء

غريب جدا مبدأهم ، ما هو يا تستعبدهم في خدمتك ، يا تستحمر نفسك في خدمتهم

الخلايا النسيجيه

في أنواع من النباتات لما تكون جودتها عاليه جدا و مقاومة للأمراض و للحر و الملوحه و ينتج عنها ثمار كثيره و طعمها جميل ، بيعملوا منها نفسها شتلات . طبعا بتبقى نفس الشكل والخصائص

و صناعة الشتلات بتكون عن طريق زراعة الخلايا النسيجيه ، يعني زراعة أجزاء من النبات في المعمل الأول و تحت ظروف خاصه . يعني في أنابيب فيها أغذية صناعية تحت ظروف معقمة وعوامل بيئية محكمة . و الطريقه ده فعالة جدا لو النباتات مهمة و إستراتيجيه زي النخل و البطاطا و البطاطس

تطعيم ضد السرطان

في أبحاث بتقول إن الإنسان لو إتصاب بأمراض فيروسية أو بكتيريه معينه ، ممكن السرطان يتعالج . إزاي الكلام ده . خليك معايا و انا هشرحلك . الأمراض الفيروسيه او البكتيرية بتخلي المناعه بتاعتنا تطلع أجسام مضاده علشان تموتها و كمان علشان تحمينا مستقبلا من الإصابه منها تاني ، و لكن ساعات الأجسام المضاده نفسها بتعرف تميز الخلايا السرطانيه من الخلايا العادية الطبيعية

و دا مصدر القوه في الفكره ، ان ممكن أحقن مريض السرطان بفيروس ضعيف او ميكروب ضعيف و بالتالي المناعه تموته و كمان تموت السرطان ، أيوا ممكن . في أنواع من سرطان المخ مثلا بتموت لو الإنسان أخذ فيروس الهربس . و دي طريقه من طرق العلاج

و علشان الفكره ده بقت فعاله ، طلع لأنواع كثيره من السرطان تطعيم ، يعني أتطعم علشان ميجليش سرطان . و الموضوع لسه كبير

الزواج طمأنينه و ألفة

علشان الزواج يستمر ، محتاجين نوصل مع بعض لمشاعر الطمأنينه و الألفه

الطمأنينه يعني السلام ، الإرتياح ، الثقه . يعني بسهوله أستسلم و أسلم حياتي للطرف التاني . مش بس حياتي ، أسلم كمان سمعتي ، و فلوسي ، و مستقبلي

الألفه معناه إننا نكون بنفهم بعض ، بنولف على بعض ، بنفهم مشاعر بعض ، إيه إلي بنحبه و إيه إلي بنكرهه . إيه إلي بيبسطنا و إيه إلي بيزعلنا

البيت السعيد هو الي بنلجأ فيه لبعض في كل أحوالنا . و دائما موجودين لسد الإحتياج و للسند كمان

الزواج السعيد هو منتهى الطمأنينه و منتهى الألفه

الرأسمال الثقافي

الثقافه عباره عن شوية معلومات و خبرات بيكتسبها الطفل نتيجة تعليمه علوم مختلفه ، زي تعليمه اللغه الي هينطق كلامه بها ، و القواعد النحوية الي هيظبط لغته وكتاباته عليها . تعليمه الهندسه و الحساب علشان يعرف يتخيل و يحسب . و يتعلم الفن علشان يعرف الأذواق و الرياضه علشان الأخلاق و اللياقه

الفكره هنا إن كل ده مصاريف بتتحط في مستقبل الأولاد علشان ينشئوا عليها . و الفكره المهمه هنا ، هل هنعتبر المصاريف ده أساسيه ولا ثانوية في حياة الطفل . و بالتالي هيكون موقع الأسره فين من الثقافه ده

و السؤال الأهم ، هل الطفل هيتأثر بالفكر دا و لا هيكون عنده إنطباع إن الصرف على الثقافه ترفيهي و مش من أساسيات الحياه

الفكره الأخيره هي إن المدرسه الي هيروحها الأولاد المفروض تكون بتنمي فيهم روح الثقافه الي بنزرعها في البيت . لأن المدرسين و نظام المدرسه يا إما هيخلقوا أطفال عندهم توافق ثقافي او أطفال عندهم تعارض و تحدي

الضمير إلزام بين أخلاقية الفعل و إستقلال الفاعل

الضمير هو الحاجز المانع لكل عمل يؤذي أو يدمر سواء لشخص او للمجتمع و لا يكون للضمير أي أهمية إلا إذا كان الفعل نابع من حرية الفاعل و إستقلال أفكاره و إختياره

و هنا العبودية تتحقق عندما يكون القانون المنظم لتفكيرنا و سلوكنا مفروض علينا و محدد لطريقة تفاعلنا مع الأوامر و النواهي

و بالتالي شعور الإلزام الأخلاقي الناتج عن تطبيق الضمير ، و هو شعور ذاتي و شخصي جدا ، يجبرنا على ترك الغايه الفردية و تحقيق الغايه الأخلاقيه . و لتحقيق غاية الإلزام ، يجب تحقيق غاية الإستقلال . و بالتالي إستقلال أفكارنا هو المبدأ الرئيسي لأخلاقنا

بذرة و جنين

البذره هي نبات جنيني صغير بس حالة السكون مش بيكبر يعني , و برضه هي بويضة مخصبة في حالة كمون . البذره عباره عن قشره تحتوي على غذاء مخزن و جنين . ممكن يكون في البذره جنين واحد فقط أو عدد من الأجنه . وهنا كل جنين يطلع ساق و بالتالي البذره الي فيها كذا جنين تقدر تطلع كذا زرعه . بس الأهم هل الجذر يقدر يستحمل يغذي كل السيقان و لا أنا لازم أختار ساق و الباقي أشيله

الجنين الساكن بيتركب من نفس الأعضاء الأساسية التي يتركب منها النبات البالغ زي الجذر والساق والأوراق، ولكن في صورة مصغرة . و بالتالي عند إستنبات البذره و رشها بالماء في مكان رطب و بارد ينتفخ الجنين و يستطيل الجذر للأرض و الساق للسماء و تبدأ الزرعه في النمو

ملاحظة قد تكون غريبة

في أنواع من الحيوانات بتقدر تستبدل أطرافها لو حصلها حاجه و اتقطعت و كمان تقدر تنبت أعضاء داخلية و تجدد أجزاء من أجسامها لو حصلها تلف

في الأنواع ده نادرا جدا لما تلاقي حد شاف فيها نوع سرطان . العادي إن كل المملكة الحيوانية و النباتية بتصاب بالأورام ، بس الأنواع المتجدده نادرا جدا لما تلاقي فيها ورم

هل دا يأخذنا لملاحظه فيها إن السرطان ليس مرضا . ولكنه محاولة من الأنسجة التالفه إعادة إنماء نفسها و لكنها ليس عندها المعرفه الجينية لفعل التجدد

الحب في البيوت ... تربية

في أغنيه بتتكلم عن الحب الحقيقي ، و بتقول بيعيش يا حبيبي ، و بيعلمنا نسامح ، بينسينا إمبارح ، بيعلمنا نفكر دائما في أيامنا إلي جايه

حقيقة الحب ، بيبقى عباره عن أوقات بنعيشها وذكريات جميله بتتبني مع الوقت ، المفروض إنه مش بيقل و بيزيد مع الوقت . ممكن يتحول لعشره ، لسلام ، لطمأنينه ، لثقه ، بس أكيد مش هيقل

إنما بقى علشان يقل و يتحول و يتبدل لكره ، دا محتاج زلزال يدمر الأرض ، زلزال يشيل البيوت و يهدها . محتاج وقت طويل يوصل لسنين مش شهور علشان كل الذكريات تخلص و كل الرصيد ينتهي . و تنتهي كل الحاولات في التجاوز

مش مجرد مشكله عابره نهد البيت عليها و كمان نكره بعض . مش مجرد إختلاف يخلينا نمسح الي إتبنى من حياتنا . بالعقل و التفاهم و بعدها بالود و الرحمه هنعدي و هننسى . بس التربيه هي إلي هتحكم في النهاية

النوم بدري

أكثر سلوك بيظهر على الأطفال و بيعكس سلوك الأب و الأم هو مواعيد النوم . يعني لو الأب و الأم بيناموا بدري تلاقي الطفل ينام بدري و لو ناموا متأخر ينام هو كمان متأخر

طبعا النوم بدري بيخلي الطفل ينمو بشكل صحيح و بيخليه يرتاح أكثر . في الطبيعي الأطفال بتنام من 8 ل 10 ساعات في اليوم . فأحسن وقت هو من 9 مساءا ل 6 الصبح

الطفل إلي بيصحا بدري ، هيبقى عنده وقت طويل كل يوم ، يقدر يعمل فيه حاجات كثيره . يعني هيلاقي وقت علشان يذاكر ، يلعب ، يتمرن ، يخرج . و دا دور الأب و الأم إنهم ينظموا وقت الطفل و يحددوا أهدافه و هيقضي وقته في إيه

خلي بالك من ٣

الأنانيه و البخل و عشق الذات لو موجوده في إنسان سواء راجل أو ست . بتديله معنى واحد في حياته ، هو عدم الإحتياج لطرف تاني ودا قمة الخطر . الطرف التاني لا يمثل له أي أهميه في حياته . يعني يعرف يعيش بدون شريك

الشراكه بالنسبه له بتبقى بالحساب ، بالورقه و القلم . أشارك طرف تاني وفق حسابات و حسابات دقيقه كمان . من غير حماس ولا إهتمام . مش مهم الطمأنينه و لا مهم الأمان و لا مهم السكينه . المهم فيها الماديه و النفعيه فقط

الأنانيه و البخل و عشق الذات ، صفات بتخلي الواحد حاسس بإكتمال وهمي ، إمتلاك زائف ، قوة واهية وهمية . علشان كدا الحياه معاهم بتكون بارده جدا و تعيسه

أنواع الأوراق الخضراء في زرعتك

في أوراق بتطلع مع النمو الأول للبذره ، ده تلاقيها في أسفل ساق الزرعه و تلاقي حجمها كبير و سميكه و مساحتها كبيره و لونها أخضر غامق . و في أوراق تنمو على السيقان الجانبيه للزرعه ، عباره عن أوراق متوسطه ، لها سمك رفيع و لونا أخضر فاتح . و النوع الأخير أوراق على قمة الساق ، حجمها صغير ، معظمها يسقط مع مرور الوقت

كل نوع ورقه بيؤدي دور مهم في إستمرار حياة الزرعه و دور في النمو الهرموني . زي مثلا الأوراق الأولى الكبيره بتبقى مسؤله عن التنفس و الطاقه و تكوين الهرمونات في الحياه الأولى للزرعه . و الأوراق المتوسطه مسؤله عن التخزين و الإمداد و كمان الإخراج ، يعني لو في زياده في تسميد معين تلاقي الزرع خزنت فيها و موتتها . و الأوراق الصغيره مسؤله عن النمو و التأقلم للعوامل الجوية الجديدة

أوقات كثيره ممكن تشيل بإيدك أوراق من زرعتك , علشان أوصل بالزرعه للشكل الي عاوزه . يعني اوقات بشيل الأوراق الكبيره لو الزرعه بتستهلك كميات كبيره من الماء و السماد . و أوقات بشيل الأوراق المتوسطه لو عاوز نمو للساق الرئيسيه . و بشيل الأوراق الصغيره لو عاوز طول معين للساق

مفارقة بيتو Peto's paradox

في عالم وبائيات سأل نفسه سؤال و مكنش عارف يجاوب عليه و هو لماذا الحيوانات الضخمه زي الفيل مثلا لا تصاب بقدر أكبر من السرطان بالمقارنة بالحيوانات الصغيرة زي الفئران

و كتب الكلام ده في بحث سماه لماذا لا تصاب كل الحيتان بالسرطان . و إستنتج سببين ، قال في الأول إن في علاقة عكسية بين العمر و معدل ظهور السرطانات يعني كل ما زاد العمر قل معدل ظهور السرطانات و دا لأن معدل فقد الخلايا بيكون قليل و بالتالي معدل إنتاج خلايا جديدة بيكون قليل و كدا يكون معدل حدوث الطفرات داخل الخلايا بيكون قليل فيتكون السرطان بمعدل أقل

و قال في السبب التاني - ودا الأهم و الأخطر - هو أن معدل حدوث طفرات للأورام السرطانيه نفسها بيزيد فتنقلب على نفسها . يعني إيه بقى الكلام ده . في حاجه إسمها الأورام الفائقة أو hypertumors . و دي عباره عن طفرات جينية بتحصل للخلايا السرطانيه نفسها بتخليها أقوى من غيرها من الخلايا السرطانية العادية و بالتالي تستطيع أن تتغلب على الخلايا السرطانيه الضعيفه في حرب غرضها النمو و الإنتشار

ولكن وجد بيتو شئ عجيب جدا و غريب جدا جدا . وجد نوع من الخلايا السرطانيه الضعيفه و الهزيلة تقوم بالتطفل على الخلايا الفائقه و الجديدة و القوية و تستطيع إختراقها و إستنزاف طاقتها فتقل قوتها و تكبح جماح إنقساماتها و بالتالي تسيطر عليها

معنى كدا إن في وسيلة دفاعيه موجوده داخل السرطان بيقدر من خلالها يقتل بها نفسه أو بيقتل بها الخلايا التي تطورت و خرجت عن مفهوم القطيع و أصبحت خطر يهدد كيانه السرطاني

PMID 21296451

المركب السائر بين الراجل و الست

لو إفترضنا إن الأسره عامله زي المركب . يبقى دور الراجل هو إنه يشيل المركب و يحافظ على توازنه . و دور الست إنها تحرك المركب و تمشيه و برضه تحافظ على توازنه . كل واحد له دور عظيم في إستمرار المركب . الراجل مش هيعرف يشيل و يمشي مع بعض و الست مش هتعرف برضه تشيل و تمشي

بس المركب علشان تفضل ماشيه لازم تفضل موزونه ، يعني هتحتاج رعايه و محافظه . ودا بقى الدور المشترك إلي بينهم ، كل واحد يعمل إلي يعرفه و إلي يقدر عليه . مفيش إلزام و لا إجحاف . الإثنين بيشتركوا في التوازن . لأن من غيره المركب هتغرق

العقاب

 

لما الطفل يكسر حاجه في البيت ، حاجه مهمة او شكلها حلو أو يبوظ حاجه . بيبقى في نوعين من ردة الفعل من الأبوين . ردة فعل هجوميه ،زي الضرب ، و ردة فعل بالكلام و بالنقد زي لو عملت كدا تاني هيكون عقابك كذا . في الموقف ده الطفل هيتولد عنده رد فعل للمواجهه ، رد فعل بناءا على شخصيته و على شخصية أبوه و أمه

فكرة العقاب في حد ذاتها مهمة في التربيه و الإحساس بالذنب شعور بيولد عند الطفل إحساس بالمسؤلية ، بس العقاب الجسدي له أضرار وقتيه سريعه و تأثيرها سيئ في المستقبل . إنما الكلام و التفاهم بيولد عند الطفل ربط بين الفعل و نتيجته وبالتالي تأثير التربيه يكون ضابط للتفكير . طبعا انا مش بتكلم عن الخصام ، لأن آثاره مدمره على الطرفين و أنا أرفضه قلبا و قالبا

أهم حاجه في تربية الأولاد إنك توصل معاهم لفكرة توقع إلي ممكن يحصل في المستقبل نتيجة أفعالهم ، و بالتالي هيتظبط سلوكهم في الوقت الحاضر و في المستقبل ، لأن أساس التربيه هو تعليم الصدق و المسؤولية